I Stap na Wok Bilong Jisas

Narapela Kain Disaipel

BOT i sua pinis na Jisas i lusim bot i go daun na tupela man i wel nogut tru i kam bungim em! Tupela i gat spirit nogut na i save stap nabaut long ples matmat. Ating wanpela em i wel moa yet, long wanem ol spirit nogut i bosim em longtaim, olsem na Baibel i mekim bikpela stori moa long em.

Inap longtaim pinis dispela taranguman i save stap skin nating na em i save slip long ples matmat. Long san na long nait em i save singaut nogut na katim skin bilong em yet long ston. Planti taim ol i bin pasim em long ol hankap na sen, tasol em i save brukim. Em i strong tumas, na i no gat man inap long holimpas em.

Em i ran i kam brukim skru klostu long lek bilong Jisas, na ol spirit nogut i kirapim em long singaut bikmaus olsem, “Jisas, yu Pikinini bilong God Antap Tru, yu laik mekim wanem long mi? Mi askim yu strong long nem bilong God, yu no ken mekim nogut long mi.”

Jisas i wok long tokim dispela spirit nogut, “Yu mas lusim dispela man.” Tasol bihain Jisas i tok: “Wanem nem bilong yu?”

Spirit nogut i tok: “Nem bilong mi Ami. Long wanem, mipela i bikpela lain.” Ol spirit nogut i save amamas long hevi i painim ol man ol i bosim, olsem na ol i save bung bung na wok long mekim nogut long man. Tasol taim ol i lukim Jisas, ol i askim em strong long em i no ken rausim ol i go long hul i no gat as. Long dispela taim tu yumi lukim bikpela strong bilong Jisas long daunim ol spirit nogut i save bagarapim ol man. Na tok bilong ol spirit nogut i kamapim long ples klia olsem ol i save, bihain bai ol i kisim strafe, olsem God bai rausim ol wantaim hetman bilong ol, em Seten, i go long hul i no gat as.

Wanpela bikpela lain pik, inap olsem 2,000 samting, ol i kaikai i stap long liklik maunten klostu. Olsem na ol dispela spirit nogut i tok: “Yu mas salim mipela i go insait long ol dispela pik.” I olsem ol spirit nogut i save kisim narapela kain amamas nogut long i go insait long skin bilong ol animal na ol man. Orait, Jisas i larim ol i go. Na ol spirit nogut i lusim dispela man, na ol i go insait long dispela 2,000 pik olgeta. Nau ol pik i ran strong tru i go daun long wanpela ples nogut. Na ol i pundaun long raunwara na ol i dring wara na i dai.

Ol wasman bilong pik i lukim na ol i ranawe i go bringim tok bilong dispela samting i go long taun na long ol hap nabaut. Na ol manmeri i kam lukim wanem samting tru i bin kamap. Ol i kamap long Jisas, na ol i lukim dispela man, bipo ol planti spirit nogut i stap long em, nau em i pasim laplap, na tingting bilong em i klia, na em i sindaun i stap klostu long Jisas!

Ol man i bin lukim ol samting Jisas i bin mekim, ol i stori long ol manmeri long ol samting i bin kamap long dispela man, na ol i stori long ol pik tu. Ol manmeri i harim na ol i pret, na ol i tok strong long Jisas i mas lusim graun bilong ol. Orait Jisas i kalap long bot, na dispela man bipo ol spirit nogut i stap long em, em i tokim Jisas: “Inap yu larim mi i go wantaim yu?” Tasol Jisas i tok: “Yu go long haus bilong yu na long ol wanlain bilong yu. Na yu tokim ol long olgeta samting Bikpela i bin mekim bilong helpim yu, na long em i bin marimari long yu.”

Taim Jisas i oraitim man em i save tambuim em long tokim ol man long ol samting Jisas i bin mekim bilong helpim em, long wanem em i no laik bai ol man i harim ol stori nabaut na ol i kisim tingting kranki. Tasol i stret em i tokim dispela man long autim tok long ol samting em i bin mekim, long wanem dispela man bai autim tok long ol man nau Jisas i no inap autim tok long ol. Na tu sapos ol man i lukim dispela man yet na harim tok long maus bilong em yet long strong bilong Jisas long mekim ol gutpela wok, bai ol i no tingim tumas ol stori long bagarap i bin painim ol pik.

Olsem na dispela man i go, na em i wok long autim tok long olgeta hap bilong distrik Dekapolis long olgeta samting Jisas i bin mekim bilong helpim em. Na olgeta manmeri i harim na ol i kirap nogut. Matyu 8:​28-34; Mak 5:​1-20; Luk 8:​26-39; Revelesen 20:​1-3.

◆ Ating i gat wanem as na Baibel i mekim bikpela stori moa long wanpela bilong dispela tupela man i gat spirit nogut?

◆ Olsem wanem yumi ken save, ol spirit nogut i save bihain bai ol i go long hul i no gat as?

◆ Ating i gat wanem as na ol spirit nogut i laik go insait long skin bilong ol man na animal?

◆ Dispela man bipo i gat ol spirit nogut i stap long em, bilong wanem Jisas i no tambuim em long autim tok long ol samting Jisas i bin mekim bilong helpim em?