Yumi Inap Givim Samting Long Jehova
1 Yu save olsem yumi ol man inap givim samting long God? Abel i bin ofaim sampela gutpela animal bilong em long Jehova, na Noa na Jop tu i bin mekim olsem. (Stt. 4:4; 8:20; Jop 1:5) Tru, ol dispela ofa i no mekim Man Bilong Wokim olgeta samting i gat planti samting moa, nogat, olgeta samting i bilong em. Tasol ol dispela ofa i kamapim klia pasin bilong ol dispela man long laikim tru God. Long nau, yumi inap mekim wok long taim, strong, na mani samting yumi gat bilong “litimapim nem bilong en.”—Hi. 13:15.
2 Taim: Em i gutpela pasin tru long yumi no ken lusim nating taim long mekim ol samting i no bikpela samting tumas na yumi insait moa long wok autim tok! (Ef. 5:15, 16) Ating yumi inap senisim sediul bilong yumi bambai yumi inap mekim wok painia haptaim long wanpela o tupela mun insait long yia. O ating yumi ken lusim sampela hap taim moa long autim tok, winim bilong bipo. Sapos yumi mekim wok autim tok inap 30 minit moa long olgeta wan wan wik, yumi inap kisim 2-pela aua moa long olgeta wan wan mun!
3 Strong: Bilong yumi gat inap strong na bai yumi ken autim tok, yumi no ken insait long ol amamas na wok mani em ol inap pinisim strong bilong yumi olgeta na nau yumi no inap mekim gut wok bilong Jehova. Na tu, yumi no ken wari tumas long ol samting, dispela inap mekim yumi i “bel hevi tru” na yumi no gat strong bilong mekim wok bilong God. (Snd. 12:25) Maski i gat as na yumi wari, i gutpela moa long yumi putim ‘olgeta hevi long han bilong Bikpela’!—Sng. 55:22; Fl. 4:6, 7.
4 Mani Samting: Yumi inap givim mani samting yumi gat bilong helpim wok bilong autim tok. Pol i kirapim ol wanbilip Kristen long olgeta taim ol i mas ‘tilim mani na putim hap i stap’ na bai ol i ken helpim ol narapela i sot long ol samting. (1 Ko. 16:1, 2) Olsem tasol, ating yumi ken putim sampela mani i stap bilong helpim kongrigesen long ol samting em i sot long en na bilong helpim wok bilong autim tok long olgeta hap. Jehova i amamas long ol samting yumi amamas long givim, maski em i liklik samting tasol.—Lu. 21:1-4.
5 Jehova i bin givim planti samting long yumi. (Jem. 1:17) Yumi kamapim tenkyu bilong yumi long rot bilong givim taim, strong, na mani samting bilong yumi bilong mekim wok bilong em. Taim yumi mekim olsem, yumi amamasim Jehova, long wanem, em “i save laikim man i amamas na i givim samting long laik bilong em yet.”—2 Ko. 9:7.