“Stap Insait Yet Long Pasin Laikim Bilong God”
1. I gat wanem as na ol i wokim buk “Stap Insait Yet Long Pasin Laikim Bilong God”?
1 Yumi amamas tru long wetim stadi bilong nupela buk “Stap Insait Yet Long Pasin Laikim Bilong God,” em bai kamap long Baibel Stadi Bilong Kongrigesen, kirap long wik bilong Mas 15! Long pinis bilong pas em Gavening Bodi i raitim i go long ol man i laikim tru Jehova, i gat tok olsem: “Mipela i laik bai dispela buk i ken helpim yu long wok yet long bihainim tok i tru long laip bilong yu na bai yu ken i ‘stap insait yet long pasin laikim bilong God na kisim laip oltaim.’—Jut 21, NW.”
2. Dispela buk bai helpim yumi long wanem ol samting long i stap bilong yumi?
2 Samting Yumi Wetim: Ol stiatok bilong Baibel i stiaim yumi olsem wanem long pasin bilong poroman wantaim ol narapela, ol amamas, soim rispek long wok bos, ol pasin bilong yumi yet, marit, toktok, na kastam? Ol stretpela lo i stap long Baibel bai skulim maus bilong bel bilong yumi. (Sng. 19:7, 8) Taim save bilong yumi long tingting bilong Jehova i go bikpela, bai yumi gat bikpela laik long amamasim em, na dispela bai kirapim yumi long bihainim tok bilong em long olgeta samting long i stap bilong yumi.—Snd. 27:11; 1 Jo. 5:3.
3. Bilong wanem yumi mas wok strong long bekim tok long stadi i kamap long wan wan wik?
3 Tingting Strong Long Bekim Tok: Taim yu redim stadi, putim mak long litimapim nem bilong God namel long ol lain manmeri bilong em. (Hi. 13:15) Kongrigesen olgeta bai skelim dispela nupela buk na mekim stadi wantaim. Ol wan wan stadi bilong buk i no longpela, olsem na dispela bai helpim yumi long redim gut stadi na bai yumi no pret long bekim ol askim. Ol sotpela bekim em yumi bin redim gut bai kirapim ol narapela long laikim tru narapela na mekim ol gutpela pasin long ol. Dispela bai mekim stadi i kamap gutpela na yumi kisim gutpela skul long dispela buk. (Hi. 10:24) Na tu, amamas bai i pulap tru long bel bilong yumi taim yumi wan wan i bekim tok na kamapim bilip bilong yumi.
4. Bilong wanem em i bikpela samting long bihainim ol lo bilong Jehova?
4 Long laspela nait bilong Jisas olsem man long graun, Jisas i kamapim olsem em i bikpela samting long bihainim ol lo bilong Jehova bilong i stap insait long laikim bilong God. (Jo. 15:10) Long rot bilong helpim yumi kisim long buk “Pasin Laikim Bilong God,” yumi bai tingting strong moa long bihainim ol stiatok bilong Baibel long olgeta de na long i “stap insait yet long pasin laikim bilong God.”—Ju. 21, NW.