Mekim Tok Olsem Yu Bilipim Tru

TAIM wanpela man i bilipim tru tok em i mekim, ol narapela inap luksave long dispela. Pasin bilong aposel Pol long bilip tru long tok em i mekim i stap ples klia taim em i autim tok. Em i tokim ol man i kamap Kristen long Tesalonaika: “Dispela gutnius mipela i bin bringim i kam long yupela, em i no bin kamap long yupela olsem toktok tasol. Nogat. . . . Yupela i bin lukim klia strongpela bilip bilong mipela.” (1 Te. 1:5) Bilip bilong em i stap ples klia long pasin bilong em long toktok na long sindaun bilong em. Na strongpela bilip i mas stap ples klia long pasin bilong yumi tu long kamapim ol tok i tru bilong Baibel.

Pasin bilong kamapim olsem yumi bilipim tru tok yumi mekim i no wankain olsem yumi autim tingting bilong yumi yet, o yumi strong long tok wanpela samting i tru tasol yumi no save em i tru o nogat, o yumi ting tok bilong yumi tasol i tru. Nogat. Taim man i bilipim tru tok bilong Baibel em i kamapim, em i mekim long pasin i soim olsem em i gat strongpela bilip.​—Hi. 11:1.

Kamapim Pasin Bilong Bilip Tru. Taim yu autim tok, em i bikpela samting long mekim tok long pasin olsem yu bilipim tru dispela tok. Planti taim ol man bai tingim pasin bilong yu long autim tok, na i no long tok tasol yu mekim. Ol inap pilim tingting long bel bilong yu long tok yu mekim. Taim yu bilipim tru tok yu mekim, dispela i gat bikpela strong​—winim toktok tasol​—long kamapim olsem tok yu givim long ol i bikpela samting.

Taim yu mekim tok long ai bilong ol wanbilip, long dispela taim tu yu mas kamapim olsem yu bilipim tru tok yu mekim. Aposel Pita i raitim namba wan pas bilong em bilong “tokim yupela long olgeta pasin God i save mekim bilong soim marimari bilong en long yupela.” Na em i tokim ol brata olsem: “Sanap strong.” (1 Pi. 5:12) Taim aposel Pol i raitim pas long kongrigesen long Rom, em i mekim tok long pasin olsem em i bilipim tru dispela tok, na dispela i bin helpim ol. Em i tok: “Mi bilip tru olsem, i no gat wanpela samting inap pasim laik bilong God i kamap long yumi. Dai o laip, o ol ensel o ol strongpela spirit, o samting nau i stap o samting bai i kamap bihain, o kain kain samting i gat strong, o samting bilong antap o samting bilong daunbilo, o ol arapela samting i stap nabaut, dispela olgeta i no inap pasim laik bilong God, em dispela laik em i givim yumi long Krais Jisas, Bikpela bilong yumi.” (Ro. 8:​38, 39) Na tu, Pol i raitim ol tok bilong kirapim yumi long pilim tru olsem yumi mas autim tok long ol narapela, na pasin bilong em long givim bel tru long mekim dispela wok i kamapim klia olsem em i bilip tru olsem dispela wok em i bikpela samting. (Ap. 20:​18-21; Ro. 10:​9, 13-15) Ol elda Kristen bilong nau i mas i gat wankain pasin taim ol i skulim ol narapela long Tok Bilong God.

Long taim bilong stadi na long ol narapela taim, ol papamama i mas kamapim olsem ol i bilipim tru ol dispela tok bilong God ol i skulim ol pikinini long en. Bilong mekim olsem, ol papamama i mas kisim pasin bilong laikim tru God na ol pasin bilong em long bel bilong ol yet. Long dispela rot ol i ken toktok long ol pikinini long pasin i kamapim olsem ol i bilipim tru ol dispela tok long bel bilong ol, long wanem, “kain tingting i pulap long bel, em maus i save autim.” (Lu. 6:45; Lo 6:​5-7) Taim ol papamama i bihainim dispela kain pasin, dispela bai kirapim ol long i stap olsem gutpela piksa long pasin bilong “bilip tru long Krais.”​—2 Ti. 1:5.

Taim samting bilong traim bilip bilong yu i kamap, em i bikpela samting long mekim tok i soim olsem yu bilipim tru tok yu mekim. Ating wanpela wanskul, tisa, o wanwok bai kirap nogut taim yu no laik insait long amamas bilong wanpela bikpela de. Sapos yu kamapim strong wanpela gutpela bekim long askim bilong em, ating dispela inap helpim em long rispektim tingting bilong yu em Baibel i as bilong en. Olsem wanem sapos wanpela i laik kirapim yu long mekim pasin i no stret, olsem giaman, kisim drak, o pamuk samting? Em i bikpela samting long kamapim klia olsem yu no ken mekim dispela kain pasin na maski ol i mekim wanem bilong grisim yu, yu no inap senisim tingting bilong yu. Taim yu sakim tingting bilong ol yu mas mekim tok i kamapim klia olsem yu bilipim tru dispela tok yu mekim. Taim Josep i sakim meri bilong Potifar, em i tok strong olsem: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” Orait, taim meri i strong yet long slip wantaim em, em i ranawe i go ausait.​—Stt. 39:​9, 12.

Kamapim Olsem Yu Bilip Tru. Ol tok yu kolim inap kamapim olsem yu bilipim tru tok yu mekim. Taim Jisas i laik kamapim wanpela bikpela tok, planti taim em i kirapim tok olsem: “Tru tumas mi tokim yu.” (Jo. 3:​3, 5, 11; 5:​19, 24, 25) Bilong kamapim olsem em i bilip tru, Pol i bin mekim ol kain tok olsem “mi bilip tru olsem,” “Bikpela Jisas i bin mekim tingting bilong mi i klia, na mi save gut olsem,” na “Mi tok tru, mi no giaman.” (Ro. 8:38; 14:14; 1 Ti. 2:7) Taim ol profet i stori long truim bilong ol tok profet, sampela taim Jehova i kirapim ol long mekim kain tok olsem “em bai i kamap.” (Hab. 2:3) Taim yu stori long ol dispela tok profet yu ken kolim tok i wankain. Sapos yu bilip long Jehova, na yu no bilip long yu yet, na yu soim rispek long ol man yu toktok wantaim ol, ol tok yu mekim i soim olsem yu bilip tru long en, na dispela bai kamapim strongpela bilip bilong yu.

Pasin bilong givim bel na tok strong inap kamapim olsem yu bilipim tru tok yu mekim. Pes bilong yu, pasin bilong tromoi han, na meknaisim bodi, olgeta i insait long dispela, tasol olgeta wan wan man i no bihainim wankain pasin stret long dispela samting. Maski yu save sem o yu no save toktok strong, taim yu bilip tru olsem tok yu mekim em i tru na ol narapela i mas harim, pasin bilong yu long bilipim tru tok yu mekim bai stap ples klia.

Tasol yumi no ken giaman olsem yumi bilipim tru tok yumi mekim, yumi mas bilipim tru tru. Sapos ol man i pilim olsem yumi no kamapim tok i stap tru tru long bel, ol bai ting tok yu mekim i no gat as tru bilong en. Olsem na yu mas mekim tok long pasin bilong yu yet. Sapos odiens i bikpela, ating yu mas apim nek na tok strong moa. Tasol tingting bilong yu em bilong kamapim ol tok yu pilim tru na mekim long pasin bilong yu yet.

Ol Samting Bilong Helpim Yu. Tingting bilong yu long tok yu mas kamapim, dispela i save mekim na yu bilipim tru dispela tok o nogat. Olsem na pasin bilong redi gut em i bikpela samting. Sapos yu raitim ol tok yu bin ritim long wanpela buk samting na bihain yu ritim long ol man, dispela bai i no inap. Yu mas save gut long samting yu laik stori long en na kamapim dispela stori long toktok bilong yu yet. Yu mas bilipim tru tok yu mekim na pilim olsem dispela tok inap helpim odiens. Olsem na taim yu redim tok, yu mas tingim i stap bilong ol na ol i holim wanem save pinis long samting yu laik stori long en o ol i gat wanem tingting long en.

Taim tok bilong yumi i ron gut, em i isi moa long ol man i luksave olsem yumi bilipim tru tok yumi mekim. Olsem na redim gut tok na wok strong long stretim stretim pasin bilong yu long givim dispela tok. Redim gut tru ol hap bilong tok yu mas givim bel tru long kamapim bambai yu no gat wok long lukluk oltaim long ol tok yu bin raitim. Tingting tu long beten askim Jehova long blesim wok bilong yu. Long dispela rot ‘God bilong yumi i ken strongim bel bilong yu’ bambai yu ken autim tok long pasin i soim olsem yu bilip tru olsem tok yu mekim i tru na em i bikpela samting.​—1 Te. 2:2.