Taim Yu Yangpela, Wokim Disisen Long Lotuim Jehova
“Holim strong dispela tok yu bin kisim na yu save bilip strong long en.”—2 TI. 3:14.
1. Jehova i ting olsem wanem long wok ol yangpela Witnes bilong em i save mekim?
WOK bilong God em ol yangpela i mekim i bikpela samting tru long Jehova, olsem na em i kamapim wanpela tok profet i stori long ol. Man bilong raitim song i tok: “Taim yu laik pait long ol birua ol manmeri bilong yu bai i go wantaim yu na helpim yu.” Ol yangpela man i olsem “wara i save kamap long gras, na gras i kisim nupela strong.” (Sng. 110:3) Em nau, Jehova i laikim tru ol yangpela i amamas long mekim wok bilong em.
2. Long nau ol man i kirapim ol yangpela long mekim wanem?
2 Olsem wanem long yupela ol yangpela insait long kongrigesen Kristen? Yupela i dediket pinis long Jehova? Planti yangpela i hatwok long wokim disisen long ol bai mekim wok bilong trupela God o nogat. Ol bikman bilong ol bisnis, ol tisa, na sampela taim famili na ol pren i save kirapim ol yangpela long painim gutpela wok na mani samting. Taim ol yangpela i putim ol mak bilong mekim wok bilong God, planti taim ol man bilong graun i tok bilas long ol. Tasol pasin bilong mekim wok bilong God, em i nambawan gutpela rot yu ken bihainim. (Sng. 27:4) Tingim tripela askim: Bilong wanem i stret yu mekim wok bilong God? Olsem wanem yu ken inapim gut dediket bilong yu long God, maski ol narapela i tok wanem o mekim wanem? Wanem ol gutpela wok bilong God yu inap mekim?
I Stret Yu Mekim Wok Bilong Jehova
3. Ol samting Jehova i bin wokim i mas kirapim yumi long mekim wanem?
3 Bilong wanem i stret yu mekim wok bilong trupela God i gat laip? Kamapim Tok Hait 4:11 i kamapim nambawan bikpela as: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” Jehova em i gutpela Man Bilong Wokim olgeta samting. Graun bilong yumi i naispela tru! Ol diwai, plaua, animal, solwara, maunten, na wara kalap—Jehova i bin wokim olgeta dispela samting. Song 104:24 i tok: “Ol samting [God] bin wokim i pulap tru long dispela graun.” Yumi ken amamas tru long Jehova i bin givim yumi bodi na tingting na bai yumi ken amamas long i stap long graun na amamas long ol gutpela samting bilong en! Pasin bilong pilim tru ol gutpela samting em i bin wokim i mas kirapim yumi long mekim wok bilong em.
4, 5. Wanem ol wok bilong Jehova i mekim na Josua i go klostu long em?
4 Tok bilong Josua, em lida bilong lain Israel, i kamapim narapela as na i stret yumi lotuim Jehova. Klostu long taim em i laik i dai, Josua i tokim lain bilong God: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis.” Bilong wanem Josua i tok olsem?—Jos. 23:14.
5 Taim Josua i pikinini yet na i wok long kamap bikpela long Isip, em i kisim save long tok promis bilong Jehova long givim graun long lain Israel. (Stt. 12:7; 50:24, 25; Kis. 3:8) Josua i lukluk i stap taim Jehova i kirap truim dispela promis na i kamapim tenpela bikpela hevi long Isip na i fosim bikhetman Fero long larim lain Israel i go. Josua i wanpela bilong ol man i abrusim bagarap long solwara Retsi, na em i lukim Fero na ami bilong em i dai long dispela solwara. Taim ol i wokabaut long “bikpela ples wesan nating” bilong Sainai, Josua i lukim pasin bilong Jehova long lukautim lain Israel long olgeta samting ol i mas kisim. I no gat wanpela man i dai long wara o kaikai. (Lo 8:3-5, 14-16; Jos. 24:5-7) Taim lain Israel i redi long daunim ol strongpela lain Kenan na kisim Graun Bilong Promis, Josua i lukim olsem wanem God em ol i save lotuim i helpim ol long daunim ol dispela strongpela lain.—Jos. 10:14, 42.
6. Wanem samting inap helpim yu long kisim laik bilong mekim wok bilong God?
6 Josua i save olsem Jehova i bin truim olgeta tok promis bilong Em. Olsem na Josua i tok: “Mi wantaim famili bilong mi, mipela bai i lotu long Bikpela tasol.” (Jos. 24:15) Olsem wanem long yu? Taim yu tingting long ol tok promis trupela God i bin truim pinis na ol tok promis em bai truim long bihain, yu gat laik long mekim wok bilong God olsem Josua i mekim?
7. Bilong wanem em i bikpela samting long kisim baptais long wara?
7 Taim yu tingim tingim ol samting Jehova i bin wokim na ol gutpela tok promis bilong em i save kamap tru, dispela i mas kirapim yu long dediket long Jehova na kisim baptais long wara bilong makim olsem yu dediket pinis. Baptais em i bikpela samting ol man i laik mekim wok bilong God ol i mas kisim. Jisas, em Man i stap gutpela piksa bilong yumi ken bihainim, i kamapim klia dispela samting. Paslain liklik long em i stat long mekim wok bilong em olsem Mesaia, em i go long Jon Bilong Baptais bilong kisim baptais. Bilong wanem Jisas i mekim olsem? Bihain em yet i tok: “Mi no lusim heven na kam daun bilong bihainim laik bilong mi yet. Nogat. Mi kam daun bilong bihainim laik bilong Papa, em i bin salim mi na mi kam.” (Jo. 6:38) Bilong soim olsem em i givim em yet bilong mekim laik bilong Papa bilong em, Jisas i kisim baptais.—Mt. 3:13-17.
8. Bilong wanem Timoti i laik lotuim God? Ating yu mas mekim wanem?
8 Tingim tu Timoti, em wanpela yangpela Kristen em bihain Jehova i bin givim planti gutpela wok long em bilong mekim. Bilong wanem Timoti i wokim disisen bilong lotuim trupela God? Baibel i tok ‘em i bin kisim ol tok na bilip strong long en.’ (2 Ti. 3:14) Sapos yu bin stadi long Baibel na sampela i bin helpim yu long bilip olsem tok bilong en i tru, yu wankain olsem Timoti. Nau yu mas wokim disisen. Gutpela sapos yu toktok wantaim papamama bilong yu long samting yu laik mekim. Papamama na ol elda bilong kongrigesen inap helpim yu long kliagut long ol mak Baibel i kolim em yu mas winim bilong kisim baptais.—Ritim Aposel 8:12.
9. Taim yu kisim baptais, dispela inap mekim wanem long ol narapela man?
9 Sapos yu kisim baptais, dispela em i gutpela rot bilong kirap mekim wok bilong trupela God. Taim yu kisim baptais, yu insait long wanpela longpela resis em prais bilong en em laip i stap gut oltaim, na tu, long nau yu inap stap amamas taim yu mekim laik bilong God. (Hi. 12:2, 3) Bai yu mekim famili bilong yu tu i amamas em ol i insait pinis long dispela resis, na ol pren bilong yu insait long kongrigesen Kristen ol tu bai amamas. Na nambawan bikpela samting, bai yu mekim bel bilong Jehova i amamas. (Ritim Sindaun 23:15.) Tru, ating sampela bai i no kliagut long as na yu laik lotuim Jehova, na ol inap ting yu no mekim gutpela disisen. Ol inap birua long yu. Tasol yu inap winim ol dispela traim.
Taim Ol Narapela i Kamapim Ol Askim o Birua Long Yu
10, 11. (a) Ol man inap givim wanem ol askim long yu long disisen bilong yu long mekim wok bilong God? (b) Pasin bilong Jisas long bekim ol askim long lotu i tru i lainim yu long wanem samting?
10 Disisen bilong yu long mekim wok bilong Jehova inap mekim na ol wanskul, ol neiba, na ol wanblut i tingting planti. Ol inap askim yu long wanem as na yu makim dispela rot na ol inap askim yu long ol bilip bilong yu. Bai yu tok wanem? Yu mas skelim gut tingting na bel bilong yu bambai yu inap kamapim as na yu wokim dispela disisen. Na bilong bekim ol askim long bilip bilong yu, gutpela sapos yu bihainim pasin bilong Jisas long mekim olsem.
11 Taim ol bikman bilong lotu Juda i sutim ol askim long Jisas long kirap bek, em i kamapim tok bilong wanpela skripsa ol i no bin tingim. (Kis. 3:6; Mt. 22:23, 31-33) Taim wanpela saveman bilong lo i askim Jisas long wanem lo i nambawan, Jisas i kamapim sampela ves bilong Baibel i stret long dispela askim. Man hia i amamas long bekim Jisas i givim. (Wkp. 19:18; Lo 6:5; Mk. 12:28-34) Pasin bilong Jisas long yusim ol skripsa na pasin bilong em long toktok i mekim na “ol manmeri i gat narapela narapela tingting long Jisas na ol i bruk tupela lain,” na nau ol birua i no inap mekim nogut long em. (Jo. 7:32-46) Taim yu bekim ol askim ol man i mekim long bilip bilong yu, yusim Baibel na bekim “long tok isi na long gutpela pasin.” (1 Pi. 3:16) Sapos yu no save long bekim bilong wanpela askim, tokaut stret long dispela samting na tokim ol olsem yu bai mekim wok painimaut bilong kisim bekim bilong dispela askim. Bihain, skelim dispela samting na mekim wok long Wastaua Buk na Nius Skripsa Indeks 1991-2000, o sapos yu save long tok Inglis orait lukim, Watch Tower Publications Index o Watchtower Library long CD-ROM. Taim yu redi gut, bai yu inap “bekim gut tok bilong olgeta man.”—Kl. 4:6.
12. Bilong wanem yu no ken larim pasin birua i daunim yu?
12 Ol man bai askim yu long ol bilip na disisen bilong yu, tasol ol narapela samting tu inap painim yu. Dispela inap kamap, long wanem, birua bilong God, Satan, i bosim dispela graun. (Ritim 1 Jon 5:19.) Yu no ken ting olgeta man bai tok amamas long yu o orait long ol samting yu mekim, na tu, sampela inap birua long yu. Sampela inap ‘tok nogut long yu,’ na wok long mekim olsem i go i go. (1 Pi. 4:4) Tasol tingim, i no yu wanpela tasol i karim dispela hevi. Ol man i bin mekim nogut long Jisas Krais. Ol i bin mekim olsem long aposel Pita tu, na em i tok: “Ol brata tru, wanpela traim olsem paia i wok long kamap long yupela. Tasol yupela i no ken kirap nogut na ting em i narakain samting tru i kamap long yupela. Nogat. Long dispela traim yupela i karim pen olsem Krais i bin karim, olsem na yupela i mas amamas.”—1 Pi. 4:12, 13.
13. Bilong wanem ol Kristen i ken amamas taim ol man i mekim nogut long ol?
13 Sapos yu sanap strong taim ol man i birua o mekim nogut long yu, long wanem, yu wanpela Kristen, dispela em i samting bilong amamas. Bilong wanem i olsem? Long wanem, sapos ol man bilong dispela graun i orait long yu, dispela i makim olsem yu bihainim laik bilong Satan, na bilong God, nogat. Jisas i mekim tok lukaut: “Sapos olgeta man i litimapim nem bilong yupela, orait yupela lukaut. Bipo ol tumbuna bilong ol i save mekim wankain pasin long ol giaman profet.” (Lu. 6:26) Pasin birua i makim olsem Satan na ol lain bilong em i kros, long wanem, yu mekim wok bilong Jehova. (Ritim Matyu 5:11, 12.) Na taim “yupela i holim nem bilong Krais, na sapos long dispela ol i tok nogut long yupela,” orait em i samting bilong amamas long en.—1 Pi. 4:14.
14. Wanem gutpela samting inap kamap taim man i stap gut long Jehova maski ol man i birua long em?
14 Taim yu stap gut long Jehova maski ol man i birua long yu, dispela i kamapim fopela gutpela samting. Yu autim tok long nem bilong God na Pikinini bilong em. Pasin bilong yu long sanap strong na karim hevi i strongim ol brata na sista Kristen bilong yu. Sampela man em ol i no save long Jehova na i lukim pasin bilong yu long sanap strong, dispela inap kirapim ol long kisim save long em. (Ritim Filipai 1:12-14.) Na taim yu lukim olsem wanem Jehova i strongim yu long karim ol hevi, pasin bilong yu long laikim em bai kamap strong moa.
Rot i Op Long Yu
15. Wanem rot i op long aposel Pol?
15 Aposel Pol i toktok long wok autim tok bilong em long Efesus olsem: “God i opim rot pinis long mi, na mi gat bikpela wok bilong helpim planti manmeri.” (1 Ko. 16:8, 9) Rot i op bilong em i mekim bikpela wok bilong autim gutnius na kamapim ol disaipel long dispela taun. Pol i redi long mekim dispela wok, olsem na em i helpim planti man long save long Jehova na lotuim Em.
16. Olsem wanem lain remnan i go insait long “dua i op” long 1919?
16 Long 1919, Jisas Krais husat i kisim biknem pinis long heven, em i putim “dua i op i stap” long lain remnan. (KTH 3:8) Ol i go insait long dispela dua, olsem ol i kirap autim gutnius na skulim ol man long ol tok i tru bilong Baibel, na ol i strong tru long mekim olsem winim bilong bipo. Wok bilong ol i bin karim wanem kain kaikai? Long nau, gutnius i bin go long olgeta hap bilong graun, na inap olsem 7 milion manmeri i bilip na wet long kisim laip oltaim long nupela taim God bai kamapim.
17. Yu ken mekim wanem bilong mekim bikpela wok moa?
17 Rot i op i stap yet bilong ol wokman bilong Jehova i ken mekim bikpela wok. Ol lain husat i redi long mekim olsem, ol i kisim amamas taim ol i mekim bikpela wok bilong autim gutnius. Yupela ol yangpela wokman bilong Jehova, yupela i ting olsem wanem long nambawan gutpela wok yupela i gat bilong helpim ol narapela man long “bilip long gutnius”? (Mk. 1:14, 15) Yu bin tingting long mekim wok painia oltaim o painia haptaim? Rot i op long planti bilong yupela i ken mekim wok bilong sanapim ol Haus Kingdom, wok long Betel, na mekim wok misineri. Klostu nau dispela graun bilong Satan bai pinis, olsem na em i bikpela samting moa long insait long ol dispela wok bilong Kingdom. Olsem wanem? Bai yu redi long mekim bikpela wok taim rot i op i stap yet?
‘Traim na Lukim Olsem Bikpela i Gutpela Tru’
18, 19. (a) Wanem samting i helpim Devit na em i gat strongpela laik long lotuim Jehova? (b) Wanem samting i soim olsem Devit i no bel hevi long em i bin mekim wok bilong God?
18 Spirit holi i kirapim man bilong raitim song long singautim ol man long ‘traim na lukim olsem Bikpela i gutpela tru.’ (Sng. 34:8) Taim King Devit bilong Israel bilong bipo i stap wasman bilong ol sipsip, Jehova i lukautim em na ol wel animal i no bagarapim em. God i helpim em taim em i pait wantaim Goliat na i kisim bek em long planti narapela bikpela hevi. (1 Sml. 17:32-51; Sng. 18, tok i go pas) God i gat gutpela-pasin-sori na dispela i kirapim Devit long tok: “God, Bikpela bilong mi, yu bin mekim planti gutpela wok bilong helpim mipela. I no gat man i olsem yu. Yu winim ol tru.”—Sng. 40:5.
19 Devit i laikim tru Jehova na em i laik givim bel na tingting olgeta long litimapim nem bilong Em. (Ritim Song 40:8-10.) Taim ol yia i kam na i go, Devit i no bel hevi liklik long em i bin givim laip bilong em bilong mekim wok bilong trupela God. Pasin bilong givim bel long God em i nambawan gutpela samting Devit i holim—dispela i givim bikpela amamas tru long em. Taim Devit i lapun, em i tok: “Bikpela, mi save bilip long yu tasol. Mi yangpela yet na mi bilip long yu, na mi bilip yet inap long nau. Nau mi lapun pinis na gras bilong mi i waitpela olgeta, tasol God, yu no ken lusim mi.” (Sng. 71:5, 18) Pasin bilong Devit long bilip long Jehova na pas gut wantaim em i kamap strong moa, maski strong bilong skin i pinis.
20. Bilong wanem pasin bilong mekim wok bilong Jehova i nambawan gutpela rot bilong bihainim?
20 Laip bilong Josua, Devit, na Timoti i kamapim klia olsem pasin bilong mekim wok bilong Jehova em i nambawan gutpela rot bilong bihainim. Ol gutpela samting bilong skin em yu inap kisim inap liklik taim long gutpela wok mani, i samting nating taim yu skelim wantaim ol gutpela samting yu inap kisim inap longpela taim long pasin bilong ‘mekim wok bilong God long olgeta laik na tingting na strong bilong yu.’ (Jos. 22:5) Sapos yu no dediket long Jehova long rot bilong beten, askim yu yet, ‘Wanem samting i pasim mi long kamap wanpela Witnes Bilong Jehova?’ Sapos yu wanpela wokman bilong Jehova i baptais pinis, yu laik bai amamas bilong yu i go bikpela? Sapos olsem, orait mekim bikpela wok moa bilong God, na wok long kamap strongpela Kristen. Stadi i kamap bihain long dispela bai stori long olsem wanem yu ken mekim olsem long rot bilong bihainim pasin bilong aposel Pol.
Bai Yu Bekim Olsem Wanem?
• Kamapim tupela as na i stret yumi mekim wok bilong God.
• Wanem samting i helpim Timoti long wokim disisen long lotuim God?
• Bilong wanem yu mas sanap strong taim ol man i birua long yu?
• Rot i op long yu ken mekim wanem ol wok bilong God?
[Piksa long pes 18]
Mekim wok bilong Jehova i nambawan gutpela rot bilong bihainim
[Piksa long pes 19]
Yu inap bekim ol askim ol man i mekim long bilip bilong yu?