Ol Lapun—Ol i Helpim Tru Ol Narapela
“Nau mi lapun pinis na gras bilong mi i waitpela olgeta, tasol God, yu no ken lusim mi. Yu mas i stap wantaim mi na bai mi autim tok bilong bikpela strong bilong yu long ol lain manmeri i kamap bihain.”—SONG 71:18.
1, 2. Ol lapun wokboi bilong God i mas tingim wanem samting? Bai yumi skelim wanem samting?
WANPELA elda Kristen long Wes Afrika i bin go visitim wanpela lapun brata bilong liklik lain na i askim em, “Yu stap orait?” Brata i bekim tok olsem, “Mi inap ran, mi inap kalap strong, na mi inap kalap kwik,” na taim em i tok olsem em i wok long mekim ol samting em i toktok long en. Na bihain em i tok, “Tasol mi no inap flai.” Elda i kliagut long mining bilong dispela tok. ‘Samting mi inap mekim, mi amamas long mekim, tasol samting mi no inap mekim, mi no save mekim.’ Nau dispela elda i winim 80 krismas, na em i amamas long tingim yet pasin bilong dispela brata long mekim tok pani na pasin bilong em long i stap gut long God.
2 Ol gutpela pasin wanpela lapun i kamapim inap kirapim tru tingting bilong narapela man inap longpela taim. Tasol taim man i go lapun, dispela yet i no makim olsem em i kisim savetingting na ol gutpela pasin bilong Krais, nogat. (Saveman 4:13, 14) Baibel i tok: “Waitpela gras bilong man i gutpela samting tru taim em i bihainim stretpela pasin.” (Sindaun 16:31, NW) Olsem wanem? Sapos yu lapun pinis, yu save olsem ol tok na pasin yu bihainim em inap helpim gut ol narapela? Yumi laik skelim sampela eksampel long Baibel i soim olsem wanem ol lapun i bin helpim tru ol narapela.
Bilip i Save Helpim Ol Narapela
3. Pasin bilong Noa long bihainim tru God i bin mekim wanem long ol manmeri i stap laip long nau?
3 Pasin bilong Noa long bilip na sanap strong i bin helpim ol manmeri i kam inap long nau. Noa i gat klostu 600 krismas taim em i bin wokim sip, bungim ol animal, na autim tok long ol neiba bilong em. (Stat 7:6; 2 Pita 2:5) Pasin bilong Noa long pret long God i mekim na em wantaim famili bilong em i winim bikpela Tait Wara na em i kamap tumbuna papa bilong olgeta manmeri i stap laip long nau. Tru, Noa i bin i stap long taim we ol man i save stap laip inap longpela taim. Tasol maski em i go lapun tru, Noa i bin bihainim tru God na em i kisim ol gutpela blesing tru. Olsem wanem dispela i kamap?
4. Olsem wanem pasin bilong Noa long sanap strong i bin helpim ol wokman bilong God long nau?
4 Noa i gat klostu 800 krismas taim Nimrot i kirap wokim taua bilong Babel, na dispela i sakim tok bilong Jehova long ol man i mas “pulapim olgeta hap bilong graun.” (Stat 9:1; 11:1-9) Noa i no insait long pasin bikhet bilong Nimrot. Olsem na yumi ken ting olsem tok ples bilong em i no bin senis taim God i paulim tok ples bilong ol bikhetman. Pasin bilong Noa long bilip na sanap strong taim em i lapun pinis na long laip olgeta bilong em, em i stap olsem gutpela piksa olgeta wokman bilong God i ken bihainim maski ol i gat hamas krismas.—Hibru 11:7.
Ol Lapun i Save Strongim Famili
5, 6. (a) Taim Abraham i gat 75 krismas Jehova i tokim em long mekim wanem? (b) Abraham i mekim wanem long tok God i givim em?
5 Stori bilong ol bilipman i bin kamap bihain long Noa i soim olsem pasin bilong ol lapun inap strongim bilip bilong famili bilong ol. Abraham i gat 75 krismas samting taim God i tokim em: “Yu lusim graun bilong yu na ol brata bilong yu, na ol lain bilong papa bilong yu, na yu go long wanpela graun bai mi soim yu long en. Bai mi mekim ol lain tumbuna bilong yu i kamap bikpela lain tru. Na bai mi mekim gut long yu na mekim yu i gat biknem tru.”—Stat 12:1, 2.
6 Bai yu ting wanem sapos God i tokim yu long lusim graun bilong yu, ol pren, ol famili, ples yu bin go bikpela long en, na yu mas i go sindaun long wanpela hap yu no save liklik long en? God i tokim Abraham long mekim olsem. Abraham “i go olsem Bikpela i bin tokim em,” na long olgeta taim bihain em i sindaun long ol haus sel olsem tripman bilong narapela ples long graun bilong Kenan. (Stat 12:4; Hibru 11:8, 9) Tru, Jehova i bin tokim Abraham olsem lain tumbuna bilong em bai i kamap “bikpela lain tru,” tasol Abraham i dai taim lain bilong em i no kamap planti yet. Meri bilong em, Sara, i bin karim wanpela pikinini tasol, em Aisak. Na dispela i bin kamap bihain long em i raun long graun bilong promis inap 25 yia pinis. (Stat 21:2, 5) Tasol Abraham i no les na go bek long taun em i lusim pinis. Em i gutpela piksa tru long pasin bilong bilip na sanap strong na no ken les!
7. Pasin bilong Abraham long sanap strong i bin mekim wanem long Aisak? Dispela i mekim wanem long olgeta lain pipel?
7 Pasin bilong Abraham long sanap strong i mekim bikpela samting long pikinini bilong em Aisak, husat i bin stap long Kenan olsem man bilong narapela ples long laip olgeta bilong em—inap olsem 180 yia. Aisak i bilip long tok promis bilong God na long dispela as em i bin sanap strong. Lapun papamama i bin kirapim em long kisim dispela bilip, na bihain tok Jehova yet i mekim long em i bin strongim dispela bilip. (Stat 26:2-5) Pasin bilong Aisak long sanap strong em i bikpela samting insait long truim bilong promis Jehova i bin mekim, olsem long rot bilong wanpela tumbuna “pikinini” bilong Abraham olgeta lain pipel bai kisim blesing. Planti handet yia bihain, Jisas Krais, nambawan “pikinini” bilong dispela lain tumbuna, i opim rot bilong olgeta manmeri i bilip long em ol i ken kamap wanbel wantaim God na kisim laip oltaim.— Galesia 3:16; Jon 3:16.
8. Olsem wanem Jekop i kamapim strongpela bilip? Dispela i bin mekim wanem?
8 Bihain, Aisak i bin helpim pikinini bilong em Jekop long kisim strongpela bilip i lukautim em i go inap long em i lapun. Jekop i gat 97 krismas taim em i pait wantaim wanpela ensel long nait olgeta na bai em inap kisim blesing. (Stat 32:24-28) Paslain long em i dai, taim em i gat 147 krismas, Jekop i strongim em yet na givim blesing long olgeta wan wan 12-pela pikinini man bilong em. (Stat 47:28) Tok profet em i autim i stap long Stat 49:1-28 i bin kamap tru, na i wok yet long kamap tru.
9. Yumi ken tok wanem long pasin bilong ol lapun wokboi bilong Jehova long strongim famili bilong ol?
9 Olsem na i klia tru, ol lapun wokboi bilong God em ol i bihainim tru God, ol inap strongim famili bilong ol. Ol tok bilong Baibel wantaim ol gutpela tok bilong lapun na pasin bilong lapun long sanap strong, ol dispela samting inap helpim tru ol yangpela long kisim strongpela bilip. (Sindaun 22:6) Ol lapun i no ken lusim tingting olsem ol i gat bikpela strong bilong helpim tru famili bilong ol.
Strongim Ol Wanlotu
10. Josep i tokim lain bilong em long ol i mas mekim wanem long “ol bun bilong en”? Dispela i bin mekim wanem long ol?
10 Ol lapun inap strongim tu ol wanbilip. Josep, pikinini bilong Jekop, i bin mekim wanpela samting i kamapim bilip bilong em taim em i lapun na dispela i bin mekim bikpela samting long planti milion manmeri em ol i lotu tru long God na ol i kamap bihain long em. Em i gat 110 krismas taim em i “tokim ol long wanem samting ol i mas mekim long ol bun bilong en,” olsem, taim lain Israel i lusim Isip, ol i mas karim ol bun bilong em i go wantaim ol. (Hibru 11:22; Stat 50:25) Long ol yia bihain long i dai bilong Josep taim ol Israel i wok kalabus, dispela tok i bin strongim bilip bilong ol olsem taim bilong God long kisim bek ol bai kamap tru.
11. Josua i pas wantaim lapun Moses na dispela i bin mekim wanem long em?
11 Moses em wanpela bilong ol man i bin kisim strong long bilip Josep i bin autim. Taim Moses i gat 80 krismas em i kisim gutpela wok bilong karim ol bun bilong Josep i go taim ol i lusim Isip. (Kisim Bek 13:19) Klostu long dispela taim em i bungim Josua, husat i yangpela tru long Moses. Inap 40 yia Josua i stap olsem wokman bilong Moses. (Namba 11:28) Em i bin go wantaim Moses taim em i go antap long maunten Sainai na em i wet i stap taim Moses i kam daun long maunten wantaim tupela hap ston God i bin raitim Lo long en. (Kisim Bek 24:12-18; 32:15-17) Lapun Moses i stap olsem wanpela hul wara i pulap long gutpela tok na savetingting em Josua inap kisim!
12. Olsem wanem Josua i bin strongim lain Israel i go inap long em i dai?
12 Bihain long Moses i dai, Josua i wok long laip olgeta bilong em long strongim lain Israel. Hetman 2:7 i tok: “Taim Josua i stap yet ol Israel i lotu long Bikpela. Na bihain long Josua i dai ol i lotu yet long Bikpela. Ol i mekim olsem inap ol lida i bin lukim ol samting Bikpela i bin mekim bilong helpim ol Israel ol tu i dai.” Tasol taim Josua na ol dispela lida i dai pinis, lain Israel i stat long holim tupela tingting long lotu. Sampela taim ol i bihainim lotu i tru na sampela taim lotu giaman. Ol i mekim olsem inap 300 yia, i go inap long taim bilong profet Samuel.
Samuel “i Mekim Stretpela Pasin”
13. Samuel i bin mekim wanem bilong “mekim stretpela pasin”?
13 Baibel i no stori long Samuel i gat hamas krismas taim em i dai, tasol ol samting Buk Namba 1 Samuel i stori long en i bin kamap insait long 102 yia, na Samuel i bin lukim klostu olgeta samting buk i stori long en. Hibru 11:32, 33 i tok, ol stretpela hetman na ol profet i bin “mekim stretpela pasin.” Yes, Samuel i bin strongim ol man i stap long taim bilong em long abrusim o givim baksait long pasin nogut. (1 Samuel 7:2-4) Em i mekim olsem wanem? Long laip olgeta Samuel i bihainim tru Jehova. (1 Samuel 12:2-5) Em i no pret long givim strongpela tok long wanpela man, maski dispela man em i wanpela king. (1 Samuel 15:16-29) Na tu, Samuel i “lapun pinis na gras bilong [em] i waitpela,” na em i makim gutpela pasin bilong bihainim, em pasin bilong beten askim God long helpim ol arapela man. Em i tok “mi gat wok bilong beten oltaim long God i helpim yupela [ol Israel]. Sapos mi lusim beten bai mi mekim sin long Bikpela.”—1 Samuel 12:2, 23.
14, 15. Olsem wanem ol lapun bilong nau i ken bihainim pasin bilong Samuel long beten?
14 Dispela stori i kamapim klia wanpela rot we ol lapun inap mekim wanpela gutpela samting bilong strongim ol arapela wokboi bilong Jehova. Maski ol i sik o i gat narapela samting i pasim ol, ol lapun i ken beten askim God long helpim ol arapela. Yupela ol lapun, olsem wanem? Yupela i save tingim tru olsem ol beten bilong yupela inap helpim tru kongrigesen? Yupela i bilip long blut bilong Krais na long dispela as Jehova i orait long yupela. Na tu, i gat ol samting i bin ‘traim bilip bilong yupela na yupela bin sanap strong na karim hevi,’ olsem na bilip bilong yupela i strong. (Jems 1:3; 1 Pita 1:7) No ken lusim tingting: “Sapos stretpela man i prea, orait prea bilong en i gat bikpela strong, na em inap tru long helpim ol arapela.”—Jems 5:16.
15 Ol brata i mas kisim helpim long ol prea yupela i save mekim bilong sapotim wok bilong Kingdom Bilong Jehova. Sampela brata bilong yumi ol i kalabus i stap bikos ol i no insait long woa samting. Sampela i kisim bagarap long rot bilong ol bikpela win samting, ol woa, na ol pait insait long kantri ol i sindaun long en. I gat ol traim na pasin birua i painim sampela bratasista insait long ol kongrigesen bilong yumi. (Matyu 10:35, 36) Na tu, ol prea yu save mekim long olgeta taim i save helpim ol lain i go pas long mekim wok autim tok na lukautim ol kongrigesen. (Efesus 6:18, 19; Kolosi 4:2, 3) Em i gutpela tru taim yu kolim nem bilong ol wanbilip taim yu mekim beten, olsem Epafras i bin mekim!—Kolosi 4:12.
Skulim Ol Manmeri i Kamap Bihain
16, 17. Song 71:18 i bin tok profet long wanem samting? Olsem wanem dispela samting i kamap tru?
16 Lain “arapela sipsip” bai kisim laip oltaim long graun, na ol i bin kisim bikpela skul taim ol i poroman wantaim ol manmeri bilong “liklik lain sipsip,” em ol bai kisim laip long heven. (Luk 12:32; Jon 10:16) Tok profet long dispela samting i stap long Song 71:18, i tok: “Nau mi lapun pinis na gras bilong mi i waitpela olgeta, tasol God, yu no ken lusim mi. Yu mas i stap wantaim mi na bai mi autim tok bilong bikpela strong bilong yu long ol lain manmeri i kamap bihain.” Paslain long ol liklik lain i lusim graun na kisim biknem wantaim Jisas Krais, ol i wok strong long skulim ol poroman bilong ol, em lain arapela sipsip, long holim bikpela wok moa.
17 Yumi ken tok, stori em Song 71:18 i kamapim long skulim “ol lain manmeri i kamap bihain,” i stret long ol arapela sipsip husat i bin kisim skul long ol Kristen God i bin makim long holi spirit. Jehova i bin givim wok long ol lapun long autim tok long em long ol manmeri husat i wok long kisim lotu i tru long nau. (Joel 1:2, 3) Ol arapela sipsip i pilim olsem ol samting ol liklik lain i bin lainim ol long en em i wanpela gutpela presen tru, na ol i laik givim dispela skul bilong Baibel long ol narapela husat i laik lotuim Jehova.—KTH 7:9, 10.
18, 19. (a) Ol lapun wokboi bilong Jehova i ken stori long wanem ol bikpela samting? (b) Ol lapun Kristen i ken bilip tru long wanem samting?
18 Ol lapun wokboi bilong Jehova, bilong liklik lain sipsip na bilong ol arapela sipsip, ol i bin lukim long ai bilong ol yet sampela bikpela samting na ol inap stori long dispela. I gat wan wan i stap yet husat i bin lukim piksa “Photo-Drama of Creation” taim em i bin kamap nupela. Sampela i bin save gut long ol brata husat i bin go pas long oganaisesen taim ol i kalabus long 1918. Sampela i bin wok long redio stesin bilong Watchtower, em WBBR. Planti i stap yet husat i ken stori long ol samting i bin kamap taim ol Witnes Bilong Jehova i mas kot long ol bikpela kot bilong kisim fridom bilong mekim lotu. Sampela narapela i bin sambai long tok i tru taim ol i sindaun long ol kantri we wanpela dikteta i bosim gavman. Na tu, ol lapun inap stori long olsem wanem isi isi save bilong yumi long tok i tru i bin kamap klia moa. Baibel i kirapim yumi long larim save bilong ol lapun i skulim yumi.—Lo 32:7.
19 Baibel i kirapim ol lapun Kristen long i stap gutpela piksa ol arapela inap bihainim. (Taitus 2:2-4) Ating long nau yu no lukim ol gutpela samting em pasin bilong yu long beten, givim ol gutpela tok, na sanap strong i mekim long ol arapela. Noa, Abraham, Josep, Moses, na sampela moa ol i no inap save olsem pasin bilong ol long bihainim tru God bai strongim tru ol man i kamap bihain long ol. Tasol pasin bilong ol long bilip na bihainim stretpela pasin, dispela i bin mekim bikpela samting long ol arapela i bin kamap bihain long ol; na pasin bilong yupela tu inap mekim bikpela samting.
20. Ol manmeri i holimpas bilip bilong ol i go inap long pinis bai kisim wanem ol blesing?
20 Maski yu winim taim bilong “bikpela hevi tru” o yu kisim laip gen long rot bilong kirap bek, bai yu amamas long kisim “laip em i laip tru”! (Matyu 24:21; 1 Timoti 6:19) Tingim Taim Bilong Wan Tausen Yia Bilong Krais i Stap King taim Jehova bai mekim na ol lapun i kamap yangpela gen. Long nau isi isi bodi bilong yumi i wok long bagarap long olgeta de, tasol long nupela taim bai bodi bilong yumi i wok long kamap gutpela moa long olgeta de—bai yumi strong moa, ai i sap moa, yau i harim gut moa, na skin i kamap gutpela moa! (Jop 33:25; Aisaia 35:5, 6) Olgeta manmeri i stap long nupela graun God i kamapim bai i stap yangpela long olgeta taim bihain, long wanem, ol bai i stap oltaim oltaim. (Aisaia 65:22) Olsem na yumi olgeta i laik holimpas bilip bilong yumi i go inap long pinis na wok yet long givim bel olgeta long mekim wok bilong Jehova. Yumi ken bilip tru olsem Jehova bai truim olgeta promis bilong em na ol samting em i mekim bai winim tru samting yumi tingting long kisim.—Song 37:4; 145:16.
Bai Yu Bekim Olsem Wanem?
• Olsem wanem pasin bilong lapun Noa long sanap strong i bin helpim olgeta manmeri bilong graun?
• Bilip bilong ol bilipman i bin mekim wanem long ol tumbuna pikinini bilong ol?
• Taim Josep, Moses, Josua, na Samuel i lapun pinis, olsem wanem ol i bin strongim ol wanlotu?
• Ol lapun i ken mekim wanem bilong i stap gutpela piksa ol arapela i ken bihainim?
[Piksa long pes 26]
Pasin bilong Abraham long sanap strong i bin strongim tru Aisak
[Piksa long pes 28]
Gutpela tok Moses i givim long Josua i bin strongim em
[Piksa long pes 29]
Ol prea yu mekim bilong helpim ol arapela i save karim gutpela kaikai
[Piksa long pes 30]
Taim ol yangpela i putim yau long tok bilong ol lapun dispela i save helpim ol