Kamapim Tok i Stret

SAPOS Kristen i mekim wanpela tok i no tru, ating i gat wanem as na em i mekim olsem? Ating em i kolim tasol sampela tok em i harim narapela i mekim na em i no skelim olsem dispela tok i tru o nogat. O ating em i kolim sampela tok i no stret, long wanem, em i ritim kranki sampela tok. Taim yumi skelim gut olsem tok yumi mekim long ol liklik samting i stret na tru, ol man i harim tok bilong yumi bai bilipim yumi taim yumi kamapim sampela tok i bikpela moa.

Long Autim Tok. Planti ol i save i gat planti samting ol i mas skul yet long en, olsem na ol i pret liklik long kirap mekim wok autim tok. Tasol kwiktaim ol i kisim save olsem ol inap mekim gutpela wok autim tok, maski ol i save tasol long ol as tok bilong tok i tru. Ol inap mekim olsem wanem? Namba wan samting em ol i mas redi gut.

Paslain long autim tok, save gut long samting yu laik stori long en. Traim tingim ol askim ol man inap givim long yu. Painim ol gutpela bekim long Baibel. Dispela bai helpim yu long stap isi na bekim stret ol askim. Bai yu mekim wanpela Baibel-stadi? Skelim gut ol tok yu bai mekim stadi long en. Yu mas save olsem wanem Baibel i as bilong bekim bilong ol askim i stap long buk.

Olsem wanem sapos man bilong haus o wanpela wanwok i kamapim wanpela askim yu no redi long bekim? Sapos yu no save gut long bekim, no ken kolim nating sampela tok. “Stretpela man i save tingting gut pastaim, na bihain em i bekim tok long arapela man.” (Snd. 15:28) Ating yu inap painim sampela helpim long buk Toktok Gut o long Sampela Tok Bilong Baibel Bilong Toktok Wantaim Man Long En. Sapos ol dispela helpim i no stap wantaim yu, orait tokim man olsem yu bai painim sampela save long dispela askim na kam bek bihain. Sapos man i laik tru long save long bekim bilong dispela askim, em bai orait long wetim yu i kam bek na bekim stret dispela askim. Na ating em bai pilim tru pasin daun bilong yu.

Taim yu autim tok wantaim ol pablisa i save gut long mekim dispela wok, dispela i ken helpim yu long lain long mekim gutpela wok long Baibel. Lukim ol skripsa ol i kamapim na olsem wanem ol i stori long en. Long pasin daun kisim ol tok ol i givim long yu bilong helpim yu o stretim pasin bilong yu long autim tok. Disaipel Apolos, em man bilong givim bel long autim tok, i bin kisim helpim long ol narapela. Luk i tok Apolos em i “man bilong mekim gutpela toktok,” na “em i save tumas long buk bilong God,” na “em i save tokim ol stret long ol samting Jisas i bin mekim.” Tasol i gat sampela samting em i no save long en. Taim Prisila na Akwila i luksave long dispela, orait “tupela i kisim em i go na tokim em long Rot bilong God, bai em i ken klia gut long en.”​—Ap. 18:​24-28.

“Holim Strong Dispela Tok Tru.” Ol tok yumi mekim long ol miting i mas soim olsem yumi pilim tru wok bilong kongrigesen long i stap olsem “strongpela pos i karim tok tru.” (1 Ti. 3:15) Bilong holim strong tok i tru, em i bikpela samting yumi save gut long mining bilong ol skripsa yumi tingting long kamapim. Yumi mas tingim ol skripsa i stap klostu long ol na wanem wok bilong ol dispela skripsa.

Ol tok yu mekim long miting bilong kongrigesen, ating ol man bai kolim gen ol dispela tok ol i harim. Tru, “planti taim . . . yumi save popaia.” (Jems 3:2) Tasol taim yu wok long kisim pasin bilong kolim ol tok i stret, dispela bai helpim yu. Planti brata insait long Skul Tiokratik bai kamap elda bihain. Ol brata i holim dispela wok ol i mas “bekim planti samting moa.” (Lu. 12:48) Sapos elda i no tingting gut na em i givim sampela tok i no stret long sampela insait long kongrigesen, na taim ol i bihainim dispela tok bikpela hevi i painim ol, orait ating God i no ken amamas long dispela elda. (Mt. 12:​36, 37) Olsem na brata i winim mak bilong holim wok elda i mas i gat nem olsem man i save “holim strong dispela tok tru . . . na em bai inap long skulim ol manmeri long olgeta tok tru ol i mas bilip long en.”​—Ta. 1:9.

Was gut. Ol tok yu kamapim i mas stret wantaim ‘ol gutpela tok’​—em olgeta tok i tru Baibel i kamapim. (2 Ti. 1:13) Yu no ken pret long dispela. Ating yu no ritim yet Baibel olgeta. Wok yet long mekim olsem. Tasol taim yu wok long ritim Baibel, yu ken lukim olsem wanem ol dispela tok mipela bai kolim nau inap helpim yu long skelim ol tok yu laik mekim wok long en taim yu skulim man.

Pastaim askim yu yet: ‘Tok mi laik kamapim i stret wantaim ol save mi bin kisim pinis long Baibel? Em bai pulim ol man i kam long Jehova, o em i litimapim save bilong dispela graun na kirapim ol man long bihainim dispela save?’ Jisas i tok: “Tok bilong yu i tru olgeta.” (Jo. 17:17; Lo 13:​1-5; 1 Ko. 1:​19-21) Orait, nau mekim gutpela wok long ol tul bilong stadi em wokboi i gat gutpela tingting i bin givim long yumi. Ol dispela ‘tul’ bai helpim yu long kisim gut insait bilong ol skripsa na bihainim ol dispela tok long pasin i gat stretpela tingting long en. Sapos as bilong ol tok yu mekim em ‘ol gutpela tok,’ na yu larim tok bilong dispela lain wokboi Jehova i mekim wok long en i stiaim yu taim yu kamapim insait bilong ol skripsa na olsem wanem ol i ken bihainim, orait ol tok bilong yu bai i stret tasol.

Skelim Ol Tok, i Stret o Nogat. Stori bilong ol samting i kamap nau tasol, na tok sampela man i bin mekim, na ol ekspiriens, ol inap helpim yu taim yu laik kamapim klia sampela samting na olsem wanem ol man i ken bihainim. Olsem wanem yu ken save olsem dispela tok i stret? Wanpela rot em long kisim ol tok long ol nius yu inap bilipim. Skelim gut olsem ol dispela tok i stret long nau o nogat. Namba bilong ol samting i save senis; ol saientis i save painim ol nupela samting tasol bihain ol i painim samting i nupela moa; taim ol man i kisim sampela save moa long ol samting i bin kamap bipo na long ol tok ples bilong bipo, ol i mas senisim sampela tingting bilong ol. Was gut sapos yu tingting long kamapim sampela tok yu kisim long ol niuspepa, TV, redio, E-mail, o Intenet. Sindaun 14:15 i tok olsem: “Ol man i gat liklik save tasol, ol i save bilipim olgeta kain tok.” Askim yu yet: ‘Hap mi kisim dispela tok long en i gat nem long mekim tok tru tasol? Mi inap painim sampela tok long narapela hap bilong truim dispela tok?’ Sapos yu gat tupela tingting olsem samting i tru o nogat, orait no ken kamapim.

Skelim gut olsem yu inap bilipim nius samting yu bin kisim dispela tok long en o nogat, na tingting gut long olsem wanem yu bai kamapim ol dispela tok. Taim yu kamapim tok wanpela man i bin mekim o ol namba samting, ol i mas stret wantaim ol narapela tok i stap long dispela hap yu bin kisim dispela tok o ol namba long en. Taim yu laik mekim strongpela tok was gut, no ken senisim dispela tok “sampela man” na tok “klostu olgeta man,” o senisim tok “planti man” na tok “olgeta man,” na senisim tok “sampela taim” na tok “olgeta taim.” Taim yu mekim olsem, ol man bai i gat tupela tingting olsem ol inap bilipim tok bilong yu o nogat.

Taim yu mekim tok i stret long olgeta taim, ol man bai tingim yu olsem man i save kamapim tok i tru tasol. Dispela i save givim biknem long yumi lain Witnes Bilong Jehova. Na bikpela samting moa, em i save givim biknem long “Jehova, God bilong mekim tok tru tasol.”​—Sng. 31:​5, NW.