Nupela Taim God Bai Kamapim i Gat Bel Isi—Yu Inap i Stap Long En

GOD i bin putim Adam na Iv long gaden Iden. Maski ol i sakim tok na ol i dai, God i bin stretim rot na bai ol pikinini bilong tupela, na yumi tu long nau, inap i stap oltaim long Paradais. Baibel i tok promis olsem: “Ol stretpela man bai i kisim graun God i givim ol, na bai ol i stap oltaim long en.”—Song 37:29.

Baibel i stori long “nupela skai” na “nupela graun.” (Aisaia 65:17; 2 Pita 3:13) “Skai” i stap nau i makim ol gavman bilong ol man, tasol Jisas Krais na lain i mekim wok king wantaim em long heven, ol i dispela “nupela skai.” Em bai gutpela tru taim dispela nupela skai, em stretpela gavman bilong God bilong kamapim gutaim, i bosim olgeta hap bilong graun!

Orait, “nupela graun” i makim wanem samting?— Nupela graun i makim ol gutpela man i laikim Jehova. Taim Baibel i stori long “nupela graun,” sampela taim dispela i makim ol man i stap long graun, i no graun tru tru. (1 Stori 16:31; Song 69:34; 97:1) Olsem na ol man i insait long nupela graun ol bai stap hia long dispela graun.

Ol man nogut i stap nau ol bai no stap long nupela graun. Tingim, Bikpela Tait long taim bilong Noa i bin pinisim ol man nogut. Na olsem yumi lainim pinis, ol man nogut i stap nau ol bai bagarap long Armagedon. Orait nau yumi ken stori long ol man bai i gat wanem kain sindaun long nupela taim God bai kamapim bihain long Armagedon.

Olsem wanem? Yu laik i stap oltaim long Paradais long nupela taim God bai kamapim, em bel isi bai stap long en?— I no gat wanpela dokta inap mekim yumi i stap oltaim. I no gat wanpela marasin inap mekim na yumi no i dai. I gat wanpela rot tasol bilong yumi inap i stap oltaim, em yumi mas i go klostu long God. Na Bikpela Tisa i tokim yumi long rot bilong mekim olsem.

Yumi ken kisim Baibel bilong yumi na opim long Jon sapta 17, ves 3. Long dispela ves yumi lukim ol tok bilong Bikpela Tisa: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”

Olsem na Jisas i tok yumi mas mekim wanem bilong i stap oltaim?— Pastaim, yumi mas kisim save long Papa bilong yumi long heven, em Jehova, na kisim save tu long Pikinini bilong em husat i bin givim laip bilong em bilong helpim yumi. Dispela i makim olsem yumi mas stadi long Baibel. Dispela buk, Kisim Skul Long Bikpela Tisa, i helpim yumi long mekim olsem.

Tasol olsem wanem pasin bilong kisim save long Jehova bai helpim yumi long i stap oltaim?— Wankain olsem yumi mas kisim kaikai long olgeta de, yumi mas kisim save long Jehova long olgeta de. Baibel i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.”—Matyu 4:4.

Yumi mas kisim save tu long Jisas Krais, long wanem, God i bin salim Pikinini bilong em i kam bilong tekewe sin bilong yumi. Baibel i tok: “I no gat narapela man i inap kisim bek yumi.” Na Baibel i tok tu olsem: “Man i bilip long Pikinini, em i gat laip i stap gut oltaim oltaim.” (Aposel 4:12; Jon 3:36) Olsem wanem? Yumi bilip tru long Jisas na save olsem long rot bilong em tasol yumi inap i stap oltaim?— Sapos yumi bilip olsem, orait long olgeta de yumi bai wok long kisim skul long Bikpela Tisa, na yumi bai mekim ol samting em i tokim yumi long mekim.

Wanpela gutpela rot bilong kisim skul long Bikpela Tisa em long rot bilong ritim dispela buk planti taim na lukluk na tingting gut long olgeta piksa i stap long en. Traim long bekim ol askim i stap wantaim ol piksa. Na tu, ritim dispela buk wantaim mama o papa bilong yu. Sapos papamama i no stap, ritim wantaim ol arapela man i bikpela pinis o wantaim ol arapela pikinini. Em bai gutpela tru sapos yu helpim ol arapela long kisim skul long Bikpela Tisa long ol samting ol i mas mekim bilong i stap oltaim long nupela taim God bai kamapim, a?—

Baibel i tokim yumi olsem: “Dispela graun bai i pinis.” Tasol Baibel i stori tu long olsem wanem yumi inap i stap oltaim long nupela taim God bai kamapim. Em i tok: “Man i bihainim tok bilong God, em bai i stap oltaim.” (1 Jon 2:17) Olsem wanem yumi inap i stap oltaim long nupela taim God bai kamapim?— Yes, long rot bilong kisim save long Jehova na gutpela Pikinini bilong em, Jisas. Tasol yumi mas bihainim tu ol tok yumi lainim. Gutpela sapos pasin bilong yu long stadi long dispela buk i helpim yu long mekim olsem.