Mekim Wok Long Ol Liklik Nius Long Autim Gutnius
1. Lain bilong God i bin mekim wok long ol liklik nius olsem wanem?
1 Long bipo yet lain bilong Jehova i save mekim wok long ol liklik nius bilong autim gutnius. Long 1880, C. T. Russell na ol wanwok bilong em i kirap long wokim ol liklik nius, Bible Students’ Tracts, na ol i givim long lain i save ritim nius Watch Tower bilong tilim long ol man. Dispela lain i tingim ol liklik nius i bikpela samting, olsem na long 1884 taim C. T. Russell i rejistaim koporesen, em wok bilong en i bilong mekim wok bilong Kingdom i go bikpela na i no save kisim winmani, em i putim dispela tok “tract” tu long nem bilong koporesen, em Zion’s Watch Tower Tract Society, long nau ol i kolim Watch Tower Bible and Tract Society of Pennsylvania. I kam inap long 1918, ol Sumatin Bilong Baibel i bin tilim winim 300 milion liklik nius. Ol liklik nius i stap yet olsem gutpela rot bilong mekim wok autim tok.
2. Bilong wanem ol liklik nius i gutpela bilong mekim wok long en?
2 As na Ol Liklik Nius i Gutpela Bilong Mekim Wok: Ol i gat ol gutpela piksa na i save pulim ai bilong ol man. Ol tok bilong en i sotpela, na i gat ol gutpela tok bilong kirapim tingting na helpim man. Planti taim ating ol man bilong haus i no save laikim magasin na buk, na ol i laikim ol liklik nius. Em i isi long tilim ol liklik nius, olsem na ol nupela pablisa na ol pikinini tu inap tilim. Na tu, ol i liklik na isi long yumi karim.
3. Stori long ekspiriens bilong yu yet o long paragraf we i kamapim olsem ol liklik nius inap helpim tru man.
3 Planti man i kisim save namba 1 taim long tok i tru long rot bilong wanpela liklik nius. Wanpela meri long Haiti i lukim wanpela liklik nius bilong yumi long rot. Em i kisim na ritim, na em i tok, “Mi painim pinis tok i tru!” Bihain, em i go long Haus Kingdom, em i kirap stadi long Baibel na bihain kisim baptais, em i mekim olgeta dispela samting, long wanem, Tok Bilong God i stap long ol dispela liklik nius i gat strong.
4. Long mun bilong tilim ol liklik nius, yumi laik wok strong long mekim wanem?
4 Autim Tok Long Ol Haus: Ol liklik nius i gutpela tul bilong mekim wok autim tok, olsem na sampela taim em bai stap olsem samting bilong tilim long mun, kirap long Novemba. Yumi laik wok strong long yusim ol liklik nius long kirapim tok wantaim man, na yumi no ken givim tasol long ol man. Sapos long namba 1 taim yumi bungim man na em i amamas long harim tok o taim yumi mekim gobek, yumi ken soim pasin bilong mekim Baibel stadi long buk Baibel i Tok o buklet samting yumi save stadi wantaim man long en. Olsem wanem bai yumi tilim liklik nius long ol haus? Ol wan wan liklik nius i narapela narapela, olsem na yumi mas save gut long liklik nius yumi laik tilim.
5. Olsem wanem bai yumi tilim ol liklik nius taim yumi autim tok long ol haus?
5 Yumi mas senisim tok bilong yumi na bai i stret long ol man long teritori na long liklik nius yumi tilim. Bilong kirapim tok, givim wanpela liklik nius long man bilong haus. Ating naispela piksa long pes 1 bai kirapim laik bilong em. O yumi ken soim em ol narapela liklik nius na em yet i ken makim wanem nius em i laikim. Taim yumi autim tok long ol teritori we ol man i save pret long opim dua, yumi ken holim liklik nius long ples klia na bai man i ken lukim karamap bilong en, o yumi ken askim em long yumi laik putim liklik nius aninit long dua na em i ken kamapim tingting bilong em long en. Sapos het tok bilong liklik nius em i wanpela askim, orait yumi ken tokim em long kamapim tingting bilong em long dispela askim. O yumi ken kamapim wanpela askim we inap kirapim laik bilong em na kirapim em long toktok. Bihain ritim wanpela hap bilong liklik nius wantaim man bilong haus, taim yu kamap long hap i gat ol askim, malolo liklik na tokim em long kamapim tingting bilong em. Yu ken ritim long Baibel ol skripsa i as bilong dispela tok. Taim yumi stori pinis, yumi mas pasim tok long go bek lukim em. Sapos kongrigesen i save lusim ol liklik nius long ol haus i no gat man, ating yumi ken putim wanpela liklik nius long hap we ol man i no ken lukim.
6. Olsem wanem bai yumi tilim ol liklik nius taim yumi autim tok long rot?
6 Autim Tok Long Rot: Olsem wanem? Yu save tilim ol liklik nius taim yu autim tok long rot? Sampela man i save hariap na ol i no inap sanap bilong toktok wantaim yumi. Ating i hatwok long save wanem tok ol bai laikim. Olsem na yumi no ken givim nupela magasin long ol, long wanem, yumi no save ol bai ritim o nogat. I gutpela long givim ol liklik nius long ol. Ating piksa long karamap na sotpela tok long en inap kirapim laik bilong man long ritim maski em i gat liklik taim tasol. Tasol sapos ol i no hariap, orait yumi inap stori wantaim ol long sampela hap moa insait long liklik nius.
7. Stori long olsem wanem sampela i bin yusim ol liklik nius bilong autim tok long kain kain taim na ples.
7 Autim Tok Long Kain Kain Taim na Ples: Em i no hatwok long yusim liklik nius long autim tok long kain kain taim na ples. Wanpela brata i save putim sampela long poket bilong em taim em i lusim haus. Taim em i bungim wanpela man, olsem man i wok long stua samting, em i tokim man em i laik givim wanpela samting long em i ken ritim na em i givim man wanpela liklik nius. Taim tupela marit i go long New York City bilong lukluk raun, ol i save olsem ol bai bungim ol man bilong ol kain kain kantri. Olsem na ol i kisim liklik buklet Nations na sampela liklik nius long ol narapela narapela tokples. Taim ol i harim ol man i tokples taim ol i salim ol samting arere long rot, o ol man husat i sindaun klostu long ol long pak, o long haus kaikai i tokples, tupela i tokim ol, ol i laik givim ol wanpela liklik nius bilong tokples bilong ol.
8. Long wanem rot ol liklik nius i kain olsem sid?
8 ‘Planim Kaikai’: Ol liklik nius i kain olsem kaikai o sid. Fama i tromoi ol sid long olgeta hap long gaden, long wanem, em i no save wanem sid bai gro na kamap bikpela. Saveman 11:6 i tok: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut, o tupela lain wantaim bai i kamap gut.” Olsem na yumi mas wok yet long “givim gutpela tingting” long ol man long rot bilong dispela gutpela tul bilong autim tok.—Snd. 15:7.
[Rait long pes 3]
Ol liklik nius i gutpela tul bilong mekim wok autim tok, olsem na sampela taim em bai stap olsem samting bilong tilim long mun, kirap long Novemba