Mekim Long Pasin i Olsem Yu Pilim Tru Long Bel

SAMTING man i pilim long bel em i bikpela samting long i stap bilong ol man. Taim wanpela man i kamapim bel bilong em, dispela i save kamapim olsem em i wanem kain man tru, na em i ting olsem wanem long ol man na long ol samting i save kamap. Planti man i save haitim tingting i stap long bel bilong ol, long wanem, sampela samting nogut i bin painim ol, o em i pasin bilong ples long mekim olsem. Tasol Jehova i laik kirapim yumi long kisim ol gutpela pasin na bihain kamapim ol dispela pasin long ol narapela.​—Ro. 12:10; 1 Te. 2:​7, 8.

Taim yumi toktok, ol tok yumi mekim inap kamapim stret tingting i stap long bel. Tasol sapos nek bilong yumi i no kamapim olsem yumi pilim tru dispela tok, ol man bai i gat tupela tingting​—long bel yu pilim tru dispela tok o nogat. Tasol sapos yumi mekim toktok long nek i kamapim olsem yumi pilim tru dispela tok, orait toktok bilong yumi bai gutpela tru na ating em inap kirapim bel bilong ol man i harim.

Kamapim Tok Long Pasin i Olsem Yu Pilim Tru Long Bel. Taim yumi tingim ol man, planti taim yumi save pilim amamas. Olsem na taim yumi stori long ol gutpela pasin bilong Jehova na yumi tok amamas long dispela, pasin bilong yumi long mekim toktok i mas makim olsem yumi pilim tru gutpela pasin bilong em. (Ais. 63:​7-9) Na taim yumi toktok wantaim ol narapela manmeri, pasin bilong yumi long toktok i mas kamapim olsem yumi laik mekim gut long ol.

Wanpela lepraman i kam long Jisas na i askim em strong long oraitim sik bilong em. Tingim krai bilong nek bilong Jisas taim em i tok: “Mi laik. Yu kamap klin.” (Mk. 1:​40, 41) Tingim tu dispela samting: Wanpela meri i karim blut oltaim inap 12-pela yia i kam klostu long baksait bilong Jisas na em i putim han long arere bilong longpela klos bilong Jisas. Taim em i save olsem em i no inap hait, em i kam brukim skru klostu long Jisas na em i guria i stap. Na long ai bilong olgeta manmeri em i tokaut long as na em i bin putim han long Jisas na olsem wanem em i kamap orait gen. Orait tingim pasin bilong Jisas taim em i tok olsem: “Pikinini, yu bilip long mi, olsem na yu kamap orait gen. Yu go, na bel bilong yu i ken i stap isi.” (Lu. 8:42b-48) I kam inap long nau yumi save pilim tru pasin Jisas i bin mekim taim em i oraitim dispela man na meri.

Olsem Jisas, taim yumi sori long ol narapela na yumi laik tru long helpim ol, pasin bilong yumi long toktok bai kamapim dispela. Kain tok olsem, yumi pilim tru tru. Taim yumi mekim tok i olsem yumi pilim tru long bel, dispela bai mekim na ol man inap amamas long harim. Taim yumi autim tok, planti taim yumi gat rot long bihainim dispela pasin bilong toktok, olsem long taim yumi laik toktok gut wantaim ol man, strongim ol, kirapim ol, na sori long ol.

Sapos yu tingim tru ol narapela, soim olsem long pes bilong yu. Taim yu kamapim olsem yu tingim ol man yu toktok long ol, dispela i save pulim ol i kam long yu olsem paia i save pulim man taim skin i kol. Sapos pes bilong yu i no kamapim dispela pasin, ol man i harim bai i no inap bilip olsem tru tru yu tingim ol. Pasin bilong tingim tru narapela i no olsem wanpela laplap yu pasim na rausim long laik bilong yu yet, nogat​—em i mas stap olsem pasin tru bilong yu.

Nek bilong yu i mas kamapim pasin bilong tingim man. Sapos nek bilong yu i krai olsem kotkot, em bai hatwok long yu long kamapim pasin bilong tingim man long toktok bilong yu. Tasol sapos yu traim traim i go, yu inap mekim. Taim yu kolim ol tok, sapos yu sotim krai bilong en na kolim hariap, dispela i save givim tingting long ol man olsem yu no tingim tru ol. Lain long pulim krai bilong tok, no ken sotim o kolim hariap. Dispela bai helpim toktok bilong yu long kamap gutpela.

Tasol samting em i bikpela moa, em wanem samting yu tingting long en. Sapos yu tingting tru long ol man yu toktok long ol na yu laik tru long kamapim sampela tok bilong helpim ol, orait pasin bilong yu long toktok bai kamapim dispela laik.

Taim yu givim bel long mekim tok dispela inap kirapim ol man, tasol tu yu mas kamapim pasin sori i stap long bel. Yumi no ken kirapim tingting bilong man tasol; yumi mas kirapim bel bilong man tu.

Kamapim Ol Narapela Samting Yu Pilim Long Bel. Man i karim bikpela hevi em inap kamapim ol samting em i pilim long bel olsem tingting planti, pret, na bel hevi. Pasin bilong amamas i mas i stap strong long ol samting yumi mekim na yumi mas kamapim dispela amamas taim yumi toktok wantaim ol man. Tasol i gat sampela samting yumi pilim long bel na yumi no laik kamapim. Ol i no stret wantaim pasin Kristen. (Ef. 4:​31, 32; Fl. 4:4) Yumi inap kamapim kain kain samting yumi pilim long bel long rot bilong ol tok yumi mekim, olsem krai bilong nek, kolim strong o kolim isi isi, pes bilong yumi, na pasin bilong wokim han.

Baibel i save stori long olgeta samting man i pilim long bel. Sampela taim em i save kolim tasol ol dispela pasin. Sampela taim em i stori long ol samting i bin kamap o em i kolim ol tok sampela man i mekim na dispela i kamapim ol samting man i pilim long bel. Taim yu ritim kain tok long maus, yu na ol man i harim bai pilim moa yet dispela tok sapos yu ritim long kain nek i kamapim ol dispela samting yu pilim long bel. Bilong mekim olsem, yu mas kisim tingting olsem yu dispela man i bin mekim dispela tok. Tasol was gut​—tok yu mekim i no wanpela pilai, olsem na nogut yu bilasim tumas tok bilong yu. Kirapim ol man long ting olsem ol yet i stap na lukim na harim ol samting i kamap insait long stori bilong Baibel.

I Stret Wantaim Tok Yu Kamapim. Olsem pasin bilong givim bel yu kamapim taim yu mekim tok, samting yu toktok long en bai makim pasin yu bai bihainim insait long tok, olsem yu pilim tru long bel o yu bihainim narapela kain pasin olsem.

Opim Baibel long Matyu 11:​28-30, na ritim. Orait nau ritim strongpela tok Jisas i mekim bilong kotim ol saveman bilong lo wantaim ol Farisi, i stap long Matyu sapta 23. Yumi save, taim em i autim dispela strongpela tok long ol em i kolim long strongpela nek na mekim save long ol.

Yu ting yu mas bihainim wanem kain pasin taim yu ritim kain stori i stap long Stat sapta 44 i stori long Juda i krai long Josep long larim em i kisim ples bilong Benjamin? Yu inap pilim bel hevi ol i kamapim long ves 13, na long ves 16 yu ken pilim tingting bilong Juda long as na dispela samting nogut i kamap long ol, na yu ken pilim bel sori bilong Josep yet olsem Stat 45:1 i kamapim.

Olsem na maski yumi ritim tok o mekim toktok, bilong mekim gut yumi no ken tingim tasol ol tok na tingting yumi laik kamapim, nogat, yumi mas mekim tok long pasin i kamapim samting yumi pilim long bel na i stret wantaim dispela tok.