Kam Bek Bilong Krais

Stori: Taim Krais i no lusim yet graun, em i tok promis long em bai kam bek. Sampela bikpela samting bilong Kingdom bilong God i insait long dispela tok promis. Tasol yumi mas save, “i kam” i narapela long “i stap.” Olsem: Taim wanpela man i kam (em i kamap long wanpela ples o em i kam bek long en), em i kam long wanpela de na aua stret. Tasol bihain ating em bai i stap inap planti yia long dispela ples. Hap tok Grik (erʹkho·mai) yumi tanim olsem “i kam,” em Baibel i kolim bilong makim tu wanpela taim stret Krais bai lukluk i kam bilong kirapim wanpela bikpela wok bilong em long taim em i kam bek pinis na i stap. Em wok bilong givim strafe bilong Jehova long ol man nogut long bikpela de bilong God i Gat Olgeta Strong.

Ol samting i mas kamap taim Krais i kam bek pinis na i stap, ol i kamap insait long liklik hap taim o bikpela hap taim?

Mt 24:​37-39: “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap [“i stap,” NW; tok Grik, pa·rou·siʹa]. Taim bikpela tait i no kamap yet, ol i wok long kaikai na dring, na ol man i maritim ol meri, i go inap long taim Noa i go insait long sip. . . . [Na] bikpela tait i kamap na i pinisim olgeta dispela manmeri. Orait wankain pasin tasol bai i kamap long taim Pikinini Bilong Man i kamap.” (Ol dispela samting i bin kamap long “taim bilong Noa” i kamap insait long bikpela hap taim. Jisas i tok, taim em i kam bek na i stap, wankain pasin tasol bai i kamap.)

Long Matyu 24:​37, ol i tanim hap tok Grik pa·rou·siʹa olsem “i kamap.” Insait tru bilong en i olsem “i stap wantaim.” Yumi ken save gut long dispela sapos yumi lukim tok bilong Pol long Filipai 2:​12. Em i kolim dispela hap tok Grik na em i stori long taim em i stap wantaim (pa·rou·siʹa) ol brata, na em i no i stap wantaim (a·pou·siʹa) ol. Tasol Matyu 24:30 i stori long Krais bai “i stap antap long ol klaut na i kam wantaim bikpela strong na bikpela lait bilong en” bilong kilim i dai ol man nogut long Armagedon. Long dispela ves Matyu i kolim hap tok Grik er·khoʹme·non. Sampela man bilong tanim tok, ol i tanim dispela tupela tok wantaim olsem ‘i kam.’ Tasol ol man i laik tanim gut tok, ol i tanim narapela narapela.

Krais bai kam long pasin ol man inap lukim o nogat?

Jo 14:19: “Liklik taim na bai ol manmeri bilong graun i no lukim mi moa. Tasol yupela [ol gutpela aposel] bai i lukim mi. Mi stap laip, olsem na yupela tu bai i stap laip.” (Jisas i bin tok promis long ol aposel long em bai kam bek na kisim ol i go i stap wantaim em long heven. Bai ol inap lukim em, long wanem, ol tu bai kamap spirit olsem em. Tasol ol manmeri long graun i no inap lukim em moa. Skelim wantaim 1 Timoti 6:16.)

Ap 13:34: “God i kirapim [Jisas] long matmat, na em i no inap i go bek long matmat moa na i sting.” (Skin bilong ol man i save bagarap. Olsem na 1 Korin 15:​42, 44 i tok, “bodi bilong graun” i save “bagarap.” Jisas i no ken kisim gen kain bodi olsem.)

Jo 6:51: “Mi dispela bret i gat laip na i lusim heven na i kam daun. Sapos wanpela man i kaikai dispela bret, em bai i gat laip i stap oltaim. Na dispela bret mi bai givim long em, em i bodi bilong mi. Mi givim bai ol manmeri bilong graun ol i ken kisim laip.” (Em i givim pinis na em i no ken kisim bek gen. Sapos em i kisim bek dispela nambawan gutpela skin bilong em bilong graun, bai i no gat ofa bilong helpim ol man long kisim laip.)

Lukim tu “Go Antap,” pes 111, 112.

Olsem wanem Jisas i kam bek “long wankain pasin” olsem em i go long heven?

Ap 1:​9-11: “Taim ol [aposel] i lukluk i stap, [Jisas] i go antap. Na wanpela klaut i haitim em, na ol i no lukim em moa. Em i go pinis, na ol i lukluk yet long skai, na wantu tupela man i sanap wantaim ol. Tupela i gat waitpela klos. Tupela i tok olsem, ‘ . . . Dispela Jisas, nau God i kisim em na em i lusim yupela na i go antap long heven, em bai i kam bek gen long wankain pasin olsem nau yupela i lukim em i go long heven.’ ” (Em bai kam “long wankain pasin,” i no long wankain bodi. Em i go long wanem kain pasin? Olsem Ac 1 ves 9 i tok, ol disaipel tasol i lukim em i go. Ol narapela manmeri i no save wanem samting i kamap. Na bai i wankain tasol long taim em i kam bek.)

Olsem wanem em bai kam “long ol klaut” na “olgeta man bai i lukim em long ai bilong ol yet”?

KTH 1:7: “Lukim. Em i stap namel long ol klaut na i kam, na olgeta man bai i lukim em long ai bilong ol yet. Olgeta man i bin sutim em long spia samting, ol tu bai i lukim em. Na olgeta lain manmeri bilong graun bai i tingting long em, na ol bai i krai sori moa yet.” (Na Matyu 24:30; Mak 13:26; Luk 21:⁠27)

“Ol klaut” i makim wanem samting? Dispela i makim samting ai bilong man i no inap lukim. Taim wanpela balus i stap antap namel long ol klaut, ol manmeri long graun inap harim krai bilong ensin, tasol ol i no inap lukim balus, a? Jehova i tokim Moses: “Bai mi stap long bikpela klaut na bai mi kam long yu.” Moses i no lukim God, tasol dispela klaut i makim olsem God i stap wantaim em. (Kis 19:9; lukim tu Wok Pris 16:2; Namba 11:25.) Sapos Krais i kamap ples klia long skai, i no inap “olgeta man bai i lukim em long ai bilong ol yet.” Sapos em i kamap ples klia long hap bilong Ostrelia, bai ol man long Yurop na Afrika na Not na Sentral na Saut Amerika i no inap lukim em, a?

Olsem wanem “olgeta man bai i lukim em long ai bilong ol yet”? Bai ol i lukim ol samting i kamap long graun na maski ol i no inap lukim em, bai ol i save em i stap. Long Jon 9:41 tu, Baibel i tok long ai bilong ol man, tasol i no tok long ai tru: “Jisas i tokim ol [Farisi] olsem, ‘Sapos ai bilong yupela i pas, orait yupela bai i no gat asua bilong sin. Tasol yupela i save tok, “Ai bilong mipela i save lukluk.” Olsem na sin bilong yupela i stap yet.’ ” (Skelim wantaim Rom 1:20.) Taim Krais i kam bek pinis, sampela man i bilip long dispela; ol i luksave long ol samting i makim olsem em i kam bek pinis. Sampela i no bilip, tasol taim Krais i kirap mekim wok bilong God long bagarapim ol man nogut, bai ol i lukim dispela samting i kamapim strong bilong em, na bai ol i save, ol man i no as bilong dispela bagarap; em samting bilong heven. Bai ol i save, long wanem, ol i bin harim toksave bilong en pastaim. Ol i lukim dispela samting i painim ol na bai ol i “krai sori moa yet.”

Husat dispela “olgeta man i bin sutim em”? Ol soldia bilong Rom i sutim Jisas long spia na em i dai. Tasol ol dispela soldia i dai pinis longtaim bipo. Olsem na dispela tok i mas makim ol manmeri i mekim wankain pasin nogut long ol disaipel tru bilong Krais nau long “taim bilong las de.”​—⁠Mt 25:​40, 45.

Sapos yumi no inap lukim man, tru yumi ken tok, em “i kam” o em “i stap wantaim” yumi?

Aposel Pol i tok, long bodi em i stap longwe long kongrigesen bilong Korin, tasol em i stap wantaim ol long spirit.​—⁠1 Ko 5:⁠3.

Jehova i tok, em bai “go daun” na paulim tok ples bilong ol man i wokim taua bilong Babel. (Stt 11:⁠7) Na em i tok tu long “kam daun” bilong kisim bek ol Israel long wok kalabus long Isip. Na em i tokim Moses: “Mi bai go wantaim yu” bilong bringim ol Israel i go long Graun Bilong Promis. (Kis 3:8; 33:14) Tasol i no gat wanpela man i bin lukim God, a?​—⁠Kis 33:20; Jo 1:⁠18.

Wanem sampela samting Baibel i tok i mas kamap taim Krais i kam bek pinis na i stap?

Dan 7:​13, 14: “Ol i kisim em [Krais Jisas] i go long dispela Man bilong bipo bipo yet. Dispela Man . . . i mekim em i kamap king na i givim em strong na biknem. Na . . . wok king bilong en bai i no inap pinis. Na olgeta manmeri bilong olgeta kantri na olgeta lain na olgeta tok ples bai i stap aninit long en.”

1 Te 4:​15, 16: “Taim Bikpela i kam bek, yumi manmeri i gat laip na i stap yet, yumi bai i no inap i go paslain long ol manmeri i dai pinis. Nogat. God bai i tok strong, na namba wan ensel bai i singaut, na biugel bilong God bai i krai. Na Bikpela bai i lusim heven na i kam daun. Na ol man i bilip long Jisas na i dai pinis, ol bai i kirap bek pastaim.” (Olsem na ol manmeri bilong i stap king wantaim Krais, God bai kirapim bek ol bilong i stap wantaim Krais long heven​—⁠hap lain ol i dai bipo, bai ol i kirap bek pastaim, na bihain hap lain ol i dai taim Bikpela i kam bek pinis, ol bai kirap bek.)

Mt 25:​31-33: “Taim Pikinini Bilong Man i kam bek olsem king wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais.”

2 Te 1:​7-9: “Em bai i tekewe dispela hevi nau yupela i karim, na givim malolo long yupela na long mipela wantaim. God bai i mekim olsem long taim Bikpela Jisas . . . i kamap ples klia. Em bai i kam long bikpela paia tru na em bai i mekim save long ol man i no laik save long God na i no bihainim gutnius bilong Jisas, Bikpela bilong yumi. Ol dispela man bai i . . . bagarap i stap oltaim oltaim.”

Lu 23:​42, 43, Nupela Testamen na Ol Sam, bilong 1978: “Em [man nogut i hangamap klostu long Jisas] i tok, ‘Jisas, bihain bai yu kamap long ples bilong yu, orait yu tingting long mi.’ Na Jisas i tokim em, ‘ . . . Bai yu stap wantaim mi long Paradais.’ ” (Taim Jisas i bosim graun, bai olgeta hap bilong graun i kamap gutpela ples paradais; ol man i dai pinis na God i tingim ol, bai ol i kirap bek na bai ol inap i stap gutpela olgeta long graun inap oltaim oltaim.)

Lukim tu het-tok “Taim Bilong Las De,” pes 422-426.