Askim
◼ Ol pikinini i mas kisim save long wanem ol tok na bai ol inap kamap strong long tok i tru?
Ol papamama Kristen i mas mekim bikpela long ol pikinini na “trenim ol olsem Jehova i makim, na putim tingting bilong em long bel bilong ol.” (Efe. 6:4) Olsem: Bilong helpim ol pikinini, papamama i save skelim teks bilong de wantaim ol long olgeta moning. Long taim bilong famili lotu na long ol narapela taim tu, ol famili i ken lukim DVD wantaim na stori long en, toktok long sampela atikol long Askim Bilong Ol Yangpela, ektim wanpela stori bilong Baibel, o mekim traim sampela soim samting. Tasol bilong helpim ol pikinini long “wok yet long kamap strong,” ol i mas kisim skul long ol strongpela tok i tru bilong Baibel.—Hib. 6:1.
Tingim ol tok yumi save skulim ol man yumi bungim ol long teritori. Long namba 1 taim o taim yumi go bek long lukim em, yumi save wok strong long kirapim Baibel stadi long buk Tru Tru Baibel i Tok Wanem? Taim yumi pinisim stadi long dispela buk, yumi kirap stadi long buk “Stap Insait Yet Long Pasin Laikim Bilong God.” Bilong wanem yumi save mekim olsem? Long buk Baibel i Tok, ol sumatin i kisim save long ol bikpela tok bilong Baibel. Na buk “Pasin Laikim Bilong God” i skulim ol long olsem wanem ol inap bihainim ol stiatok bilong Baibel long laip bilong ol long olgeta de. Taim ol nupela sumatin i stadi long dispela tupela buk, dispela i helpim ol long “holimpas” Krais na “sanap strong long bilip.” (Kol. 2:6, 7) Yu ting ol dispela buk inap helpim tu ol pikinini bilong yumi? Ol tu i mas kisim save long pe bilong baim bek man, Kingdom, na man i dai pinis em i stap olsem wanem. Ol pikinini tu i mas save long wai na God i larim pen na hevi i stap, na olsem wanem ol inap luksave olsem yumi stap long taim bilong las de. Ol i mas save olsem ol Witnes Bilong Jehova i gat tok i tru. Na tu, ol i mas kliagut long ol stiatok bilong Baibel na trenim “save bilong ol planti taim long skelim ol samting.” (Hib. 5:14) Papamama i mas skelim krismas na save bilong ol wan wan pikinini long kliagut long ol tok. Tasol sampela pikinini ol inap long kisim save long ol strongpela tok i tru bilong Baibel maski ol i liklik yet.—Luk 2:42, 46, 47.
Long jw.org bai i gat hap bilong mekim stadi em bilong helpim ol papamama, na ol tok ol i putim long dispela hap ol i kisim long buk Baibel i Tok. Ol famili i ken lukim dispela long Web-sait bilong yumi aninit long BIBLE TEACHINGS> TEENAGERS. Bihain, bai ol i redim sampela tok moa bilong mekim stadi em ol bai kisim long buk “Pasin Laikim Bilong God.” Tasol yupela i ken yusim tu dispela tupela buk em yupela i holim pinis. Papamama i ken skelim sapos ol bai yusim dispela buk long haptaim bilong Famili Lotu, o taim ol i mekim stadi bilong wanpela bilong ol pikinini, o taim ol i skulim pikinini long mekim stadi bilong em yet.