Helpim Ol Man Long Harim Tok Bilong God
1. Long “ Kingdom Bilong God i Mas i Kam!” Kibung Distrik, ol i bin tokaut long wanem 2-pela buklet? Olsem wanem dispela 2-pela buklet i gutpela?
1 Long “Kingdom Bilong God i Mas Kam!” Kibung Distrik long las yia, ol i tokaut long 2-pela nupela buklet, em Harim Tok Bilong God na Stap Oltaim na narapela i no gat planti rait long en, em Harim Tok Bilong God. Dispela 2-pela buklet i no gat planti tok olsem na em i isi long tanim hariap ol tok bilong en. Taim ol i tokaut long dispela buklet Harim Tok Bilong God na Stap Oltaim long tok Inglis, ol i tok orait long tanim dispela buklet long 431 tokples.
2. Dispela 2-pela buklet bai helpim husat?
2 Dispela 2-pela buklet bai helpim husat? Skelim ol dispela samting i save kamap long olgeta hap.
• Wanpela pablisa i toktok wantaim man bilong haus—ating long namba 1 taim em i bungim man o long taim em i mekim gobek—na em i luksave olsem man bilong haus i no save long rit o em i no save rit gut.
• Wanpela pablisa i autim tok long ol manmeri em yumi no tanim planti buk na nius long tokples bilong ol o i no gat buk na nius long tokples bilong ol. O planti long teritori i no save long rit long tokples bilong ol yet.
• Wanpela pablisa i mekim wok long tokples sain bilong autim tok long ol yaupas long teritori bilong em.
• Wanpela papa o mama i laik skulim liklik pikinini bilong em long tok i tru taim pikinini i no save yet long rit.
3. I gat wanem ol tok i stap long wan wan pes bilong Buklet Harim Tok Bilong God?
3 Wok Bilong Dispela Tupela Buklet: Buklet Harim Tok Bilong God i no gat planti tok. I gat wanpela sentens na skripsa i stap daunbilo long olgeta wan wan pes i kamapim bikpela tok bilong piksa. Bilong wanem i olsem? Piksaim long tingting olsem wanpela i givim yu wanpela buklet em ol i raitim long tokples yu no save long en. Maski em i gat planti naispela piksa, yu ting yu bai amamas long ritim? Ating nogat. Olsem tasol, ol man i no save long rit, ol bai i no amamas long lukim wanpela buklet i gat ol tok long en. Olsem na long olgeta wan wan pes bilong dispela buklet, i gat ol piksa em ol i tingting gut na redim, na i gat ol mak bilong stiaim man long bihainim stori i stap long wanpela piksa i go long narapela piksa.
4. Wanem wok bilong dispela tupela buklet?
4 Buklet Harim Tok Bilong God na Stap Oltaim i gat ol wankain piksa olsem i stap long buklet Harim Tok Bilong God. Ol i wokim dispela buklet bilong helpim ol man i no save gut long rit na ol lain i wok long lain long rit. Pablisa i ken mekim wok long buklet Harim Tok Bilong God na Stap Oltaim taim em i stadi wantaim wanpela long buklet Harim Tok Bilong God. Long olgeta wan wan pes i gat wanpela askim na i gat bekim bilong en long wankain pes. I gat ol piksa long olgeta wan wan pes na liklik stori na ol skripsa ol i no raitim tok bilong en. Daunbilo long sampela bilong ol pes i gat wanpela blok we i gat sampela tok moa na ol skripsa em ol i no raitim tok bilong en, na pablisa i ken mekim wok long en inap long skel bilong sumatin.
5. Long wanem taim yu ken tilim dispela tupela buklet? Olsem wanem yu ken mekim olsem?
5 Pasin Bilong Mekim Wok Long Dispela Tupela Buklet: Taim yu lukim olsem i gutpela long tilim wanpela bilong dispela tupela buklet, orait yu ken mekim olsem maski em i no mun bilong tilim dispela tupela buklet. (Lukim blok “Rot Bilong Tilim Dispela Tupela Buklet.”) Taim yu mekim gobek, yu ken tokim man bilong haus olsem yu laik soim em wanpela buklet na yu ken givim long em.
6. Olsem wanem yumi ken yusim dispela tupela buklet long mekim stadi?
6 Buklet Harim Tok Bilong God i no gat ol askim, olsem na pasin bilong mekim stadi long en bai i no wankain olsem yu save mekim long rot bilong buk Baibel i Tok. Long olgeta kantri ol man i save amamas long harim stori. Olsem na mekim wok long ol piksa i stap long dispela buklet na kamapim ol stori i stap long Baibel. Givim bel na stori gut long ol piksa. Askim sumatin long stori long piksa. Ritim skripsa i stap daunbilo long pes na stori gut wantaim em. Givim ol askim na bai em i ken kamapim tingting bilong em na helpim em long kliagut long ol samting em i lainim. Sapos yupela i stadi long buklet Harim Tok Bilong God na Stap Oltaim, orait yupela i ken ritim ol tok i stap long ol pes na ol skripsa taim yupela i stori long ol piksa.
7. Olsem wanem yumi ken helpim Baibel sumatin long kamap strong?
7 Helpim Sumatin Long Kamap Strong: Ating stadi yupela i mekim long wanpela bilong dispela tupela buklet inap kirapim laik bilong sumatin long lain long rit na bai em yet i ken kisim save long Jehova. (Mat. 5:3; Jon 17:3) Olsem na sapos yupela i stadi long buklet Harim Tok Bilong God, na yu luksave olsem sumatin i redi long kisim save moa, orait yu ken tokim em olsem yu bai lainim em long rit, na yupela i ken stadi long buklet Harim Tok Bilong God na Stap Oltaim. Taim yu stadi pinis long wanpela bilong dispela tupela buklet, dispela i no makim olsem em i redi long kisim baptais. Nau yu mas kirap stadi wantaim em long buk Baibel i Tok o narapela buk we inap helpim em long kisim save moa long Baibel.
8. Bilong wanem yu amamas long dispela tupela nupela buklet?
8 Ol man i mas harim tok bilong King bilong heven na graun sapos ol i laik i stap oltaim. (Ais. 55:3) Na Jehova i laik bai “olgeta kain man,” na ol man i no save long rit, ol tu i mas kisim save long pasin bilong harim tok bilong em. (1 Tim. 2:3, 4) Yumi amamas tru long kisim dispela tupela nupela buklet em yumi ken yusim bilong skulim ol man long pasin bilong harim tok bilong God!
[Blok long pes 3]
Rot Bilong Tilim Dispela Tupela Buklet
Soim man bilong haus pes 2-3 bilong buklet na tok: “Yu laik stap long dispela kain ples? [Larim man i bekim tok.] Baibel i tok promis olsem [o dispela buk holi i tok promis olsem] klostu nau God bai stretim bek dispela graun na mekim em i kamap naispela ples we i gat bel isi i stap long en na i no gat man i stap rabis o i sik. Lukim samting yumi mas mekim bilong i stap long kain ples olsem. [Ritim Aisaia 55:3, em i stap long pes 3.] Dispela ves i tokim yumi long ‘kam’ long God na ‘harim’ tok bilong em. Tasol olsem wanem yumi ken harim tok bilong God?” Opim buklet i go long pes 4-5 na stori long bekim bilong dispela askim. Sapos em i no gat taim, orait lusim buklet wantaim em na stretim rot bilong i go bek na stori long bekim bilong dispela askim.