God i Mekim Wanem?

“Bikpela, bilong wanem yu sanap i stap longwe long mi? Bilong wanem yu save hait long mi long taim nogut?”​​—SONG 10:1.

TAIM yumi ritim het tok bilong ol niuspepa, dispela i kamapim klia tru olsem yumi stap long “taim nogut.” Na taim wanpela bikpela hevi i painim yumi yet​—olsem pasin raskol, eksiden, o wanpela long famili i dai​—ating bai yumi askim olsem, God i save lukim ol dispela samting? Em i save tingim yumi? Em i stap tru?

Tasol olsem wanem? Sampela taim yu bin tingting olsem, ating yumi gat sampela tingting kranki long ol samting yumi ting God i mas mekim? Yumi ken tok piksa olsem: Tingim wanpela liklik pikinini husat i bel hevi, long wanem, papa bilong em i go long wok. Pikinini i misim papa na i laik bai papa i mas kam bek long haus. Pikinini i pilim olsem papa i lusim em pinis. Long de olgeta em i wok long askim: “Papa i stap we?”

Yumi inap luksave long tingting kranki bilong pikinini. Long dispela taim stret, papa i wok mani bilong em i ken lukautim famili. Na olsem tasol, nogut tingting bilong yumi tu i kranki taim yumi singaut olsem, “God i stap we”?

Olsem: Ating sampela i laik bai namba wan wok bilong God, em bilong bagarapim kwik ol man i bin mekim rong. Na sampela i ting God i gat wok tasol long givim ol gutpela presen long ol man​—olsem gutpela wok mani, wanpela poroman marit, o helpim man long winim bikpela mani long laki tiket.

Dispela tupela tingting i makim olsem, sapos God i no kirap wantu tasol long stretim wanpela rong, o em i no givim yumi ol samting yumi bin askim, orait em i no tingim ol hevi bilong yumi na em i no luksave long ol samting yumi nidim. Tasol dispela kain tingting i no stret liklik! Nau long dispela taim stret, God Jehova i mekim ol samting bilong lukautim olgeta manmeri bilong graun long ol samting ol i mas kisim, tasol em i no mekim long pasin em planti man i askim em long mekim.

Orait God i mekim wanem samting tru? Bilong bekim dispela askim, yumi mas tingting i go bek long taim bilong namba wan man na meri, taim pasin bilong ol man long pas gut wantaim God i bagarap​—tasol i no olsem i no gat rot bilong stretim.

Ol Samting Nogut Sin i Kamapim

Tingim wanpela haus i bin bagarap i stap inap planti yia. Rup i bruk, hinsis bilong ol dua i bagarap, na ol raskol i bagarapim nabaut insait bilong haus. Bipo em i gutpela haus, tasol nau nogat. Planti samting long haus i bagarap na em bai bikpela wok long stretim; ol bai no inap stretim insait long sotpela taim tasol.

Orait tingim ol samting nogut i bin painim ol man inap olsem 6,000 yia i go pinis, taim wanpela spirit yumi no inap lukim, em Satan, i bin pulim Adam na Iv long bikhet long God. Paslain long dispela samting, namba wan man na meri i bin gutpela olgeta, no gat sik, na ol inap i stap oltaim oltaim wantaim ol lain tumbuna pikinini bilong ol bai kamap bihain. (Stat 1:28) Tasol taim tupela i mekim sin, i olsem Adam na Iv i bagarapim olgeta manmeri bilong graun em ol bai kamap bihain.

No ken ting olsem ol samting i bin kamap long dispela pasin bikhet bilong tupela, em i liklik samting. Baibel i tok: “Wanpela man [Adam] i bin mekim sin, na long dispela pasin sin i kamap long graun. Na sin i bringim dai i kam.” (Rom 5:12) Sin i no kamapim dai tasol​—em i nogutim tu pasin bilong yumi long pas gut wantaim Man Bilong Wokim yumi, na em i nogutim skin, tingting, na bel bilong yumi. Olsem na yumi wankain olsem dispela haus i bagarap. Stretpela man Jop i tingim i stap bilong yumi na i mekim dispela tok: “Mipela ol manmeri i save stap sotpela taim tasol long graun, na . . . ol kain kain trabel i save kamap long mipela.”​—Jop 14:1.

Tasol taim Adam na Iv i pundaun long mekim sin, yu ting God i lusim ol lain man? Nogat tru! Kirap long dispela taim na i kam, Papa bilong yumi long heven i bin mekim wok bilong helpim ol lain man. Bilong pilim gut ol samting em i wok long mekim bilong helpim yumi, tingim 3-pela samting man i mas mekim bilong stretim gut haus, na olsem wanem dispela 3-pela samting i stret wantaim ol samting God i bin mekim bilong stretim bek ol lain manmeri.

1 Taim papa bilong haus i sekim pinis ol bagarap bilong haus, em i mas wokim disisen olsem em bai stretim bek haus o brukim olgeta.

Taim pasin bikhet i kamap long Iden, wantu tasol God Jehova i tokaut long tingting bilong em long stretim bek ol manmeri. Em i tokim dispela spirit i as bilong dispela pasin bikhet i kamap: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [“pikinini,” NW] bilong meri. Bai [em] i krungutim het bilong yu, na bai yu kaikaim lek bilong [em].”​—Stat 3:15.

Em nau, Jehova i promis long bagarapim dispela spirit i as bilong pasin bikhet i bin kamap long Iden. (Rom 16:20; KTH 12:9) Na tu, Jehova i tok profet olsem bihain wanpela “pikinini” bai kamap na em bai baim bek ol lain manmeri long sin.a (1 Jon 3:8) Long dispela rot, Jehova i tok promis long samting em bai mekim: Em bai stretim bek ol samting em i bin wokim, na em bai no bagarapim ol dispela samting. Tasol wok bilong stretim bek ol manmeri bilong graun em bai kisim bikpela hap taim.

2 Man bilong wokim plen bilong haus em i redim piksa i kamapim klia ol wok ol bai mekim bilong stretim bek haus.

God Jehova i bin givim sampela lo long ol Israel na em i wokim plen bilong wanpela tempel ol i mas lotuim em long en. Baibel i tok: “Dispela ol samting ol i olsem ol piksa nating bilong ol samting i laik kamap bihain.” (Kolosi 2:17) Olsem ol plen bilong haus, ol dispela lo na tempel i makim samting i bikpela samting moa.

Olsem: Ol Israel i bin ofaim ol animal bambai God i ken lusim sin bilong ol. (Wok Pris 17:11) Dispela samting i makim wanpela bikpela ofa tru bai kamap sampela handet yia bihain​—em wanpela ofa bilong baim bek ol man.b Piksa bilong haus lotu sel na bilong tempel ol Israel i lotu long en, em i makim ol samting Mesaia bai mekim bihain, kirap long indai bilong em na i go inap long taim em i go antap long heven.​—Lukim sat long pes 7.

3 Ol i save makim wanpela kapenta husat bai bihainim stret plen bilong haus na stretim bek haus.

Jisas em dispela Mesaia God i bin promis long salim i kam, em bai bihainim pasin bilong ol Israel long mekim ofa na em bai givim laip bilong em yet olsem ofa bilong baim bek ol man. Jon Bilong Baptais i kolim Jisas olsem “Pikinini Sipsip Bilong God. Em i kam bilong rausim sin bilong olgeta manmeri bilong graun.” (Jon 1:29) Jisas i orait long mekim dispela wok. Em i tok: “Mi no lusim heven na kam daun bilong bihainim laik bilong mi yet. Nogat. Mi kam daun bilong bihainim laik bilong Papa, em i bin salim mi na mi kam.”​—Jon 6:38.

God i laik bai Jisas i “givim laip bilong em bilong baim bek planti manmeri,” na tu, em i mas wokim kontrak bilong Kingdom wantaim ol disaipel bilong em. (Matyu 20:28; Luk 22:​29, 30) Dispela Kingdom em rot bilong God long inapim ol samting em i tingting pinis long mekim bilong helpim ol manmeri. Ol i kolim tok bilong Kingdom Bilong God olsem “gutnius,” long wanem, em i toktok long God i bin kamapim wanpela gavman long heven bilong bosim ol samting long graun.​—Matyu 24:14; Daniel 2:44.c

Wok Bilong Stretim Bek Ol Samting i Go Yet

Paslain long Jisas i go bek long heven, em i tokim ol disaipel bilong em olsem: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. . . . Harim. Mi save stap wantaim yupela olgeta de, i go inap long dispela taim i pinis.”​—Matyu 28:​19, 20.

Olsem na wok bilong helpim ol man long kamap gutpela gen i no pinis taim Jisas i dai. Em bai i go inap long taim pasin bilong “dispela graun i laik pinis”​—long taim Kingdom Bilong God i kirap long bosim graun bilong yumi. Yumi stap nau long dispela taim. Yumi save long dispela, long wanem, mak Jisas i bin tok profet long en bilong makim taim pasin bilong “dispela graun i laik pinis,” em i wok long kamap tru long nau.d​—Matyu 24:​3-14; Luk 21:​7-11; 2 Timoti 3:​1-5.

Long nau, long 236 kantri, ol Witnes Bilong Jehova i save bihainim tok bilong Jisas long autim gutnius bilong Kingdom Bilong God. Dispela nius nau yu ritim, em bilong helpim yu long kisim sampela save moa long dispela Kingdom na ol samting Kingdom bai mekim. Long pes 2 bilong olgeta Wastaua, bai yu lukim dispela tok: “Dispela nius i mekim gut bel bilong ol man na i tokim ol long Kingdom Bilong God, em wanpela gavman tru i stap long heven. Klostu nau dispela Kingdom bai pinisim olgeta pasin nogut, na em bai mekim graun i kamap wanpela gutpela ples paradais. Dispela nius i kirapim yumi long bilip long Krais Jisas, husat i bin dai bambai yumi ken kisim laip i stap oltaim na nau em i mekim wok King long Kingdom Bilong God.”

Tru, ating long nau bai yu harim yet stori bilong pasin teroris, o bikpela guria samting, o bikpela sik o bagarap i painim yu. Tasol taim yu stadi long Baibel, bai yu bilip tru olsem God i no bin lusim ol lain man, nogat. “Em i no i stap longwe long yumi olgeta wan wan.” (Aposel 17:27) Na tok promis bilong em long kamapim bek ol samting tupela tumbuna bilong pastaim i bin lusim, em bai kamap tru.​—Aisaia 55:11.

[Ol Futnot]

[Sat/Ol Piksa Long pes 7]

(Bilong save ol dispela rait i stap we long pes, lukim buk o magasin)

“Piksa tasol bilong Haus Lotu Tru”​​—Samting Haus Lotu Sel i Makim

ALTA

God i orait long ofa bilong Jisas.​​—HIBRU 13:​10-​12.

HETPRIS

Jisas.​​—HIBRU 9:​11.

1 Long Bikpela De Bilong God i Tekewe Sin Bilong Ol Manmeri, hetpris i mekim ofa bilong rausim sin bilong ol manmeri.​​—WOK PRIS 16:​15, 29-​31.

1 Long Nisan 14, 33 C.E., Jisas i givim laip bilong em olsem ofa bilong helpim yumi.​​—HIBRU 10:​5-​10; 1 JON 2:​1, 2.

RUM TAMBU

Jisas i stap man em holi spirit i makim.​​—MATYU 3:​16, 17; ROM 8:​14-​17; HIBRU 5:​4-6.

BIKPELA LAPLAP

Bodi bilong Jisas, banis i stap namel long laip long heven na laip long graun.​​—1 KORIN 15:​44, 50; HIBRU 6:​19, 20; 10:​19, 20.

2 Hetpris i go long hapsait bilong bikpela laplap i stap namel long Rum Tambu na Rum Tambu Tru.

2 Bihain long Jisas i kirap bek, em i ‘go long hapsait bilong bikpela laplap’ na em i go long heven bilong “stap klostu tru long God, na em i wok long helpim yumi.”​​—HIBRU 9:​24-​28.

RUM TAMBU TRU

Heven.​​—HIBRU 9:24.

3 Taim hetpris i stap insait long Rum Tambu Tru, em i tromoi liklik hap blut bilong ofa antap long alta long ai bilong bokis kontrak.​​—WOK PRIS 16:​12-​14.

3 Jisas i givim pe bilong blut bilong em i bin kapsait, na long dispela rot em i baim bek yumi long sin bilong yumi.​​—HIBRU 9:​12, 24; 1 PITA 3:​21, 22.