I Gat As na Yu Mas Save Long Stori Tru Bilong Abraham
SAMPELA man i tok, stori bilong Abraham i wanpela stori nating bilong ol lain bilong bipo na ol i litimapim nating nem bilong em. Ol i tok, Abraham i no wanpela man i bin i stap tru na em i no wanpela profet bilong God. Tasol olsem wanem? Dispela tok bilong ol i stret? Bekim bilong dispela askim em i bikpela samting o nogat? Baibel yet i makim olsem Abraham i bin stap long graun inap 4,000 yia i go pinis. Tasol nogut sampela man i tok, ‘Husat i laik save Abraham i bin stap tru o nogat—em i no bikpela samting.’
Orait, sapos yumi bungim olgeta manmeri bilong olgeta hap bilong graun na brukim ol i go tupela lain, orait wanpela lain bilong ol dispela manmeri ol i save tok ol i bilip long Abraham. Wanpela buk (1988 Britannica Book of the Year) i tok, long olgeta manmeri long graun, inap 32.9 pesen ol i “Kristen,” na 17.2 pesen ol i Muslim, na 0.4 pesen ol i Juda; na long ol dispela tripela kain lotu, olgeta i gat bikpela bilip long Abraham. Olsem na tru tumas, olgeta bilipman bilong ol dispela lotu ol i mas laik long save gut olsem ol stori bilong Abraham em lotu bilong ol i skulim ol long en, i stret o nogat. Na tu ol manmeri bilong ol arapela lotu o ol lain ol i “no gat lotu,” ol tu i mas laik long save long stori tru bilong Abraham. Bilong wanem?
Long wanem, Baibel i tok Abraham em i wanpela profet. (Stat 20:7) Long Baibel dispela tok “profet” as bilong en i olsem: Man bilong givim tok bilong God long ol arapela manmeri. Orait, sapos Abraham em i wanpela profet tru, dispela inap helpim yumi olgeta. Tasol olsem wanem dispela inap helpim yumi? Long wanem, tok God i givim long em, em i gutnius bilong helpim olgeta manmeri long graun. (Galesia 3:8) Baibel i tok, God i tok promis olsem: Long lain bilong Abraham bai God i “mekim gut long olgeta lain manmeri bilong graun.”—Stat 12:3.
Dispela promis em i samting bilong kirapim bel stret na Abraham i bin harim God i tokim em long dispela promis long tupela arapela taim tu. (Stat 18:18; 22:18) Na bilong truim dispela promis, God bai kirapim bek tu ol man bilong sampela lain ol i pinis olgeta long graun. Ol dispela man i kirap bek bai ol i kisim gutpela blesing tru, long wanem, planti long ol bai kirap bek na i stap long Paradais long graun, em Adam i bin lusim. Long dispela taim, bai ol i kisim save bilong helpim ol long kisim laip oltaim.—Stat 2:8, 9, 15-17; 3:17-23.
Tasol sapos stori bilong Abraham em i wanpela stori nating bilong ol tumbuna na em i no bin i stap tru, orait promis em i kisim em i samting nating na yumi no ken bilip long en. Na tu, sapos ol promis bilong Baibel i no inap kamap tru, bai sampela manmeri i ting i gutpela sapos ol i givim bel olgeta long kisim ol amamas bilong nau. Olsem wanpela Kristen bilong bipo i tok: “Sapos ol man i dai pinis ol i no inap kirap bek, orait mobeta ‘yumi kaikai na dring, long wanem, tumora bai yumi dai.’ ”—1 Korin 15:32.
Olsem na i gat gutpela as na yumi mas save gut olsem stori bilong Abraham em i stori nating bilong ol tumbuna o Abraham i bin i stap tru na em i wanpela profet tru? Sapos yu save long ol tok em ol bikman bilong sampela lotu i bin mekim long Abraham, bai yu kirap nogut tru. Tasol ol saintis bilong digim graun na painim ol samting bilong bipo ol i painim pinis planti samting i daunim tru tok bilong ol dispela bikman bilong lotu.