STADI 14

Mekim Ol Bikpela Tok i Stap Ples Klia

Hibru 8:1

OL BIKPELA TOK: Helpim odiens bilong yu long bihainim yu taim yu mekim tok, na kamapim klia olgeta wan wan poin we i kamapim gut as bilong tok bilong yu na tim bilong en.

ROT BILONG MEKIM:

Tingim wanem wok bilong tok bilong yu. Tingim olsem tok bilong yu i bilong givim save, o kirapim man long bilip long wanpela samting, o kirapim odiens na mekim tok bilong yu i stret long dispela. Ol bikpela poin bilong tok bilong yu i mas helpim yu long inapim wok bilong tok bilong yu.

Askim yu yet: ‘Odiens bilong mi bai i gat wanem ol askim o tingting long tok mi laik kamapim? Na taim ol i kisim bekim pinis, ol bai i gat wanem narapela askim?’ Orait nau stretim tok bilong yu na makim wanem poin bai yu kamapim pastaim na i go olsem, na bai odiens i ken bihainim yu taim yu kamapim tok bilong yu, na ol bai kliagut na bilipim tok yu kamapim.
Kamapim klia tim bilong tok bilong yu. Kolim ol bikpela tok bilong tim bilong yu planti taim long taim yu mekim tok.
Mekim ol bikpela poin bilong tok bilong yu i stap ples klia na i isi long man i kisim. Kamapim tasol ol poin bilong tok i stret long tim na dispela inap helpim yu long skulim gut ol man insait long haptaim ol i makim bilong tok bilong yu. Kolim tasol sampela bilong ol bikpela poin, na kamapim klia wan wan bikpela poin, malolo liklik taim yu kolim pinis wanpela bikpela poin, na bihain kolim narapela.

Yu ken kolim ol bikpela poin bilong tok long kirap bilong tok bilong helpim odiens long bihainim yu taim yu mekim tok, o yu ken kolim gen ol bikpela poin long taim yu mekim pinis bilong tok bilong helpim odiens long tingim ol dispela poin bilong tok.