STADI 10

Senisim Nek

Provep 8:4, 7

OL BIKPELA TOK: Kamapim klia ol tok na kirapim bel bilong ol man long harim tok long rot bilong senisim strong bilong nek, spit bilong toktok, na krai bilong nek.

ROT BILONG MEKIM:

Senisim nek bilong yu. Apim nek bilong yu bilong kamapim klia bikpela tok na bilong kirapim ol man i harim tok long mekim samting. Mekim wankain pasin taim yu ritim tok bilong Baibel we i stori long kot bai painim wanpela man o wanpela lain. Yu ken daunim nek bilong kirapim ol man long tingim na wetim tok yu laik kamapim o bilong kamapim pasin bilong pret o tingting planti.

No ken apim nek planti taim, nogut ol man i harim tok bilong yu i pilim olsem yu wok long krosim ol. No ken bihainim kain kain pasin bilong apim nek na daunim nek we bai pulim tingting bilong ol man i kam long yu tasol.
Senisim krai bilong nek. Krai bilong nek i mas i go antap taim yu laik kamapim olsem yu amamas nogut tru o taim yu laik kolim sais bilong wanpela samting o wanpela ples i stap longwe olsem wanem. Krai bilong nek bilong yu i mas i go daun bilong makim bel hevi na tingting planti.
Senisim spit bilong toktok. Toktok hariap bilong kamapim olsem yu amamas. Taim yu laik kamapim ol bikpela tok, yu mas toktok isi isi.

Abrusim pasin bilong kirap wantu long toktok hariap tru, na bai yu no mekim ol man i harim tok bilong yu i kirap nogut. Pasin bilong toktok hariap tru bai mekim na ol man bai i no kliagut long tok yu mekim, long wanem, yu no kolim gut ol tok.