Ol Referens Bilong Laip na Wok Autim Tok Miting Wok Buk
ME 2-8
GUTPELA SAVE I KAM LONG BAIBEL | 1 SAMUEL 27-29
“Plen Bilong Devit Long Pait”
it-1 41
Akis
Taim Devit i ranawe long Sol, 2-pela taim em i bin go hait long hap em King Akis i bosim. Long namba 1 taim em i go bilong hait, ol i saspek long em olsem em i wanpela birua, olsem na Devit i giaman na mekim olsem em i longlong, na Akis i larim em i go na i no bagarapim em. (1Sm 21:10-15; Sg 34:Sup; 56:Sup) Long namba 2 taim Devit i go bilong hait, 600 soldia na famili bilong ol i go wantaim em, olsem na Akis i givim taun Siklak long ol i ken stap long en. Insait long 1-pela yia na 4-pela mun we ol i stap long dispela hap, Akis i ting olsem Devit na ol soldia bilong em i go pait long ol taun bilong Juda, tasol tru tru Devit i save go pait long ol Gesur, Girsi, na ol Amalek. (1Sm 27:1-12) Akis i bilipim tru Devit, olsem na em i makim Devit olsem gad bilong em long taim ol Filistia i redi bilong i go pait long King Sol, tasol bihain, “ol king” bilong Filistia i no laik bai Devit i go wantaim ol long pait, olsem na ol i salim Devit na ol soldia bilong em i go bek long taun Siklak. (1Sm 28:2; 29:1-11) Taim Devit i kamap king na em i pait long Get, i luk olsem em i no bin kilim Akis. Akis i bin stap laip i go inap long taim Solomon i mekim wok king.—1Ki 2:39-41.
Ol Yangpela Man—Yu Inap Mekim Wanem na Bai Ol Narapela i Ken Trastim Yu?
8 Tingim narapela hevi em Devit i mas karim. Bihain long ol i makim em long kamap king, em i mas wet inap planti yia bilong em inap mekim wok king long Juda. (1 Sml. 16:13; 2 Sml. 2:3, 4) Insait long dispela haptaim, wanem samting i helpim em long wet i stap na i no les kwik? Em i no larim pasin bilong bel hevi i daunim em, nogat, Devit i putim tingting i go long ol samting em i ken mekim. Olsem, taim em i stap olsem ranaweman long Filistia, em i pait long ol birua bilong lain Israel. Taim em i mekim olsem, em i lukautim hap graun bilong Juda.—1 Sml. 27:1-12.
it-2 245 par. 6
Giaman
Baibel i tambuim pasin bilong tok giaman, tasol dispela i no makim olsem oltaim man i mas tokaut long ol trupela infomesen bilong wanpela samting long ol man husat i no gat rait long save long dispela samting. Krais Jisas i tok: “No ken givim ol samting i holi long ol dok, na no ken tromoi ol pel bilong yupela i go long ol pik. Nogut ol i krungutim ol pel long lek na tanim na bagarapim yupela.” (Mt 7:6) Olsem na sampela taim Jisas i no tokaut long olgeta samting o bekim stret olgeta askim taim em i save olsem dispela inap kamapim hevi. (Mt 15:1-6; 21:23-27; Jon 7:3-10) I klia tru olsem Abraham, Aisak, Rahap, na Elisa i bin mekim olsem taim ol i giaman o taim ol i no tokaut long olgeta samting long ol man husat i no lotuim Jehova.—St 12:10-19; sap 20; 26:1-10; Jos 2:1-6; Jem 2:25; 2Ki 6:11-23.
Mekim Wok Painimaut
Yu Ting Ol Daiman Inap Helpim Ol Man i Stap Laip?
Tingim dispela. Baibel i tok taim man i dai em i “tanim i kamap graun gen” na em i ‘no inap mekim olgeta samting em i bin tok long mekim.’ (Song 146:4) Sol tupela Samuel i save olsem God i no orait long pasin bilong kisim helpim long ol glasman. Tingim, bipo Sol i bin go pas long pinisim pasin bilong mekim wok bilong ol spirit nogut!—Wok Pris 19:31.
Skelim dispela samting. Sapos gutpela man Samuel i stap laip yet olsem wanpela spirit, yu ting em bai brukim lo bilong God na wok wantaim glasmeri bambai em i ken bungim Sol? Jehova i no laik toktok wantaim Sol. Yu ting wanpela glasmeri inap fosim God i Gat Olgeta Strong long toktok wantaim Sol long rot bilong Samuel husat i dai pinis? Nogat tru. Em i klia tru olsem, dispela “Samuel” em i no gutpela profet bilong God. Em i wanpela spirit—em i spirit nogut i giaman olsem em i Samuel i dai pinis.
ME 9-15
GUTPELA SAVE I KAM LONG BAIBEL | 1 SAMUEL 30-31
“Kisim Strong i Kam Long God Bilong Yu Em Jehova”
Pret Long Jehova—Stap Amamas!
12 Devit i pret long Jehova na dispela i kirapim em long sakim pasin nogut, na tu, dispela i strongim em long kirap kwik na mekim samting na bihainim savetingting taim hevi i painim em. Inap wanpela yia na fopela mun, Devit na lain bilong em i hait long Sol long Siklak long graun bilong ol Filistia. (1 Samuel 27:5-7) Wanpela taim ol man i no stap, na ol lain Amalek i kam kukim taun na kisim olgeta meri pikinini na ol sipsip samting i go. Taim Devit na lain bilong em i kam bek na lukim samting i bin kamap, ol i krai. Wantu lain bilong Devit i kros long em, na ol i toktok long tromoi ston long em na kilim em i dai. Taim nogut i painim Devit, tasol em i no bel hevi. (Sindaun 24:10) Pasin bilong em long pret long God i kirapim em long beten long Jehova “na God i strongim tingting bilong em.” God i helpim Devit na lain bilong em na ol i daunim ol Amalek na kisim bek olgeta samting bilong ol.—1 Samuel 30:1-20.
Jehova i Lukautim Yumi Bilong Kisim Bek Yumi
14 Planti samting i kamap long laip bilong Devit we i mekim em i bel hevi na i givim presa long em. (1 Sml. 30:3-6) Baibel i soim olsem Jehova i save long ol samting Devit i pilim. (Ritim Song 34:18; 56:8.) God i save tu long ol samting yumi pilim. Em i luksave long yumi gat hevi na yumi pilim nogut tru, dispela i mekim gut bel bilong yumi. Na dispela i bin mekim gut bel bilong Devit, em i singsing olsem: “Yu sori long mi oltaim, olsem na mi amamas long yu. Yu lukim dispela hevi bilong mi, na yu save long olgeta trabel i kamap long mi.” (Sng. 31:7) Tasol Jehova i no luksave tasol long ol hevi bilong yumi, nogat. Em i helpim yumi long sanap strong long rot bilong mekim gut bel bilong yumi na strongim yumi. Wanpela rot em i mekim olsem em long ol miting Kristen.
Mekim Wok Painimaut
Sampela Bikpela Tok Bilong Buk Namba 1 Samuel
30:23, 24. Devit i bihainim tingting i stap long Namba 31:27 na em i makim dispela samting em i laik mekim, na dispela i soim olsem Jehova i save tingim ol lain i helpim wok bilong ol narapela insait long kongrigesen. Olsem na, maski wanem wanem wok yumi mekim, yumi ‘mas wok strong na mekim. I no olsem yumi mekim wok bilong ol man. Nogat. Yumi mekim wok bilong Bikpela.’—Kolosi 3:23.
ME 16-22
GUTPELA SAVE I KAM LONG BAIBEL | 2 SAMUEL 1-3
“Yumi Kisim Wanem Skul Long ‘Singsing Bilong Banara’?”
Givim Biknem Long Ol Man i Gat Wok Long Bosim Yu
9 Yu ting Devit i bel hevi taim ol i mekim nogut long em? Devit i singaut long Jehova olsem: “Ol . . . man i save bagarapim ol arapela man, ol i laik kilim mi i dai.” (Song 54:3) Em i kamapim hevi bilong em long Jehova olsem: “God bilong mi, yu mas kisim bek mi long han bilong ol birua bilong mi. . . . Ol i man nogut bilong pait na ol i bung bilong pait long mi. Bikpela, mi no mekim rong na mi no bikhet long lo bilong yu, na mi no gat asua long wanpela samting. Tasol ol i hariap i go sambai bilong pait long mi.” (Song 59:1-4) Olsem wanem? Wanpela taim yu gat wankain tingting olsem Devit—olsem yu no bin mekim wanpela rong long man i gat namba, tasol em i wok long givim hevi long yu? Oltaim Devit i save daun long Sol. Taim Sol i dai, Devit i no amamas long dispela, nogat. Em i raitim wanpela singsing sori olsem: “Ol manmeri i save laikim Sol na Jonatan. Tupela i gutpela man tru. . . . Tupela i spit tru long ranim birua na i winim pasin bilong ol tarangau i spit long kisim abus. Na strong bilong tupela i winim strong bilong laion. Yupela ol meri Israel, yupela i mas krai sori long Sol.” (2 Samuel 1:23, 24) Devit i stap gutpela piksa long pasin bilong daun tru long man Jehova i bin makim, maski Sol i bin rongim em!
Givim Baksait Long Pren Mak Nogut Bilong Dispela Taim!
8 Baibel i stori tu long ol man husat i bin stap gut long narapela. Bai yumi stori long tupela man em yumi ken kisim skul long ol. Pastaim bai yumi stori long wanpela man husat i bin stap gut long Devit. Jonatan em fesbon pikinini bilong King Sol, na ating em bai kamap king bihain long papa bilong em. Tasol Jehova i makim Devit. Jonatan i rispektim disisen bilong God na em i no jeles long Devit. Jonatan “i givim bel bilong en moa yet long Devit,” na i tok promis long stap gut long em. Na tu, Jonatan i soim ona long Devit taim em i givim klos, bainat, banara, na let bilong en long Devit. (1 Sml. 18:1-4) Jonatan i mekim olgeta samting em inap mekim bilong sapotim Devit. Maski laip bilong Jonatan inap lus, em i lukautim Devit na bai Sol i no ken kilim em i dai. Jonatan i stap gut long Devit na tokim em: “Bihain bai yu kamap king bilong Israel, na mi bai stap namba 2 bilong yu.” (1 Sml. 20:30-34; 23:16, 17) Yumi no kirap nogut olsem bihain long Jonatan i dai, Devit i singim song bilong kamapim bel sori bilong em na pasin bilong em long laikim tru Jonatan.—2 Sml. 1:17, 26.
Mekim Wok Painimaut
it-1 369 par. 2
Brata
“Brata” i makim tu ol manmeri husat i holim wankain tingting na ol i putim wankain mak bilong winim na ol i gat wankain risen bilong ol wok na ol samting ol i mekim. Eksampel, King Hiram bilong Tair i kolim Solomon olsem brata bilong em. Ating em i mekim dispela tok bikos em i tingim olsem tupela i gat wankain laik long saplaim ol timba na ol narapela samting bilong wokim tempel, na em i no tingim tasol wankain namba na posisen tupela i gat. (1Ki 9:13; 5:1-12) “Lukim! Em i gutpela tru long ol brata i sindaun gut wantaim na i stap wanbel!” Devit i raitim dispela tok bilong kamapim klia olsem i no pasin bilong laikim wanblut tasol i save mekim tupela brata i stap bel isi na wanbel. (Sg 133:1) Olsem na pasin bilong laikim narapela na laikim wankain samting i kirapim Devit long kolim Jonatan olsem brata bilong em, maski tupela i no wanblut. (2Sm 1:26) Ol pren husat i gat ol wankain laik na tingting, ol i olsem brata, maski laik na tingting bilong ol i no gutpela.—Pr 18:9.
ME 23-29
GUTPELA SAVE I KAM LONG BAIBEL | 2 SAMUEL 4-6
“Wok Strong Long No Ken Mekim Jehova i Bel Hevi”
Sampela Bikpela Tok Bilong Buk Namba 2 Samuel
6:1-7. Tru Devit i gat gutpela tingting long kisim Bokis Kontrak i go, tasol em i putim Bokis Kontrak long karis na dispela i brukim lo bilong God na hevi i kamap long dispela. (Kisim Bek 25:13, 14; Namba 4:15, 19; 7:7-9) Usa i holim Bokis Kontrak na dispela tu i soim olsem maski man i gat gutpela laik long mekim samting tasol dispela i no inap senisim lo bilong God.
Oltaim Jehova i Save Bihainim Stretpela Pasin Tasol
20 Na tingim, Usa i save pinis long Lo. Dispela Bokis i makim olsem Jehova i stap wantaim lain bilong em. Lo i tok ol man i no gat namba long holim Bokis, ol i no ken holim. Lo i tok ol man i mekim olsem, ol i mas i dai. (Namba 4:18-20; 7:89) Olsem na wok bilong kisim dispela Bokis holi i go long narapela hap, i no wanpela liklik samting, nogat. Usa i wanpela Livai, olsem na maski em i no wanpela pris, em i mas save long Lo. Na tu, sampela yia paslain, ol i bin kisim Bokis na putim long haus bilong papa bilong em bambai Bokis i ken i stap gut. (1 Samuel 6:20–7:1) Bokis i bin stap long dispela hap inap 70 yia, i go inap long taim Devit i tingting long kisim i go long narapela hap. Olsem na kirap long taim Usa i liklik yet, em i save long ol lo bilong ol samting bilong dispela Bokis.
Oltaim Jehova i Save Bihainim Stretpela Pasin Tasol
21 Olsem yumi stori pastaim, Jehova inap lukim bel na tingting bilong man. Baibel i tok, Usa i ting Bokis Kontrak “i samting nating,” olsem na ating Jehova i bin lukim samting long bel bilong Usa em Baibel i no tokaut stret long en. Olsem: Ating Usa i man bilong litimapim nem bilong em yet na i save mekim ol samting em i no gat namba long mekim. (Sindaun 11:2) O taim em i wokabaut i go pas long Bokis em famili bilong em i bin lukautim, ating dispela i mekim na em i hambak. (Sindaun 8:13) Olsem wanem? Usa i no bilip olsem Jehova inap lukautim dispela Bokis holi i makim olsem em i stap namel long lain bilong em? Maski wanem samting i bin kirapim Usa long holim bokis, yumi ken bilip tru olsem Jehova i bin mekim pasin i stret. Ating Jehova i lukim samting long bel bilong Usa, em samting i bin kirapim Em long kirap kwik na mekim save long Usa.—Sindaun 21:2.
Mekim Wok Painimaut
Oltaim Putim Ol Hevi Long Han Bilong Jehova
Devit i king, olsem na hap asua i go long em. Na samting em i mekim i kamapim klia olsem maski man i stap pren bilong Jehova, taim hevi i kamap, em inap mekim sampela pasin kranki. Pastaim Devit i kros. Bihain em i pret. (2 Samuel 6:8, 9) Dispela i traim tru pasin pren i stap namel long em na Jehova. I olsem em i no putim hevi bilong em long han bilong Jehova; em i no bin bihainim lo bilong Em. Na ating sampela taim i wankain long yumi tu, a? Olsem wanem? Taim yumi sakim lo bilong Jehova na hevi i kamap, sampela taim yumi tok em asua bilong Jehova?—Sindaun 19:3.
ME 30–JUN 5
GUTPELA SAVE I KAM LONG BAIBEL | 2 SAMUEL 7-8
“Jehova i Mekim Kontrak Wantaim Devit”
“Bai Mi Mekim Ol Man Long Lain Bilong Yu i Kamap King Oltaim”
Jehova i pilim tru bikpela laik bilong Devit. God i amamas long pasin bilong Devit long givim bel tru long em, na tu, God i tingim tok profet, olsem na God i mekim wanpela kontrak wantaim Devit, olsem Em bai kamapim wanpela man long lain king bilong Devit husat bai mekim wok king inap oltaim oltaim. Natan i tokim Devit long dispela strongpela tok promis bilong God olsem: “Lain bilong yu bai i no inap pinis. Na bai mi mekim ol man long lain bilong yu i kamap king oltaim.” (Ves 16) Husat em dispela Man bilong lain bilong Devit em bilong i stap king oltaim oltaim, olsem kontrak i tok?—Song 89:20, 29, 34-36.
“Bai Mi Mekim Ol Man Long Lain Bilong Yu i Kamap King Oltaim”
Jisas bilong Nasaret em i wanpela tumbuna pikinini bilong Devit. Taim ensel i tokaut long Maria bai karim Jisas, ensel i tok: “God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.” (Luk 1:32, 33) Olsem na kontrak God i wokim wantaim Devit i kamap tru long rot bilong Jisas Krais. Em nau, Jisas i mekim wok king long rot bilong strongpela tok promis bilong God husat i givim rait long em long mekim wok king inap oltaim oltaim, na em i no mekim wok king, long wanem, sampela man i givim dispela wok long em, nogat. Yumi no ken lusim tingting olsem long olgeta taim ol tok promis bilong God i save kamap tru.—Aisaia 55:10, 11.
Bilip Strong Long Kingdom
14 Tingim tok promis em Jehova i bin mekim long King Devit bilong Israel long bipo long rot bilong kontrak namel long God na Devit. (Ritim 2 Samuel 7:12, 16.) Jehova i mekim dispela kontrak wantaim Devit taim Devit i stap king long Jerusalem, na em i tok promis olsem Mesaia bai kamap long lain tumbuna pikinini bilong Devit. (Luk 1:30-33) Long dispela rot, Jehova i tokaut long lain famili em pikinini bai kamap long en, na em i tokaut olsem wanpela long lain bilong Devit bai “i gat rait long kisim” wok King long Kingdom Bilong Mesaia. (Ese. 21:25-27, NW ) Long rot bilong Jisas, i olsem Devit i stap king oltaim oltaim. Dispela pikinini i kamap long lain bilong Devit bai “i stap oltaim” na wok king bilong em bai i stap “longtaim tru inap olsem san i stap.” (Sng. 89:34-37) Yes, wok king bilong Mesaia bai i no gat pasin korapsen long en, na em bai mekim ol gutpela wok we bai stap inap oltaim oltaim!
Mekim Wok Painimaut
it-2 206 par. 2
Las De
Tok Profet Bilong Balam. Paslain long lain Israel i go insait long Graun Bilong Promis, profet Balam i tokim King Balak bilong Moap olsem: “Mi mas toksave long yu long ol samting ol Israel bai mekim long ol lain pipol bilong yu long pinis bilong ol de. . . . Wanpela sta bai kamap long lain pikinini bilong Jekop. Stik bilong king bai kamap long lain pikinini bilong Israel, na em bai brukim poret bilong Moap, na bun bilong het bilong ol pikinini man husat i save kamapim bagarap.” (Nam 24:14-17, futnot) Fes truim bilong dispela tok profet i kamap taim King Devit, em dispela “sta,” i daunim lain Moap. (2Sm 8:2) Olsem na i klia tru olsem tok profet bilong “pinis bilong ol de” i kamap tru taim Devit i kamap king. Wok king bilong Devit i stap olsem piksa bilong Jisas olsem King Mesaia, olsem na dispela tok profet i makim tu dispela taim we Jisas bai daunim ol birua bilong em.—Ai 9:7; Sg 2:8, 9.
JUN 6-12
GUTPELA SAVE I KAM LONG BABEL | 2 SAMUEL 9-10
“Devit i Soim Gutpela Pasin Laikim”
Yes, Yu Inap Painim Amamas
Devit i tok: “Man i save tingim ol rabisman na i helpim ol, dispela man i ken amamas. Bikpela bai i helpim em long taim hevi i kamap long em. God bai i lukautim em na strongim laip bilong em.” (Song 41:1, 2) Devit i mekim gutpela pasin sori long Mefiboset, em tupela lek bilong em i nogut. Mefiboset em pikinini man bilong Jonatan, gutpela pren bilong Devit. Gutpela pasin bilong Devit long tingim ol man i gat hevi em i stap olsem gutpela piksa ol arapela i ken bihainim.—2 Samuel 9:1-13.
Sampela Bikpela Tok Bilong Buk Namba 2 Samuel
9:1, 6, 7. Devit i truim tok promis bilong em. Yumi tu mas truim ol tok promis yumi mekim.
Ol i Karim Hevi Bilong Ol Nil i Sutim Skin Bilong Ol
10 Sampela yia bihain, pasin bilong King Devit long laikim tru Jonatan i kirapim em long mekim gut long Mefiboset. Devit i givim olgeta graun samting bilong Sol i go long Mefiboset na em i makim wanpela wokman bilong Sol, em Siba, long lukautim dispela graun. Devit i tokim Mefiboset: “Olgeta taim yu ken i kam kaikai wantaim mi.” (2 Samuel 9:6-10) Gutpela pasin bilong Devit i mekim gut bel bilong Mefiboset na daunim bel hevi bilong em long stap lek nogut. Dispela stori i skulim gut yumi! Yumi tu i mas helpim ol man i karim hevi bilong wanpela nil i sutim skin bilong ol.
Mekim Wok Painimaut
it-1 266
Mausgras
Planti manmeri bilong bipo long hap Is, dispela i makim tu lain Israel, i save tingim mausgras olsem mak bilong wanpela man na ol narapela i mas rispektim em. Lo God i givim long ol Israel i tambuim ol man long katim “gras long sait bilong het,” em gras i stap namel long yau na ai, na tu, ol i no ken katim arere bilong mausgras. (Wk 19:27; 21:5) Dispela lo i stret bikos sampela haiden i save katim mausgras olsem wanpela pasin bilong lotu bilong ol.
JUN 13-19
GUTPELA SAVE I KAM LONG BAIBEL | 2 SAMUEL 11-12
“No Ken Larim Laik Nogut i Bosim Yu”
Yu Ken Lusim Ol Trap Bilong Satan!
10 Gridi pasin i mekim na King Devit i lusim tingting long ol samting Jehova i bin givim long em, olsem mani kago, biknem na namba, na strong long winim planti pait. Devit i amamas long ol presen God i givim long em, na em i tok: “Man! Ol i planti tumas na mi no inap kaunim.” (Sng. 40:5) Tasol long wanpela taim, Devit i lusim tingting long ol samting Jehova i givim long em. Em i no amamas moa long ol dispela samting; em i laikim sampela samting moa. Maski Devit i maritim planti meri, long bel em i wok long mangal long meri bilong narapela man. Dispela meri em Batseba, na man bilong en em Uria bilong lain Hit. Devit i tingim laik bilong em yet na em i slip wantaim Batseba, na Batseba i kisim bel. Devit i mekim pasin adaltri—em pasin i nogut tru—tasol samting i nogut moa, em i stretim rot long kilim i dai Uria! (2 Sml. 11:2-15) Wai stret na Devit i mekim dispela pasin? Em i ting olsem Jehova i no lukim ol dispela samting? Dispela gutpela wokman bilong Jehova i mekim gridi pasin na em i karim bikpela hevi tru long dispela. Tasol bihain Devit i tokaut long rong bilong em na em i tanim bel. Na em i amamas tru olsem Jehova i fogivim em!—2 Sml. 12:7-13.
Stap Daun Long Jehova—Wai na Hau?
15 Jehova i makim Devit long stap het bilong famili bilong em na het bilong kantri Israel. Devit i gat bikpela namba. Sampela taim, em i no mekim gutpela wok long namba bilong em na em i mekim ol bikpela rong. (2 Sml. 11:14, 15) Tasol em i redi long kisim tok bilong stretim em na dispela i soim olsem em i daun long Jehova. Em i beten long Jehova na autim olgeta wari bilong em. Na em i traim bes long bihainim tok kaunsel i kam long Jehova. (Sng. 51:1-4) Na tu, em i daunim em yet na redi long bihainim edvais ol meri i givim. (1 Sml. 19:11, 12; 25:32, 33) Devit i kisim skul long ol popaia bilong em yet na em i putim wok bilong Jehova i stap nambawan bikpela samting long laip bilong em.
Larim Ol Lo na Stiatok Bilong God i Skulim Maus Bilong Bel
7 I no olsem yumi mas brukim ol lo bilong God na karim hevi bambai yumi inap kisim skul long wanem ol pasin yumi mas bihainim. Taim yumi ritim Baibel, yumi inap kisim skul long popaia bilong ol man long bipo. Sindaun 1:5 i tok, ‘Man i gat save bai kisim save moa yet.’ Tru tumas, yumi kisim ol gutpela skultok i kam long God taim yumi ritim laip stori bilong ol man long Baibel na tingim tingim ol dispela stori. Olsem, tingim bel hevi King Devit i pilim taim em i brukim lo bilong Jehova na mekim pasin adaltri wantaim Batseba. (2 Sml. 12:7-14) Taim yumi ritim na tingim tingim dispela stori, yumi ken askim yumi yet: ‘Olsem wanem King Devit inap abrusim bel hevi em i pilim taim em i mekim pasin adaltri wantaim Batseba? Sapos kain traim i painim mi, mi inap sanap strong na sakim? Mi bai bihainim pasin bilong Josep na ranawe o bai mi bihainim pasin bilong Devit na mekim rong?’ (Stt. 39:11-15) Taim yumi tingim hevi we inap kamap long pasin bilong mekim sin, yumi bai tingting strong long “lusim pasin nogut.”
Mekim Wok Painimaut
it-1 590 par. 1
Devit
Tasol Jehova i lukluk i stap na em i lukim pasin i nogut tru. Sapos Jehova i larim ol man bilong graun i stap olsem jas na bihainim Lo Bilong Moses long skelim pasin nogut i kamap namel long Devit na Batsiba, ol inap kilim i dai tupela wantaim, na tu, bebi i kamap long rot bilong adaltri we i stap long bel bilong mama inap dai. (Lo 5:18; 22:22) Tasol Jehova yet i skelim dispela hevi na em i marimari long Devit bikos em i tingim kontrak bilong Kingdom (2Sm 7:11-16), na tu, Devit yet i bin marimari long ol long narapela (1Sm 24:4-7; skelim Jem 2:13) na God i lukim olsem Devit na Batsiba i tanim bel long sin bilong ol. (Sg 51:1-4) Tasol ol i karim ol hevi bilong rong ol i mekim. Long rot bilong profet Natan, Jehova i tokaut olsem: “Bai mi mekim sampela insait long famili bilong yu yet i givim bikpela hevi long yu.”—2Sm 12:1-12.
JUN 20-26
GUTPELA SAVE I KAM LONG BAIBEL | 2 SAMUEL 13-14
“Amnon i Tingim Laik Bilong Em Yet na Dispela i Kamapim Hevi”
it-1 32
Apsalom
Ol i Kilim i Dai Amnon. Tamar em susa bilong Apsalom na em i luk nais stret, olsem na Amnon, em bikpela hap brata bilong Apsalom i laikim tru Tamar. Amnon i giaman olsem em i sik na em i askim long Tamar i ken kam kukim kaikai bilong em, na bihain em i pulim em na reipim em. Amnon i no laikim moa Tamar olsem long pastaim, na em i heitim em na rausim em long haus. Tamar i brukim longpela klos ol pikinini meri bilong king i no bin slip wantaim man i save werim, putim sit bilong paia long het bilong em, na brata bilong em Apsalom i kam bungim em. Pasin bilong Apsalom long skelim dispela samting na kwiktaim saspek long Amnon i soim olsem em i bin save olsem hap brata bilong em Amnon i laikim Tamar. Tasol Apsalom i tokim susa bilong em long no ken tokaut long dispela samting, na em i kisim em go i stap long haus bilong em.—2Sm 13:1-20.
Kisim Pasin Bilong Bosim Bel
11 Baibel i stori tu long sampela eksampel nogut bilong ol lain husat i no bosim bel na ol i mekim pasin pamuk. Na tu, em i stori long ol hevi i painim ol long pasin bilong i no bosim bel. Ol yangpela husat i bungim wankain hevi olsem Kim i ken tingim stori bilong yangpela man em Buk Sindaun sapta 7 i stori long en. Dispela yangpela man i no bin bihainim savetingting. Tingim tu hevi i kamap long pasin Amnon i mekim. (2 Sml. 13:1, 2, 10-15, 28-32) Ol papamama i ken helpim ol pikinini long bosim bel na bihainim savetingting long sait bilong painim poroman. Long taim bilong famili lotu, ol i ken yusim stori bilong Amnon na yangpela man em Buk Sindaun i stori long en.
it-1 33 par. 1
Apsalom
Tupela yia i lus. Taim bilong katim gras bilong ol sipsip i kamap, em wanpela taim bilong amamas, na Apsalom i wokim wanpela bikpela kaikai long Bal-hasor, em ples i stap 22 kilomita long hap not not is bilong Jerusalem, na em i singautim ol pikinini man bilong king na Devit tu. Tasol papa bilong em i no laik go, olsem na Apsalom i askim em long salim Amnon, em fesbon bilong king, i ken kisim ples bilong em na kam. (Pr 10:18) Long bung, taim Amnon i “dring wain na em i amamas” i stap, Apsalom i tokim ol wokman bilong em na ol i kilim em i dai. Ol narapela pikinini man bilong Devit i ranawe i go bek long Jerusalem, na Apsalom i ranawe na i go stap wantaim bubu man bilong em husat i bilong Siria na king bilong Gesur long hap is bilong Raunwara Galili. (2Sm 13:23-38) Nau “bikpela hevi” em profet Natan i bin tok long en i painim “famili” bilong Devit na dispela hevi bai stap wantaim em long laip olgeta bilong em.—2Sm 12:10.
Mekim Wok Painimaut
g04 12/22 8-9
Samting i Gutpela Moa Winim Lukluk Bilong Man
Tasol tingim Apsalom, em wanpela pikinini man bilong Devit. Em i kamap man nogut maski em i luk nais tru. Baibel i stori long em olsem: “Long Israel i no gat wanpela man i luk nais tru olsem Apsalom, olsem na ol Israel i save litimapim lukluk bilong em. I no gat wanpela mak samting i stap long skin bilong em, stat long lek i go inap long het bilong em.” (2Sm 14:25) Tasol laik bilong Apsalom long kamap king i kirapim em long birua long papa bilong em na kisim wok king. Na tu, em i slip wantaim ol namba 2 meri bilong papa bilong em. Olsem na God i givim strafe long Apsalom na em i kisim bikpela pen na dai.—2 Samuel 15:10-14; 16:13-22; 17:14; 18:9, 15.
Yu laik bihainim pasin bilong Apsalom? Nogat tru. Em i wanpela man i gat ol stingpela pasin. Naispela lukluk bilong em i no pasim em long kisim strafe long pasin bilong em long hambak na i no stap gut long papa bilong em, na tu, em i dai. Tasol Baibel i stori long planti man i stap gutpela eksampel, na em i no stori long lukluk bilong ol. Dispela i kamapim klia tru olsem tingting na pasin bilong ol man i bikpela samting moa winim lukluk bilong ol.
JUN 27–JULAI 3
GUTPELA SAVE I KAM LONG BAIBEL | 2 SAMUEL 15-17
“Apsalom i Bikhet Bikos Em i Gat Pasin Antap”
it-1 860
Man i Go Paslain
Ol man bilong Esia i gat kastam olsem man bilong i go paslain i save go pas na toksave olsem king i kam na em i mekim ol samting bilong helpim king. (1Sm 8:11) Apsalom na Adoniya i bin mekim olsem bilong kisim biknem na namba olsem king taim tupela i putim 50 man bilong i go paslain long karis bilong tupela.—2Sm 15:1; 1Ki 1:5.
Lotuim Dispela God i Mekim Ol Man i Kamap Fri
5 I gat planti eksampel long Baibel long sampela husat i bin pulim ol arapela long mekim pasin nogut. Apsalom, pikinini bilong King Devit, em wanpela bilong ol. Apsalom i luk nais tru. Olsem Satan, em i larim tingting nogut i kamap strong long bel bilong em. Apsalom i laik kisim ples bilong papa na kamap king, maski em i no gat rait long kamap king. Bilong kisim samting em i laikim, Apsalom i kirapim ol manmeri long ting olsem em yet i laik helpim ol na king i no laik helpim ol. Olsem Satan long gaden Iden, Apsalom i mekim olsem em i tingim ol manmeri na long seim taim em i sutim bikpela tok giaman long papa bilong en.—2 Sml. 15:1-5.
it-1 1083-1084
Hebron
Sampela yia bihain Apsalom, pikinini man bilong Devit, i go bek long Hebron na mekim ol samting bilong kisim wok king long papa bilong em tasol em i lus. (2Sm 15:7-10) Hebron em wanpela taun i gat nem bikos bipo em stap olsem biktaun bilong Juda, na tu, em asples bilong Apsalom, olsem na ating em i go stap long dispela taun bilong mekim ol samting bilong kamap king. Bihain, King Rehoboam, em tumbuna pikinini bilong Devit, i stretim gen Hebron. (2St 11:5-10) Bihain long ol Babilon i daunim Juda na ol Juda i lusim kalabus na i go bek, sampela bilong ol Juda i go sindaun long Hebron (Kiriath-arba).—Ne 11:25.
Mekim Wok Painimaut
Yu Save Long As Tru Bilong Olgeta Samting i Kamap?
11 Yumi inap karim hevi tu taim ol man i mekim pasin i no stret na ol i kamapim ol hap hap stori o giaman stori long ol narapela long ol samting yumi mekim. Tingim stori bilong King Devit na Mefiboset. Devit i soim gutpela pasin long Mefiboset taim em i givim olgeta graun bilong Sol long em. Sol em tumbuna papa bilong Mefiboset. (2 Sml. 9:6, 7) Bihain wokboi bilong Mefiboset i go lukim Devit na em i mekim giaman stori long Mefiboset. Tasol Devit i no painimaut gut sapos dispela stori em i tru o nogat. Olsem na wantu em i givim olgeta samting bilong Mefiboset i go long dispela wokboi. (2 Sml. 16:1-4) Bihain, Devit i toktok wantaim Mefiboset na em i luksave olsem stori em i harim i no tru, olsem na em i givim bek hap bilong ol samting bilong Mefiboset. (2 Sml. 19:24-29) Tasol Devit i no inap mekim dispela pasin i no stret sapos em i lusim sampela haptaim long painimaut samting tru i kamap, na em i no hariap long bilipim dispela giaman stori.