Yes, Yu Inap Painim Amamas
AMAMAS—amamas tru i save stap oltaim—sampela taim dispela i hatwok long painim. Wanpela as na planti man i hatwok long painim, i olsem: Ol i bihainim rot i no rot tru bilong painim amamas. I gutpela sapos ol i gat wanpela pren ol inap bilip tru long em, na em inap helpim ol long painim rot bilong i stap amamas!
Baibel inap helpim yumi long painim rot bilong i stap amamas. Tingim Buk Song bilong Baibel. Dispela buk i gat 150 song long en bilong givim biknem long God Jehova. King Devit bilong Israel i bin raitim planti bilong ol dispela song. Tasol bikpela samting tru yumi mas save long en, winim nem bilong ol man i bin raitim Buk Song, i olsem: Jehova, nambawan gutpela Pren bilong yumi, i bin stiaim ol man long raitim dispela buk. Olsem na yumi ken bilip tru olsem ol tok bilong en inap stiaim yumi long painim rot bilong stap amamas.
Ol man bilong raitim Buk Song i bilip tru olsem bilong man i ken stap amamas, em i mas pas gut wantaim God. Wanpela man bilong raitim song, i tok: “Man i save pret long Bikpela . . . , dispela man i ken amamas.” (Song 112:1) Amamas bilong “ol manmeri i putim Bikpela i stap God bilong ol,” dispela i winim amamas bilong man i gat ol gutpela pren, planti mani kago, o ol bikpela wok ol i bin mekim. (Song 144:15) I stap bilong planti wokboi bilong God long nau i kamapim ples klia olsem dispela tok i tru.
Wanpela em Susanne, em i gat 43 krismas samting.a Em i tok: “Planti manmeri long nau i save joinim wanpela lain we ol i ken wok wantaim long mekim wankain wok o winim sampela mak. Tasol ol i no tingim ol wan wan insait long dispela lain olsem pren bilong ol. Tasol yumi lain bilong Jehova i narapela kain. Yumi laikim tru Jehova na dispela i kirapim yumi long laikim ol arapela insait long dispela lain. Yumi save stap isi wantaim ol, maski yumi stap we. Dispela pasin wanbel i helpim i stap bilong yumi i kamap gutpela moa. Husat ol arapela i ken tok ol i gat ol pren bilong kain kain lain na sindaun na bilong ol narapela narapela kantri? Em yumi tasol, a? Mi wanpela bilong lain bilong Jehova na mi bilip tru olsem dispela i save kamapim amamas.”
Maree, mama i karim em long Skotlan, em tu i kisim save olsem, bilong yumi ken stap amamas, yumi mas pas gut wantaim Jehova. Em i tok: “Taim mi no save yet long tok i tru bilong Baibel, mi amamas long lukim ol pret muvi. Tasol bilong mi ken slip gut long nait, mi mas holim kruse long han bilong mi bilong sakim ol tewel na vempaia samting em planti bilong ol dispela muvi i stori long en. Tasol taim mi kisim save long tok i tru, na mi no lukim moa kain muvi olsem, orait pasin bilong mi long pas gut wantaim Jehova i mekim na taim mi laik slip long nait, mi no pret moa—mi amamas long mi inap mekim wok bilong God i gat bikpela strong, winim strong bilong ol dimon o ol vempaia samting mi bin lukim long ol muvi.”
Man i Bilip Long Jehova i Kisim Amamas
Man Bilong Wokim yumi em i gat bikpela save na olgeta strong. Devit i save olsem em inap bilip long Jehova na go long em bilong kisim helpim, olsem na em i tok: “Man i save bilip long God, em i ken amamas.”—Song 40:4.
Maria i tok: “Ol samting i bin painim mi long Spen na ol narapela kantri i soim mi olsem taim yumi mekim ol samting long pasin Jehova i laikim, maski yumi gat laik long mekim long narapela rot, ol samting i save kamap gutpela tasol. Na dispela i kamapim amamas, long wanem, rot Jehova i makim em i nambawan gutpela rot.”
Andreas, wanpela elda Kristen i bin mekim wok long planti kantri long Yurop, em tu i save olsem yumi inap bilip tru long Jehova. Em i tok: “Bikbrata bilong mi i no wanlotu bilong mi, na bipo, taim mi yangpela, em i wok long kirapim mi long painim wanpela wok i gat bikpela pe. Em i bel hevi taim mi kirap mekim wok autim tok fultaim na mi no kisim wok we mi inap kisim pensen bilong lukautim mi. Long ol yia mi bin mekim fultaim sevis, i no gat wanpela taim mi sot long ol samting mi mas kisim. Mi bin kisim planti gutpela blesing em ol narapela i no gat.”
Long 1993, ol i singautim Felix long helpim wok bilong skruim brens ofis bilong ol Witnes Bilong Jehova long Selters, Jemani. Taim dispela wok i pinis, ol i singautim em long go insait long famili Betel long Selters. Em i mekim wanem? “Mi orait long dispela, tasol i gat sampela samting mi gat tupela tingting long en. Tasol nau mi bin stap long Betel klostu 10-pela yia pinis, na mi bilip tru olsem Jehova i bin harim ol beten bilong mi. Em i save pinis long ol samting bilong helpim mi gut. Mi bilip strong long em na larim em i stiaim mi na dispela i givim rot long em long soim mi long ol samting em i laik bai mi mas mekim.”
Susanne, em pastaim yumi stori long en, em i laik autim tok fultaim, olsem painia, tasol i hatwok long painim pat-taim wok. Bihain long wanpela yia, maski em i no painim wok, em i bilip strong long Jehova na em i kirap mekim sampela samting. Em i tok: “Mi putim aplikesen bilong mekim wok painia oltaim. Mi bin bungim sampela mani inap long lukautim mi yet inap wanpela mun. Man! Planti gutpela samting i kamap insait long dispela mun! Wok autim tok mi mekim i givim bikpela amamas long mi, tasol maski mi wok yet long painim pat-taim wok, mi no painim. Tasol olsem Jehova i promis pinis, em i no lusim mi. Long laspela de bilong mun, mi kisim wok. Nau mi save olsem mi inap bilip tru long Jehova! Dispela namba wan ekspiriens mi kisim long fultaim sevis i mekim na i stap bilong mi i bin gutpela tru.”
Man i Bihainim Tok Kaunsel Bilong God i Ken Amamas
King Devit i bin mekim sampela bikpela rong. Em i mas kisim gutpela tok kaunsel bilong stretim em. Olsem wanem? Yumi orait long kisim ol tok bilong stretim yumi olsem Devit i bin orait long kisim?
Aida, bilong Frans, i bin save olsem em i bin mekim wanpela bikpela rong. Em i tok: “Nambawan bikpela samting mi tingim, em mi mas pas gut gen wantaim Jehova. I no gat narapela samting mi tingim i bikpela samting olsem.” Em i askim ol elda Kristen long helpim em. Inap 14 yia em i bin mekim fultaim sevis, na nau em i tok: “Mi belgut tru long save olsem Jehova i bin lusim dispela rong bilong mi!”
Sapos yumi bihainim ol tok kaunsel i kam long God, dispela inap pasim yumi long mekim rong. Judith i tok: “Taim mi gat 20 krismas, mi kirap laikim wanpela man bilong Jemani, em wanpela wanwok bilong mi. Em i wok strong long kirapim mi long laikim em. Ol narapela i rispek long em, na em i holim gutpela wok mani, na em i maritman! Mi save i gat tupela samting mi ken mekim: bihainim ol lo bilong Jehova o givim baksait long Em. Mi toktok wantaim papamama long dispela samting. Papa i tokaut stret na kolim klia ol samting Jehova i laik bai mi mas mekim. Tasol mi wok long painim rot bilong abrusim ol stiatok bilong God. Inap planti wik Mama i lusim planti aua long nait long toktok wantaim mi long ol lo bilong Jehova, ol i bikpela samting na ol i bilong helpim mi long abrusim bagarap na stap laip. Mi pilim tru dispela tok na isi isi mi go klostu gen long Jehova. Long rot bilong larim God i stretim na skulim mi, mi bin kisim bikpela amamas—inap planti yia mi bin mekim fultaim sevis na mi marit long wanpela gutpela Kristen em i laikim tru mi na Jehova.”
Tru tumas, ol dispela stori i kamapim klia olsem dispela tok bilong Devit i tru: “Sapos God i lusim pinis rong bilong wanpela man, na i rausim sin bilong em, dispela man i ken amamas. Sapos Bikpela i tok olsem, dispela man i no gat rong nau, . . . orait dispela man i ken amamas.”—Song 32:1, 2.
Man i Tingim Ol Arapela Em i Ken Amamas
Devit i tok: “Man i save tingim ol rabisman na i helpim ol, dispela man i ken amamas. Bikpela bai i helpim em long taim hevi i kamap long em. God bai i lukautim em na strongim laip bilong em.” (Song 41:1, 2) Devit i mekim gutpela pasin sori long Mefiboset, em tupela lek bilong em i nogut. Mefiboset em pikinini man bilong Jonatan, gutpela pren bilong Devit. Gutpela pasin bilong Devit long tingim ol man i gat hevi em i stap olsem gutpela piksa ol arapela i ken bihainim.—2 Samuel 9:1-13.
Marlies, em i bin mekim wok misineri inap 47 yia, em i save autim tok long ol man i bin ranawe long ol pait i bin kamap long hap bilong Afrika, Esia, na Isten Yurop. Em i tok: “Ol dispela man i gat kain kain hevi na ol i pilim olsem ol narapela i no laikim ol. Taim mi helpim kain man olsem, mi kisim bikpela amamas.”
Marina, em i gat 43 krismas samting, em i tok: “Mi singel, olsem na mi kisim strong long save olsem i gat ol narapela i stap olsem pren bilong mi bilong helpim mi. Dispela i kirapim mi long strongim bel bilong ol narapela long rot bilong ringim o raitim pas long ol. Planti i bin tok tenkyu long mi. Mi kisim bikpela amamas long helpim ol narapela.”
Dimitar, em i gat 25 krismas samting, em i tok: “Mama wanpela i mekim bikpela long mi. Taim mi stap yangpela, mi amamas taim wanpela wasman bilong Buk Stadi Bilong Kongrigesen i kisim mi i go wantaim em long olgeta wik bilong lainim mi long wok autim tok. Mi pilim yet gutpela wok em i mekim. Sampela taim mi bin les long go autim tok, tasol em i no givap.” Dimitar i pilim tru dispela helpim em i bin kisim, na nau em yet i save wok long helpim ol arapela. Em i tok: “Inap wanpela taim long olgeta mun, mi save kisim wanpela yangpela, na wanpela lapun tu, long kam wantaim mi long autim tok.”
Buk Song i kolim sampela samting moa i helpim man long stap amamas. Wanpela, em yumi mas bilip na wet long strong bilong Jehova i helpim yumi, na yumi no ken bilip long strong bilong yumi yet: “Wanem ol manmeri i save kisim strong long yu . . . ol i ken amamas oltaim.”—Song 84:5.
Corinna i save long dispela samting. Em i go sindaun long wanpela kantri we ol i sot long ol man bilong autim tok. Em i tok: “Ol man mi bungim ol i gat narapela tok ples, sindaun, na tingting. Mi pilim olsem mi stap long wanpela ples i narapela kain olgeta. Olgeta samting i nupela long mi na taim mi tingting long go autim tok, mi save pret tasol. Mi askim Jehova long helpim mi, na long strong bilong em mi inap autim tok long de olgeta long wanpela liklik ples i stap longwe long taun. Bihain, mi no pret moa long mekim olsem. Mi kirapim planti Baibel stadi, na samting mi bin mekim i wok yet long helpim mi. Mi kisim save olsem long strong bilong Jehova yumi inap winim ol hevi i laik pasim yumi.”
Yes, i gat kain kain samting i mekim na yumi ken amamas: pasin bilong stap pren bilong God na ol manmeri bilong em, bilip tru long Jehova, bihainim ol tok kaunsel i kam long God, na tingim ol arapela. Long rot bilong bihainim ol lo bilong Jehova na ol pasin em i laikim, em bai orait long yumi na yumi ken amamas.—Song 89:15; 106:3; 112:1; 128:1, 2.
[Futnot]
a Mipela i senisim sampela nem.
[Piksa long pes 12]
Maria
[Piksa long pes 13]
Maree
[Piksa long pes 13]
Susanne na Andreas
[Piksa long pes 15]
Corinna
[Piksa long pes 15]
Dimitar