Mi Go Insait Long Nambawan Gutpela Resis

Stori bilong Karl-Erik Bergman

Taim mi ron spit, dispela i save givim amamas long mi. Dispela pasin i stap long blut, olsem na dispela i kamap namba wan samting long laip bilong mi.

LONG 1972, taim mi gat 17 krismas, mi joinim wanpela spot tim. I no longtaim na mi luksave olsem sapos mi laik kamap wanpela gutpela spotman, mi mas wok hat. Maski pasin bilong ron i stap long blut, dispela tasol i no inap mekim na man i kamap wanpela sempion spitman, nogat. Olsem na mi redi long wok strong.

Taim mi gat 22 krismas, mi go insait long nesenel tim bilong Finlan. Long yia bihain, long 100 mita resis, averes spit bilong mi long ron i winim spit bilong ol narapela spitman bilong Finlan. Tasol mi bin kisim bagarap long daunbilo lek na ol masol bilong lek tu, olsem na mi no inap mekim gut samting mi laik mekim. Tasol bikpela laik bilong mi long ron i mekim na mi kamap kouts bilong trenim ol man em ol inap kamap ol gutpela spotman bilong ron samting. Long 1982, mi tingting long i go sindaun long California long Amerika bilong stadi long wanpela yunivesiti, em dispela ples i no kol tumas, bilong mi ken wok fultaim long spot. Mi baim pinis tiket bilong balus.

Samting i Senisim Laip Bilong Mi

Long wanpela apinun, paslain liklik long mi go long California, belo long dua bilong mi i ring. Mi opim dua na mi lukim tupela meri, em ol i Witnes Bilong Jehova. Tupela i stap isi na ol i no pret, em pasin ol spotlain i mas i gat. Mi singautim ol i kam insait, na mipela i sindaun bilong toktok. Bihain long taim ol i stori gut wantaim mi, ol i lusim wanpela buk nem bilong en, Yu Inap i Stap Oltaim long Paradais long Graun.a Mi kirap ritim dispela buk. Taim mi kamap long namel bilong buk, mi luksave olsem tok dispela buk i kamapim, em tok i tru. Tupela meri i kam bek lukim mi, na mi askim ol long olsem wanem mi inap kamap wanpela Witnes Bilong Jehova. Ol i tok mi mas stadi long Baibel.

Mi orait long stadi long Baibel, na tu, mi kirap long i go long ol miting wantaim ol Witnes long Haus Kingdom long Vantaa, em ples mi stap long en. Mi kisim save olsem samting ol i skulim mi long en i kam long Baibel. Tru tumas, ol tok i tru bilong Baibel em mi wok long lainim, isi isi ol i senisim tingting bilong mi long wanem samting i bikpela samting long laip. Olsem na mi go long ol lain i salim ol balus tiket, na givim bek tiket na kisim mani bilong mi. Mi yusim hap mani bilong baim jaket na trausis bilong werim i go long ol miting na wanpela brifkeis bilong pulimapim Baibel na ol nius bilong Baibel. Long 1983, mi kisim baptais olsem wanpela Witnes Bilong Jehova long wanpela kibung long Helsinki.

Ol Narapela Spotman i Bihainim Mi

Taim mi wok long kisim save long ol tok i tru bilong Baibel, mi amamas long serim dispela save wantaim ol pren bilong mi. Ol i no inap bilip long samting mi mekim. Kwiktaim tok win i raun olsem tingting bilong mi i paul. Isi isi, ol pren bilong mi i kirap long abrusim mi. Bihain long taim mi kisim baptais, mi save bungim yet ol wanlain spotman long ples spot, long wanem, mi save go long hap na eksasais bilong stap fit. Taim mipela i toktok wantaim, dispela i helpim ol long luksave olsem maski mi bin senis, tingting bilong mi i no paul.

Isi isi, sampela bilong ol dispela spotlain i pilim olsem ol tok mi mekim i klia na i gutpela bilong skelim. Ol i luksave olsem mi no save tok nogut moa na pasin bilong mi i no raf moa. Sampela bilong ol i amamas long kisim save moa long tok bilong Baibel. Mi amamas long soim long ol narapela olsem Baibel i tok laip bilong Kristen i kain olsem wanpela spot resis. Yumi stap insait long wanpela resis bilong kisim prais bilong laip oltaim.​—⁠2 Timoti 2:5; 4:​7, 8.

Tru tumas, as bilong laip na amamas tru i no kam long rot bilong winim wanpela spot resis, nogat, em i kam long rot bilong mekim ol samting Man Bilong Wokim yumi i laikim. Ol toktok mi mekim wantaim ol narapela spotlain, i kirapim sampela long skelim gen ol mak ol i laik winim, na sampela i kirap bihainim ol tok i tru bilong Baibel we i bin senisim laip bilong mi. Mi amamas long lukim olsem planti bilong ol i givim bel long mekim wok bilong God, wankain olsem ol i bin givim bel long pilai spot.

Wanpela bilong ol em Yvonne, em hapmeri bilong ran long 800 mita resis. Long Skandinevia em i nambawan spitmeri tru long 800 mita resis, na em i holim nesenel rekod bilong Finlan. Em i makim Finlan na winim sampela prais long ol spot pilai long Yurop. Ol toktok mipela i mekim i kirapim Yvonne long luksave olsem pasin bilong kisim biknem long dispela graun i no gat as bilong en. Em i kisim save olsem, dispela graun bai pinis, olsem Baibel i tok, na God bai kamapim nupela taim hia long graun.​—⁠1 Jon 2:⁠17.

I no longtaim na Yvonne i kirap stadi long Baibel. Long dispela taim em i prenim Jouko, em i gutpela spotman bilong nesenel trek tim bilong Finlan. Em i bin makim Finlan long sampela bikpela spot pilai long Yurop na long ol narapela hap tu. Bihain, Yvonne na Jouko i go sindaun long Amerika bilong insait fultaim long spot.

Long Amerika, Yvonne i wok yet long stadi long Baibel, na Jouko i joinim em. Em i kirap stadi bilong painim sampela rong long ol tok Yvonne i wok long lainim na bilong helpim Yvonne long kisim bek stretpela tingting. Tasol isi isi, ol tok i tru bilong Baibel i go daun long bel bilong Jouko tu. Yvonne na Jouko i marit na bihain ol i dediketim laip bilong ol long God, na kisim baptais long wara bilong makim olsem ol i dediket pinis. Long nau, tupela wantaim i mekim wok painia, em nem bilong ol Witnes Bilong Jehova i save autim tok fultaim.

Mi bin kirapim Baibel stadi wantaim Barbro tu, em sempion bilong Finlan long 400 mita resis bilong ol meri. Em i bin makim Finlan long sampela spot pilai long Yurop. Barbro na man bilong em, Jarmo​—⁠em bipo em i save pilai spot pol-volt​—⁠ol i go sindaun long Swiden. Long hap, Barbro i wok yet long stadi long Baibel, na Jarmo tu i joinim em. Tupela wantaim i laik save long as tru bilong laip, na bihain long ol i lainim ol tok i tru bilong Baibel, tupela wantaim i kisim baptais long Swiden. Bihain, Jarmo i kamap fisioterapis, na tupela wantaim i givim bel long autim tok. Nau Jarmo em i wanpela elda long kongrigesen Kristen.

Na tu, i gat Heidi, em i wanpela tineja, na em tu i hapmeri bilong ron. Mi kouts bilong em, na mi luksave olsem em i gat laik long kisim save long God. Olsem na long wanpela taim mi toktok wantaim em long ol tok Baibel i mekim long Kingdom Bilong God na ol blesing Kingdom bai kamapim long graun. Mi askim em, “Yu bilip yumi inap kisim ol dispela blesing?”​—⁠Song 37:​11, 29; Matyu 6:​9, 10.

Em i tok: “Yes.” Em i laik stadi long Baibel. So mi stretim rot long wanpela sista Kristen i ken stadi wantaim em. Bihain long sampela yia, Heidi tu i kisim baptais long wara bilong makim olsem em i dediket pinis long God. Bihain, em i kamap gutpela meri i strong long ol samting bilong spirit, na em i kamap meri bilong mi. Em i gutpela poroman tru na em i holim strong laik bilong em long mekim wok bilong God. Sapos em i bin holim strong laik bilong mekim spot, em inap kamap wanpela gutpela spotmeri tru.

Liklik brata bilong mi, Peter, em tu i insait long spot. Pastaim em i no bin amamas taim mi kirap stadi long Baibel. Mi givim em buk Stap Oltaim. Bihain em i kam long mi na tok: “Mi kirap ritim dispela buk, tasol mi no kliagut long olgeta tok bilong en. Inap yu helpim mi?” Mi stretim rot long wanpela Witnes i ken stadi wantaim em, na bihain long em i bin stadi inap fopela mun, em i kisim baptais. Bihain em i marit, na em wantaim meri bilong em i mekim wok painia.

Resis i Go Yet

Paslain long mi kisim baptais, mi wokim tingting pinis olsem mi laik kamap wanpela misineri. Bihain liklik long mi baptais, mi kirap mekim wok painia. Mi kliagut olsem sapos mi laik insait long resis bilong kisim laip, mi mas wok strong tru. Mi na meri bilong mi, Heidi, i putim aplikesen bilong go long Skul Gileat, em skul bilong ol misineri bilong ol Witnes Bilong Jehova long New York, na long 1994 mipela i go long dispela skul. Bihain long gretiuesen bilong mipela, ol i makim mipela long i go long Latvia, we ol i save mekim tokples Rasia.

Taim gavman bilong Soviet Yunion i pundaun, dispela i mekim na ol manmeri i paul nabaut. Bipo gavman i bin daunim na tambuim Baibel, tasol mipela i lukim olsem planti manmeri i laik save Baibel i tok wanem. Lainim tokples Rasia, em wanpela bilong ol bikpela hatwok mi bin mekim. Tasol bihain long mipela i bin mekim wok misineri inap 6-pela yia long Latvia, ol i makim mi long visitim na strongim ol kongrigesen bilong ol Witnes Bilong Jehova olsem wanpela wasman raun. Mi mekim yet dispela wok, wantaim gutpela meri bilong mi.

Insait long planti yia, mi bin helpim planti long ron gut long resis bilong kisim laip, em “laip tru” long nupela taim God bai kamapim. (1 Timoti 6:19) Bilong koutsim ol spotlain long kamap ol gutpela spotman tru, yu mas save gut long ol. Kouts i mas helpim ol long mekim gut moa samting ol i gat save long mekim, na daunim ol samting ol i no gutpela long en. Em i mas strongim ol long wok strong i go yet na kamap gutpela spotman tru.

Mi kirap nogut long lukim olsem planti samting long laip bilong Kristen i wankain long spotman, olsem aposel Pol i kamapim klia long namba wan pas em i raitim long ol Korin. Gutpela spotman i givim bel olgeta long trening, na em i no driman tasol long winim resis. Em i putim ol mak em inap winim, na i wok strong long inapim ol dispela mak. Sapos em i no tingim moa mak em i laik winim na i no wok strong bilong inapim dispela mak, orait olgeta hatwok em i bin mekim bai lus nating. Na olsem tasol, trupela Kristen i mas givim bel olgeta long mekim wok Kristen.

Gutpela spotman i mas bosim em yet na kisim ol gutpela kaikai tasol. Na i wankain tu long trupela Kristen. Em i no kisim kaikai long “tebol bilong ol spirit nogut,” olsem aposel Pol i tok, na bagarapim tingting bilong en long ol tok i kirapim ol man long mekim pasin nogut. Nogat. Em i kisim gutpela kaikai bilong spirit em God i givim long rot bilong Baibel, em Tok bilong em. (1 Korin 10:21) Na tu, taim ol hevi i kamap, gutpela spotman i holim yet stretpela tingting. Em i tokaut long ol popaia bilong em na i stretim. Pol i tok: ‘Mi mekim olsem man i ran strong, na i no save lukluk nabaut. Mi save paitim tru bodi bilong mi.’ Pol i tok olsem, long wanem, nogut em i no inap stap moa long resis.​—⁠1 Korin 9:​24-27.

Bilong stap fit na helti, mi na meri bilong mi i save go long jim long eksasais. Tasol mipela i no larim dispela i pasim mipela long mekim wok bilong Jehova, husat i bin wokim gut bodi bilong yumi ol man. (Song 139:14) Mitupela i givim bel long winim prais bilong kisim “laip tru”​—⁠em dispela laip yumi “bai kisim bihain” long nupela taim God bai kamapim.​—⁠1 Timoti 4:⁠8.

Bihain long aposel Pol i stori long “bikpela lain manmeri ol i olsem bikpela klaut” em ol i bin stap paslain long taim bilong ol Kristen, em i tok: “Yumi tu mas lusim olgeta samting i putim hevi long yumi na dispela sin i save pasim yumi. Na yumi mas sanap strong na ran long dispela resis God i makim bilong yumi.” (Hibru 12:​1, NW ) Yumi mas ran long dispela resis, i no gat narapela samting i winim dispela, long wanem, ol man i pinisim dispela resis, olgeta bai kisim ol blesing bilong i stap oltaim.​—⁠2 Timoti 4:​7, 8.

[Futnot]

[Piksa long pes 14]

Long 1985 samting, Heidi na mi wantaim Yvonne long baksait na Jouko wantaim pikinini meri bilong ol long fran

[Piksa long pes 15]

Mi na Heidi i autim tok long nau

[Piksa long pes 15]

Long kibung distrik bilong ol Witnes Bilong Jehova long 2009 long Helsinki, Yvonne na Jouko long han kais bilong mipela, na Jarmo na Barbro long han sut bilong mipela

[Piksa Kredit Lain long pes 12]

Published in Aamulehti 8/21/1979