Nius i Kam Long Olgeta Hap
Maunten Kilimanjaro, em nambawan bikpela maunten bilong Afrika, na “inap 26 pesen bilong ais i karamapim dispela maunten i pinis namel long 2000 na 2007.”—DAILY NATION, KENYA.
Long Ajentina, long olgeta 10-pela 10-pela bel mama, inap 9-pela i no bin laik kisim bel.—CLARÍN, AJENTINA.
Nambawan longpela haus taua long graun, em Burj Khalifa, ol i dediketim long Dubai long las Janueri. Haus i go antap inap 828 mita, em i gat winim 160 plua, na ol man i stap longwe inap 95 kilomita ol inap lukim dispela haus.—GULF NEWS, YUNAITET ARAB EMIRETS.
Yu Ting Gan Inap Lukautim Man?
Yu ting gan i save lukautim man husat i karim gan taim wanpela i kam pait long em? Wanpela yunivesiti (University of Pennsylvania School of Medicine) long Amerika i kisim save olsem, planti taim gan i no lukautim man. Ol saveman i kisim save olsem man husat i karim gan, “narapela inap sutim em long pait samting, winim ol man husat i no karim gan inap 4.5 taim.” Insait long dispela namba, ol i no kaunim ol taim we polis i yusim gan, o man i sutim em yet, o man i popaia na sutim narapela. Save ol i kisim i soim olsem sampela man husat i gat gan, gan bilong ol inap lukautim ol, tasol dispela i no makim olsem planti taim gan bai lukautim man. Ripot i tok, dispela tingting bilong ol man olsem sapos ol i gat gan, dispela “bai lukautim ol taim birua i painim ol, em samting yumi mas toktok long en na skelim gut.”
Ol Tren Bilong Ol Meri Tasol
Inap planti yia, ol meri husat i raun long ol tren i pulap tru long ol woklain long India, ol i mas karim hevi long ol man i toknogutim ol, holim skin bilong ol, pinsim ol, lukluk strong long ol, na givim narapela hevi long ol. Niuspepa The Telegraph bilong Calcutta i tok, planti meri i komplein, olsem na gavman i wokim disisen long tambuim ol man long kalap long sampela tren. Dispela i mekim, na long fopela bikpela siti long India—New Delhi, Mumbai, Chennai, na Calcutta—i gat sampela tren bilong ol meri tasol. Ol i tok ol pasindia i amamas tru.
Ol Bebi i Save Krai Long Wanem Tokples?
Ol saveman long Yunivesiti Bilong Würzburg, long Jemani, i kisim save olsem, long namba tu de bilong bebi i stap laip, krai bilong em i bihainim nek bilong tokples bilong papamama. Ol saveman i rekodim krai bilong 30 nupela bebi bilong Frans na Jemani, na ol i skelim krai bilong nek, na olsem wanem nek i go antap na i go daun. Krai bilong ol bebi Frans i kirap daunbilo na bihain krai i go antap, na krai bilong planti bebi Jeman i kirap antap na i go daun, tupela lain bebi wantaim i bihainim krai bilong tokples bilong papamama bilong ol. Olsem na ol saveman i ting olsem ol bebi i kirap lainim tokples taim ol i stap yet long bel bilong mama, na tokples bilong ol bebi i kirap taim ol i stat long krai.