Wanpela Man i Laik Kisim Save

● Yu laik bai ol man i tingim yu olsem wanem kain man? Taim ol man i tingim yu, ol bai tingim wanem samting? Planti i wari long wanem kain nem ol bai kisim em ol man bai tingim bihain, olsem na ol i gat bikpela laik long kisim nem long saiens, wok politik, spot, o droim ol piksa samting. Tasol olsem wanem sapos ol man i tingim yu long ol askim yu bin kamapim?

Inap 500 yia i go pinis, wanpela man long Sentral Amerika i mekim planti askim i kirapim tingting. Nem bilong em Nicarao na em i bin stap olsem wanpela hetman. Ating kantri “Nikaragua” i kisim nem bilong en long dispela man. Nem bilong em i kamap nem bilong klen bilong em, bilong hap em i bin sindaun long en, na bilong bikpela raunwara bilong ol.

Klen bilong Nicarao i bin stap long hap graun namel long solwara Pasifik na bikpela raunwara Nicaragua. Bihain liklik long Columbus i painim pinis Amerika, ol man Spen i kam raun lukim dispela hap. Kepten Gil González Dávila i kisim ami bilong em long kantri nau ol i kolim Kosta Rika na i go long hap not long ples bilong Nicarao long 1523 C.E.

Ating ol dispela man i tingting planti taim ol i go raun long ol hap ol i no save long en. Tasol taim ol i bungim hetman Nicarao, ol i amamas tru! Long dispela taim bipo na long nau tu, ol manmeri bilong Nikaragua i gat pasin bilong givim samting. Ol i bin givim ol presen long ol dispela man Spen, na ol i bin givim bikpela hap gol tu.

Nicarao i laik kisim bekim bilong ol askim em i bin tingting long en inap longtaim pinis. Taim ol man Spen i kam raun, dispela i kirapim em long kamapim ol narapela askim tu. Ol man bilong raitim ol stori i tok, Nicarao i bin askim Kepten González olsem:

Yu bin harim stori bilong bikpela tait i bin bagarapim olgeta manmeri na ol animal? God bai kamapim tait wara gen long dispela graun? Wanem samting i painim ol man i dai pinis? Olsem wanem san, mun, na ol sta i wokabaut? Olsem wanem ol i stap long skai antap? Ol i stap longwe olsem wanem? Long wanem taim bai san, mun, na ol sta i no lait moa? Win i kam we? Wanem samting i mekim ples i hat na kol, na i mekim ples i lait na tudak? Bilong wanem longpela bilong ol de i no wankain long yia olgeta?

I klia tru olsem Nicarao i laik save long ol samting bilong graun na ples antap. Ol askim bilong em i kamapim klia ol samting bilong lotu em i bilip long en. Ol dispela askim i soim olsem em i gat laik long save long ol wankain samting em planti man long nau tu i laik save long en na i tingting planti long en. Nicarao na ol lain bilong em i save olsem bikpela tait i bin kamap long graun, na dispela i kirapim yumi long tingim stori bilong Baibel long dispela samting.—Stat 7:17-19.

Lain bilong Nicarao i insait tru long wok bilong ol spirit nogut na ol i save kilim ol man i dai olsem ofa, tasol em i tingting planti long pasin na wokabaut bilong lain bilong em. Ol askim bilong em i soim olsem ol man i gat maus bilong bel. Aposel Pol i tok long dispela samting olsem: “Maus bilong bel bilong ol tu i tokaut na i skelim ol. Na taim ol i tingting long dispela, orait tingting bilong ol yet bai tok ol i gat asua o ol i no gat asua.”—Rom 2:14, 15.

Long nau, stetiu bilong Hetman Nicarao i stap klostu long hap we ol man i ting em i bin bungim ol man Spen long fes taim. Laik bilong em long kisim save i kirapim em long tingim tingim ol samting bilong laip na bilong graun na ples antap, na dispela pasin bilong em i stap gutpela piksa long yumi ken bihainim.—Rom 1:20.

[Mep long pes 13]

(Bilong save ol dispela rait i stap we long pes, lukim buk o magasin)

Nikaragua

SAUT AMERIKA

SOLWARA ATLANTIK