NIUS I KAM LONG OLGETA HAP

Galf bilong Meksiko

Long Epril 2010, eksiden i kamap long taua bilong drilim oil, na klostu 3-pela mun bikpela hap oil na ges i kapsait i go long solwara. Wok painimaut bilong wanpela lain saveman i soim olsem inap 2 na hap mun bihain long dispela, sampela marasin nogut i no stap moa. Ol i ting sampela baktiria i pinisim dispela marasin nogut. Tasol sampela saveman i gat tupela tingting long dispela. Ol i ting bikpela hap oil i sink i go daun long as bilong solwara.

Rasia

Niuspepa Rossiiskaya Gazeta i tok, wanpela ripot i soim olsem inap 59 pesen bilong ol Rasia husat i gat 18 i go inap 35 krismas, ol i bilip olsem “bilong ol samting long laip i ken kamap gutpela, sampela taim yu mas sakim ol lo na stiatok bilong stretpela pasin.”

Peru

Sampela olpela kon ol i painim (olsem i stap long piksa antap) i kamapim olsem sampela lain bilong noten Peru i bin wokim popkon na kon plaua inap 3,000 yia i go pinis.

Itali

Lucio Soravito De Franceschi, em Katolik bisop bilong Adria-Rovigo, em i ting ol lotu i mas autim tok “stret long ol manmeri” long hap ol manmeri i stap long en. Em i tok: “Yumi pris i mas paitim dua bilong haus bilong ol man na maski long paitim belo bilong sios.”

Saut Afrika

Taim ol i salim long blak maket marasin ol i bin wokim long kom bilong rainoseros, ol i kisim 65,000 dola (U.S.) long wanpela kilo. Long 2011, long Saut Afrika tasol, ol i bin kilim i dai inap 448 rainoseros. Ol raskol i bin brukim ol haus musium samting long Yurop bilong painim kom bilong ol raino. Ol man i ting ol raskol inap bagarapim tu ol rainoseros i stap long ol banis bilong ol animal long Yurop.