NIUS I KAM LONG OLGETA HAP
Nius Bilong Afrika
Planti oganaisesen na ol man i mekim kain kain wok bilong helpim i stap bilong ol man bilong Afrika. Tasol dispela i no helpim ol liklik, ol hevi bilong ol man long Afrika i go bikpela moa.
Kilim i Dai Ol Raino
Long 2007 ol man long Saut Afrika i bin hait na kilim i dai 13 raino. Tasol long 2013 dispela namba i go antap, ol i kilim i dai 1,004 raino. Ol man i bin salim planti kom bilong raino, tasol pe bilong en i go antap winim pe man i kisim taim em i salim 1 kilogram bilong gol. Ol man inap salim wanpela kom bilong raino long 5 handret tausen dola.
TINGIM: Yu ting ol gavman bai pinisim pasin bilong sakim lo?—Jeremaia 10:23.
Ol Man i Kisim Grismani
Lain Transparency International i tok, planti man long ol kantri bilong Is Afrika i gat pasin bilong kisim grismani winim ol narapela kantri long graun olgeta. Maski i olsem, klostu 90 pesen bilong ol man i bungim hevi bilong kisim grismani i no bin tokaut long dispela samting. Mausman bilong wanpela oganaisesen long Kenya i tok: “Ol sitisen bilong kantri i no trastim ol gavman, olsem na i no gat wanpela i bin tokaut long pasin korapsen.”
BAIBEL I TOK: “Man i laik grisim yupela long mani . . . orait yupela i no ken kisim dispela mani. Long wanem, dispela kain pasin i save paulim tingting bilong gutpela man.”—Kisim Bek 23:8.
Lain Afrika i Yusim Intenet
Lain International Telecommunication Union i tok, long pinis bilong yia 2014 klostu 20 pesen bilong ol man long Afrika bai yusim Intenet. Namba bilong ol man long Afrika i baim ol fon na laptop samting bilong yusim Intenet i go antap winim ol arapela kantri long graun olgeta.