Bilong Wanem Pasin Bilong Paulim Mani i Go Bikpela?
“SAPOS MAN I LAIK GRISIM YUPELA LONG MANI BILONG KIRAPIM YUPELA LONG MEKIM TOK GIAMAN LONG KOT, ORAIT YUPELA I NO KEN KISIM DISPELA MANI. LONG WANEM, DISPELA KAIN PASIN I SAVE PAULIM TINGTING BILONG GUTPELA MAN, NA PAULIM KOT BILONG MAN I NO BIN MEKIM RONG.”—Kisim Bek 23:8.
INAP 3,500 yia i go pinis, Lo Bilong Moses i tambuim pasin bilong kisim grismani. Long ol handet handet yia bihain long dispela taim, i gat planti lo i tambuim pasin bilong paulim mani samting. Tasol ol dispela lo i no bin daunim dispela pasin. Long olgeta de, planti milion man i save kisim na givim grismani na dispela i save mekim nogut long planti bilion manmeri.
Pasin bilong paulim mani i kamap bikpela long olgeta hap na i laik bagarapim sindaun bilong olgeta manmeri. Long sampela kantri, sapos man i laik bai narapela i helpim em long wanpela samting, orait pastaim em i mas grisim em long mani. Long rot bilong grismani, ol man i gat namba bai orait long man i winim tes long skul, o kisim laisens bilong draivim ka, o kisim kontrak bilong baim o wokim wanpela bikpela samting, o winim kot. Wanpela loya bilong Paris, em Arnaud Montebourg, i tok: ‘Pasin bilong paulim mani i olsem smok nogut na i bagarapim bel bilong ol man.’
Pasin bilong kisim grismani i save insait moa yet long ol wok bisnis. Sampela kampani i save brukim winmani bilong ol i go 3-pela hap na ol i makim wanpela hap bilong grisim ol bikman nogut bilong gavman. Wanpela nius bilong Briten (The Economist) i tok, long olgeta yia ol kantri i save tromoi 25 bilion dola long ol samting bilong pait, tasol 10 pesen bilong dispela mani i olsem grismani bilong grisim ol narapela kantri long baim. Dispela pasin i wok long go bikpela, na samting nogut i kamap long dispela i wok long go nogut moa yet. Insait long 10-pela yia i go pinis, pasin wantok ol bisnis i mekim i bin bagarapim sampela kantri long ol samting bilong mani.
Ol man i kisim nogut tru long dispela pasin bilong paulim mani, em ol rabisman—em ol man i no gat mani bilong grisim narapela. Nius (The Economist) i tok, ‘pasin bilong paulim mani em i wanpela kain pasin bilong daunim ol man nating na mekim nogut long ol.’ Olsem wanem? Yu ting i gat rot bilong daunim dispela kain pasin, o yu ting pasin bilong paulim mani bai stap long olgeta taim? Bilong bekim dispela askim, pastaim yumi mas skelim sampela bikpela samting i olsem as bilong pasin bilong paulim mani.
Wanem Sampela As Bilong Pasin Bilong Paulim Mani?
Yu ting i gat wanem as na ol man i laik bihainim pasin bilong paulim mani samting na ol i no bihainim pasin i stret? Long sampela, ating pasin bilong paulim mani em wanpela rot i no gat hatwok long en—o i no gat narapela rot—bilong ol i ken kisim ol samting ol i laikim. Na sampela taim, ating grismani em i wanpela rot bilong ol i ken abrusim strafe. Planti man, taim ol i lukim ol bikman bilong politik, na ol polis, na ol jas, i larim ol narapela i kisim grismani o paulim mani, o ol yet i mekim dispela pasin, ol i kirap na bihainim pasin bilong ol.
Taim pasin bilong paulim mani i go bikpela hariap, planti man moa i save orait long en na ol yet i kirap na mekim. Ol man i save kisim liklik pe tasol long wok mani bilong ol, ol i pilim olsem i no gat narapela rot bilong kisim sampela mani moa. Ol i ting ol i mas singaut long grismani na bai ol inap lukautim ol yet long kaikai samting. Na taim ol man i lukim olsem ol man i singaut long grismani o givim grismani ol i no kisim strafe long en, dispela i mekim na ol i save les long daunim dispela pasin nogut. King Solomon i tok: “Ol man i no kisim bekim kwiktaim long rong bilong ol, olsem na dispela i kirapim tingting bilong ol manmeri na ol i strong long mekim pasin nogut.”—Saveman 8:11.
I gat tupela strongpela samting i wok yet long kirapim ol man long bihainim pasin bilong paulim mani: pasin bilong tingim ol yet tasol na pasin bilong mangal long mani. Ol man i tingim ol yet tasol, ol i no tingim pen na hevi ol narapela i save kisim long pasin bilong ol long paulim mani, na ol i orait long dispela pasin, long wanem, dispela i helpim ol yet. Taim ol i kisim moa moa ol samting bilong skin, ol i wok long mangal moa moa yet long kisim mani. Solomon i tok: “Sapos bel bilong man i skrap long kisim planti mani, orait oltaim bai em i ting em i sot long mani. Sapos man i tingting long kamap maniman, orait olgeta samting em i kisim i no inapim em.” (Saveman 5:10) Tru, pasin bilong mangal em i wanpela rot bilong kisim planti mani, tasol man i mekim dispela pasin em i orait tasol long pasin bilong paulim mani na brukim lo.
Narapela samting yumi mas tingim em wok bilong hetman bilong dispela graun em yumi no inap lukim. Baibel i tok dispela man em Satan. (1 Jon 5:19; KTH 12:9) Satan i wok strong long kirapim ol man long bihainim pasin bilong paulim mani samting. I no gat wanpela bikpela samting long bipo i winim samting Satan i laik grisim Krais long en. Em i tok: ‘Sapos yu brukim skru na lotu long mi, bai mi givim yu olgeta strongpela kantri bilong dispela graun.’—Matyu 4:8, 9.
Tasol Jisas i no larim wanpela samting i grisim em, na em i lainim ol disaipel bilong em long ol tu i mas mekim olsem. Yu ting ol tok Jisas i lainim ol man long en inap pinisim pasin bilong paulim mani long nau? Stori i kam bihain long dispela bai skelim dispela askim.