Pasin Korapsen—I Go Bikpela Olsem Wanem?
“Kampani bilong mipela i save mekim ol wok bilong wanpela bikman bilong gavman long hap bilong mipela. Planti taim mipela i mas wet inap 2-pela o 3-pela mun bilong kisim pe bilong ol dispela wok. Tasol i no longtaim i go pinis, wanpela wokman bilong gavman i ringim mi. Em i tok em bai hariapim wok bilong peim mipela sapos mipela i orait long givim sampela hap bilong dispela mani long em.”—JOHN.a
OLSEM WANEM? Yu bin karim hevi bilong pasin korapsen? Ating hevi yu karim i no wankain long hevi yumi stori long en antap, tasol ating yu bin pilim ol samting nogut em pasin korapsen i bin kamapim.
Wanpela lista (2011 Corruption Perception Indexb) bilong lain Transparency International i tok, ‘long 183 kantri na ples em ol i bin skelim, planti bilong ol i insait tru long pasin korapsen.’ Inap 2-pela yia i go pinis, lain Transparency International i tokaut long ripot bilong ol bilong yia 2009 long korapsen i stap long olgeta hap, na i tok: “I klia tru olsem i no gat wanpela hap bilong graun i stap fri long ol samting nogut em pasin korapsen i save kamapim.”
“Pasin korapsen em taim man i mekim nabaut long namba ol man i givim long em bilong helpim em yet tasol. Dispela i save nogutim laip, sindaun, na amamas bilong ol man em ol i mas kisim helpim long dispela man i holim namba.”—TRANSPARENCY INTERNATIONAL
Sampela taim, pasin korapsen inap kamapim ol bikpela hevi tru. Olsem, nius Time i tok, “pasin korapsen na keles pasin” em wanpela bilong ol samting i stap olsem as na planti man tru i bin dai long bikpela guria i bin kamap long Haiti long 2010. Nius i tok moa olsem: “Ol i sanapim planti bilding, tasol ol konstraksen kampani i no kisim stret plen na disain bilong haus long ol ensinia, na taim ol inspekta bilong gavman i kam bilong sekim wok, ol i save givim planti grismani long ol.”
Yu ting i gat rot bilong pinisim tru pasin korapsen? Bilong bekim dispela askim, yumi mas kliagut long ol samting i stap olsem as tru bilong pasin korapsen. Bai yumi stori long dispela long atikol i kamap bihain.
a Mipela i senisim nem.
b “Long Corruption Perception Index, ol i listim nem bilong ol kantri em gavman bilong en na ol dipatmen bilong gavman i insait tru long pasin korapsen.”—Transparency International.