Pasin Korapsen Long Wok Gavman

Ol man i tok ol bikman bilong gavman i save yusim namba bilong ol long helpim i stap bilong ol. Long bipo yet Baibel i gat lo i tambu long man i kisim grismani long kot, na dispela i soim olsem pasin korapsen i stap winim 3,500 yia. (Kisim Bek 23:8) Dispela pasin bilong ol man long mekim wok nogut long namba bilong ol i stap i kam inap long nau. Pasin korapsen i no makim pasin bilong kisim grismani tasol, nogat. Sampela taim ol bikman i save kisim nating ol samting, yusim ol samting bilong gavman em ol i no gat rait long en, na ol i save stilim mani bilong gavman. Na tu, ol i save mekim wansait pasin long helpim ol pren na wanblut bilong ol.

Pasin korapsen i stap long ol oganaisesen bilong ol man, tasol moa yet long wok gavman. Long 2013, lain Transparency International i raitim nius Global Corruption Barometer, na ol i tokaut olsem i gat 5-pela lain i winim ol narapela lain long pasin korapsen. Dispela ol lain em lain politik, ol polis, ol bikman bilong gavman, ol man i gat namba long wokim ol lo bilong kantri, na ol jas bilong haus kot. Yumi ken skelim sampela ripot i kamapim klia dispela hevi.

• AFRIKA: Long 2013 kot i sasim klostu 22,000 wokman bilong gavman long Saut Afrika long pasin korapsen.

• SAUT AMERIKA: Long 2012, kot i sasim 25 man long Brasil bikos ol i yusim mani bilong gavman long baim ol man long sapotim wok politik bilong ol. Wanpela bilong ol em man husat i bin stap olsem nambawan presiden na em i gat bikpela namba tru long kantri long 2003 i go 2005.

• ESIA: Long 1995, long Seoul, Saut Korea, 502 manmeri i dai taim wanpela bikpela stua i pundaun. Ol man bilong skelim dispela bikpela bagarap i painimaut olsem ol bikman bilong gavman i kisim grismani na ol i larim ol kontrakta long yusim simen i gat liklik pe long wokim dispela haus. Ol i kalapim lo bilong gavman taim ol i mekim olsem.

• YUROP: Cecilia Malmström, em bikmeri bilong lain European Commission Home Affairs i stori long samting i kamap long Yurop na em i tok: “Pasin korapsen i go bikpela tru na i luk olsem ol bikman bilong politik i no strong long pinisim dispela pasin insait long wok gavman.”

Ol man bilong graun i no inap tru long pinisim pasin korapsen insait long gavman. Profesa Susan Rose-Ackerman em wanpela savemeri i tok, bilong daunim dispela pasin “i mas i gat sampela bikpela senis tru long pasin gavman i save mekim long sait bilong wok bisnis.” Maski i luk olsem i no gat rot bilong pinisim pasin korapsen, Baibel i soim yumi olsem bihain bai i gat sampela bikpela senis we bai kamap bilong pinisim pasin korapsen.