Kingdom Bilong God—Wanpela Gavman i No Gat Korapsen

Ating yu bai wanbel long dispela tok olsem sapos wanpela kantri i gat pasin korapsen, orait wok gavman bilong en tu bai gat dispela pasin. Sapos olsem, orait i mas i gat wanpela gavman i no gat pasin korapsen. Baibel i stori long kain gavman olsem, em Kingdom Bilong God. Em dispela gavman Jisas i bin skulim yumi long beten long en.—Matyu 6:9, 10.

Kingdom Bilong God em wanpela gavman i stap long heven. Em bai bagarapim olgeta gavman bilong dispela graun, na gavman bilong em bai bosim graun olgeta. (Song 2:8, 9; Revelesen 16:4; 19:19-21) Wanpela gutpela samting dispela Kingdom bai mekim em long pinisim pasin korapsen long wok gavman. Yumi ken skelim 6-pela samting em Kingdom bai mekim bilong pinisim olgeta gavman bilong graun.

1. STRONG

AS BILONG HEVI: Ol sitisen bilong kantri i save givim olkain takis long gavman na bai ol inap lukautim kantri. Oltaim ol i save kisim ol takis na dispela i mekim na sampela wokman bilong gavman i laik stil, na sampela arapela i save kisim grismani long ol man husat i laik bai ol i katim pe bilong takis o ol narapela mani em ol i mas peim long gavman. Olsem na gavman i mas apim pe bilong takis bilong inapim mani em ol i bin yusim, na dispela bai mekim pasin korapsen i go bikpela. Long ol kain kantri olsem, ol man i laik bihainim stretpela pasin i save kisim bikpela hevi moa.

ROT BILONG STRETIM: Jehova, em God i gat olgeta strong i bosim dispela Kingdom.a (Revelesen 11:15) Dispela Kingdom i no inap long kisim takis long ol man bilong mekim ol wok, nogat. God “i gat olgeta strong” i save givim planti gutpela samting long ol narapela, olsem na yumi ken bilip tru olsem Kingdom bai lukautim ol manmeri husat i stap aninit long en.​—Aisaia 40:26; Song 145:16.

2. HETMAN

AS BILONG HEVI: Savemeri Susan Rose-Ackerman, em yumi bin stori long en i tok, bilong pinisim pasin korapsen, “ol bikman bilong gavman i mas bihainim stretpela pasin.” Ol bikman bilong gavman i traim long pinisim pasin korapsen namel long ol polis o ol lain i wok long kastoms, tasol ol i larim ol bikman bilong gavman i mekim pasin korapsen na dispela i mekim na ol man i no trastim gavman. Maski wanpela hetman i traim long bihainim ol stretpela pasin, em i no inap long mekim olsem, long wanem, em i gat sin. Olsem Baibel i tok: “I no gat wanpela stretpela man i save mekim gutpela pasin oltaim.”—Saveman 7:20.

ROT BILONG STRETIM: Jisas Krais, em gutpela man olgeta na God i bin makim em long i stap King bilong Kingdom, olsem na em bai i no tingting liklik long giamanim ol man. Jisas i kamapim klia dispela pasin taim em i sakim traim bilong Satan long kisim “olgeta kingdom bilong graun wantaim ol nambawan gutpela samting bilong ol.” Satan em hetman bilong dispela graun i tokim Jisas olsem sapos em i brukim skru na lotu long em, em bai givim olgeta dispela samting long Jisas. (Matyu 4:8-10; Jon 14:30) Maski ol i hangamapim Jisas long diwai pos bilong kilim em i dai, em i tingting strong olsem em bai i stap gut long God. Olsem na em i no dring wain ol i miksim wantaim marasin bilong kilim i dai pen bilong en, long wanem, em i laik bai tingting bilong em i wok gut. (Matyu 27:34) God i kirapim bek Jisas na nau em i stap long heven, na dispela i kamapim klia olsem em i winim mak bilong mekim wok king long Kingdom.—Filipai 2:8-11.

3. I NO SAVE SENIS

AS BILONG HEVI: Planti kantri i makim taim bilong ileksen, na bai ol sitisen inap votim ol bikman em ol i trastim olsem senis bilong ol man i mekim pasin korapsen. Maski i olsem i gat pasin korapsen long ol kempein na ileksen tu, na dispela i save kamap long ol kantri i gat planti wok bisnis. Long rot bilong ol dispela kempein na ileksen, ol bisnisman inap givim grismani long ol bikman bilong gavman, na tu, long ol man i mekim wok politik.

Jas John Paul Stevens bilong Suprim Kot bilong Amerika i stori long pasin korapsen na em i tok: “Gavman i no mekim gut wok bilong en na ol man i no trastim wok bilong gavman.” Olsem na planti man i ting olsem pasin korapsen bilong lain politik i winim olgeta narapela kampani na oganaisesen samting.

ROT BILONG STRETIM: Kingdom Bilong God bai stap oltaim na i no inap senis, olsem na i no gat wok long kisim grismani long ol man bilong mekim ol kempein o ileksen samting. (Daniel 7:​13, 14) God yet i makim king bilong en, olsem na i no gat wok long mekim ol ileksen bilong makim o rausim ol man long wok gavman. Kingdom Bilong God bai i no inap senis, olsem na em bai mekim gut ol wok bilong helpim ol manmeri inap oltaim.

4. OL LO

AS BILONG HEVI: Pastaim bai yu ting, sapos gavman i kamapim ol nupela lo, dispela bai stretim hevi bilong pasin korapsen. Ol saveman i tok gavman i tingting long daunim dispela hevi, olsem na em i tromoi bikpela mani long kamapim ol lo, tasol planti taim dispela i opim rot long ol man i mekim pasin korapsen.

ROT BILONG STRETIM: Ol lo bilong Kingdom Bilong God i gutpela moa winim ol lo bilong ol gavman bilong dispela graun. Olsem, Jisas i no raitim ol lo long wanpela lista, nogat. Em i givim lo em planti man i save kolim olsem Gutpela Lo Tru. Em i tok: “Olgeta samting yupela i laik bai ol man i mekim long yupela, yupela i mas mekim long ol.” (Matyu 7:12) Ol lo bilong Kingdom i helpim tingting na pasin bilong yumi. Jisas i tok: “Yu mas laikim ol arapela man olsem yu laikim yu yet.” (Matyu 22:39) God inap lukim ol tingting i stap long bel, olsem na em i putim ol lo long ol man i ken bihainim.—1 Samuel 16:7.

5. OL TINGTING I STAP LONG BEL

AS BILONG HEVI: Pasin mangal na pasin bilong ol man long tingim laik bilong ol yet i as bilong pasin korapsen. Planti taim ol bikman bilong gavman na ol sitisen bilong kantri i mekim ol dispela pasin. Olsem yumi stori pinis, sampela bikman bilong gavman i bin kisim grismani long ol kontrakta taim ol i wokim dispela bikpela stua long Seoul we i bin bagarap. Ol dispela bikman bilong gavman i save olsem pe ol i kisim olsem grismani i aninit long mani ol kontrakta bai tromoi bilong baim ol samting, na tu, ol i no bihainim lo bilong gavman.

Olsem na bilong pinisim pasin korapsen, ol man i mas kisim save long pasin bilong daunim tingting bilong pasin mangal na laik bilong tingim ol yet tasol. Tasol ol gavman bilong dispela graun i no save long rot bilong givim kain skul olsem long ol man.

ROT BILONG STRETIM: Kingdom Bilong God i save skulim ol man long bihainim stretpela pasin na dispela inap long pinisim pasin korapsen.b Dispela skul i save helpim ol long mekim ‘tingting bilong ol i kamap nupela.’ (Efesus 4:23) Ol i kisim save olsem ol i mas lusim pasin bilong mangal na tingim ol yet tasol, na kisim pasin bilong amamas long ol samting ol i gat pinis na tingting long helpim ol narapela man.—Filipai 2:4; 1 Timoti 6:6.

6. OL SITISEN BILONG KINGDOM

AS BILONG HEVI: Maski ol man i gat gutpela sindaun na ol i kisim gutpela ediukesen long stretpela pasin, sampela i mekim pasin giaman na pasin korapsen. Ol saveman i tok dispela i as na ol gavman i no inap pinisim pasin korapsen. Tasol gavman i laik daunim dispela pasin na ol hevi em i kamapim.

ROT BILONG STRETIM: Lain United Nations Convention Against Corruption i tok, bilong daunim korapsen gavman i mas wok strong long helpim ol man long kisim “pasin bilong i stap gut long ol narapela, bihainim onest pasin, na mekim gut ol wok bilong ol.” Em gutpela mak ol i laik winim, tasol Kingdom Bilong God i narapela kain, long wanem, em i makim ol man i bihainim ol dispela gutpela pasin long i stap sitisen bilong en. Baibel i tok “ol gridi man” na “ol man bilong giaman” bai i no inap i stap sitisen bilong dispela Kingdom.—1 Korin 6:9-11; Revelesen 21:8.

Ol manmeri i ken kisim save na bihainim ol dispela stretpela lo, olsem ol Kristen long taim bilong ol aposel i bin mekim. Olsem, taim wanpela disaipel nem bilong en Saimon i laik givim mani long ol aposel na bai em i ken kisim holi spirit, ol i sakim dispela grismani na ol i tokim em: “Yu mas tanim bel na lusim dispela pasin nogut bilong yu.” Taim Saimon i lukim olsem dispela laik nogut inap bagarapim em, em i askim ol aposel long beten long helpim em na bai em inap daunim dispela pasin.—Aposel 8:18-24.

BILONG KAMAP SITISEN BILONG KINGDOM

Maski yu bilong wanem kantri, yu inap long kamap wanpela sitisen bilong Kingdom Bilong God. (Aposel 10:34, 35) Dispela Kingdom i gat ol program bilong skulim ol man na long nau dispela program i kamap long olgeta hap. Ol Witnes Bilong Jehova bai amamas long soim yu long pasin bilong ol long mekim fri Baibel stadi wantaim ol man, na ol bai mekim insait long 10 minit samting long olgeta wik. Na tu, bai yu kisim save long “gutnius bilong Kingdom bilong God” na olsem wanem dispela Kingdom bai pinisim pasin korapsen long wok gavman. (Luk 4:43) Mipela i singautim yu long painim ol Witnes Bilong Jehova i stap long hap bilong yu o lukim Web-sait bilong mipela em jw.org/tpi.