Askim

I stret Kristen i ken givim liklik mani o presen long wokman bilong gavman i bin mekim wanpela wok bilong em, o dispela i olsem pasin bilong givim grismani?

Maski ol i sindaun we, ol Kristen i laik bihainim savepasin long ol samting ol i mekim long hap bilong ol, long wanem, ol i save olsem long sampela kantri i gat sampela samting i orait long mekim na i stret wantaim lo bilong gavman, tasol long narapela kantri em i no stret wantaim lo. (Sindaun 2:​6-9) Oltaim Kristen i mas tingim, sapos man i laik “i stap long haus bilong [Bikpela],” em i mas givim baksait long pasin bilong givim grismani.​—Song 15:​1, 5; Sindaun 17:23.

Buk The World Book Encyclopedia i tok, “grismani i olsem man i givim o i laik givim samting long wanpela . . . wokman bilong gavman, na nau wokman i kalapim lo bambai em i ken helpim man i bin givim grismani long em.” Olsem na maski yumi sindaun long wanem hap, sapos yumi givim mani o presen long wanpela jas o plisman na bai em i ken paulim kot, o givim long wanpela inspekta na bai em i ken orait long ka nogut o kain samting olsem bilong yumi o haitim rong yumi bin mekim, dispela mani i olsem grismani. Na i wankain tu long givim presen long man na bai em i putim nem bilong yumi i go pas na em i larim yumi i go sanap paslain long ol narapela. Dispela i makim tu olsem yumi no tingim ol narapela man.​—Matyu 7:12; 22:39.

Tasol sapos yu givim presen o mani long wokman bilong gavman na bai em i mekim wanpela wok bilong yu i stret long lo o em i no ken mekim pasin nogut long yu, yu ting dispela em grismani? Long sampela kantri, sampela wokman bilong gavman i no laik putim nem bilong ol pikinini long wanpela skul, o larim sikman i go slip long haus sik, o putim stem long pepa bilong larim man i go sindaun long narapela kantri sapos em i no givim hap mani long ol. O ol i no ken stretim kwik ol pepa bilong kisim ol laisens.

Ol kantri i gat narapela narapela kain pasin na tingting long givim hap mani olsem presen long ol wokman. Sapos em i pasin bilong kantri long givim mani bilong mekim ol dispela kain wok na i stret long lo, sampela Kristen bai ting ol i no sakim ol lo bilong Baibel taim ol i givim mani long wokman bilong gavman long mekim wok bilong ol. Long sampela kantri ol man i ting dispela mani i helpim ol wokman bilong gavman i save kisim liklik pe tasol. Bikpela samting i olsem: Pasin bilong givim presen long man bilong mekim wanpela wok i stret long lo bilong gavman, em i narapela kain long givim grismani long man bilong mekim wanpela wok i no stret long lo.

Tasol sampela Witnes Bilong Jehova i no save givim mani olsem presen long ol inspekta, lain bilong kastam o ol narapela wokman bilong gavman bilong mekim wanpela wok i stret long lo, maski ol narapela man i save mekim. Ol wanples i save ol Witnes i strong long bihainim pasin i stret, olsem na sampela taim ol wokman bilong gavman i save mekim ol samting ol Witnes i askim ol long mekim, tasol ol narapela man i mas givim mani long ol pastaim.​—Sindaun 10:9; Matyu 5:16.

Em nau, ol Kristen wan wan i mas skelim olsem ol bai givim hap mani long wokman bilong gavman bilong mekim wanpela wok bilong ol i stret long lo o bilong pasim em long mekim pasin nogut long ol, o nogat. Tasol bikpela samting tru, Witnes i mas bihainim pasin em bel bilong em i no gat tok long en, na i no bagarapim nem bilong Jehova, na i no pundaunim wanpela man.​—Matyu 6:9; 1 Korin 10:​31-33; 2 Korin 6:3; 1 Timoti 1:5.