Long Nem Bilong God Ol i Mekim Tokaut i Pretim Man

LONG olgeta kain tokaut ol man i save mekim, dispela em i wanpela narakain tokaut. Em i hap bilong wanpela tokaut nem bilong en the Requirement o el Requerimiento long tok Spen, na long yia 1500 samting ol soldia bilong Spen i mas ritim strong dispela tokaut taim ol i kamap long Not na Sentral na Saut Amerika bilong pait na kisim graun long dispela hap.

Ol soldia bilong Spen i tok wanem long ol asples man, na bilong wanem ol i tok olsem?

Fosim Ol Man Long Kamap Katolik

Bihain tasol long Columbus i go kamap long Not na Sentral na Saut Amerika long 1492, Spen yet na Potugal yet i tok ol i gat rait long bosim dispela nupela graun. Tupela kantri wantaim i tingim Pop olsem mausman bilong Krais long graun, olsem na ol i askim Pop long stretim hevi bilong ol. Pop i tok na Misin i brukim graun na givim long Spen na Potugal, na i tok long dispela tupela kantri i mas salim ol misineri i go kirapim ol asples long tanim bel na kamap Katolik.

Taim ol man i wok long pait bilong kisim graun, gavman bilong Spen i tok olsem i stret ol soldia i mekim nogut long ol asples. Gavman bilong Spen i tok olsem Pop i makim maus bilong God na givim graun long ol, olsem na ol soldia i stap fri long rausim ol asples wantaim ol samting bilong ol na pasim sampela raits bilong ol long stap fri long mekim ol samting.

Gavman bilong Spen i raitim wanpela pas bilong tokim ol asples long disisen Pop i mekim. Ol asples i mas tanim bel na kamap Kristen na stap aninit long king bilong Spen. Sapos ol i no laik mekim olsem, orait ol Spen i pilim olsem long nem bilong God ol i gat rait long mekim “stretpela” pait long ol asples.

“I No Stret, i No Soim Rispek Long God, i Daunim Ol Man”

King bilong Spen i tok na ol i ritim the Requirement bilong mekim isi maus bilong bel bilong em na bilong tok olsem i stret ol i pait long ol asples lain na kisim graun bilong ol. Planti taim ol soldia bilong Spen i save ritim dispela tokaut antap long sip paslain long ol i go pait o long taim ol i lusim sip na i go daun, ol i ritim long ol asples em ol i no save long ol tokples bilong Yurop. Sampela taim ol i save ritim dispela pas long ol haus i no gat man em ol asples i bin lusim na ranawe.

Dispela pasin bilong fosim ol man long tanim bel na kamap Katolik i mekim na planti man i bin dai. Olsem, long yia 1550 ol i bin kilim i dai 2,000 man bilong lain Araukania long wanpela pait i bin kamap long Sili. Long ol hap lain i stap yet wanpela soldia em Pedro de Valdivia, i tokim king olsem: “Ol i bin katim han na nus bilong 200 man, long wanem, ol i bin bikhet long gavman, maski mi salim ol misineri i go long ol na mi mekim ol tokaut [the Requirement] long ol olsem King i bin tok.”a

Taim ol i ritim the Requirement, ating dispela i mekim gut maus bilong bel bilong ol man bilong pait. Tasol dispela i no mekim wanpela samting bilong helpim lotu bilong Spen. Wanpela misineri Bartolomé de las Casas i bin stap long yia 1500 samting em i aiwitnes bilong ol samting nogut dispela tokaut i bin kamapim, em i tok: “Dispela tokaut i no stret, i no soim rispek long God, i daunim ol man, i no bihainim savetingting na i narakain tru! Em i givim nem nogut long lotu Kristen.” Wanpela man bilong raitim stori Gonzalo Fernández de Oviedo i tok, ol samting nogut tru ol i mekim long ol asples lain bilong Not na Sentral na Saut Amerika i mekim na ol man bilong dispela ples i tingting nogut long lotu Kristen.

Olsem wanem? God i as bilong ol dispela samting nogut em ol lain politik na ol king i mekim long nem bilong Em? Baibel i tok: “God I Gat Olgeta Strong i no inap mekim pasin nogut. Nogat tru.”—Jop 34:10.