GRAUN INAP ABRUSIM BAGARAP
WARA
OLGETA samting long graun i no inap i stap laip sapos i no gat wara, moa yet gutpela wara bilong dring. Long olgeta samting i gat laip, bikpela hap bilong ol em wara. Ol man na ol animal i save kisim wara long ol raunwara, ol bikpela wara, ol ples tais, na ol wara aninit long graun, na tu, yumi save kisim wara bilong putim long gaden.
As na Wara Inap Sot
Wara i karamapim klostu olgeta hap bilong graun bilong yumi. Tasol wanpela ripot (World Meteorological Organization) i tok, “0.5 pesen tasol bilong wara long Graun em yumi inap yusim na dring.” Tru, dispela liklik hap bilong wara inap long lukautim ol samting i gat laip long graun, tasol bikpela hap bilong en ol pipia i bagarapim o planti man moa i nidim wara, na hevi bilong weda i senis i mekim na wara i sot. Ol saientis i tok insait long 30 yia, 5 bilion manmeri bai i no gat gutpela wara bilong dring.
Graun Bilong Yumi—God i Wokim Bilong Stap Oltaim
I gat ol samting long graun we i wok wantaim na i mekim na wara i no inap sot. Na tu, graun, ol samting insait long wara, na lait bilong san i wok wantaim bilong mekim wara bilong yumi i stap klin. Skelim sampela samting i soim olsem God i wokim graun bilong yumi bilong i stap oltaim.
Graun inap helpim long rausim planti samting nogut we i bagarapim wara bilong yumi. Long ol ples tais, i gat sampela gras na diwai samting we ol i tok i save rausim naitrojen, fosforas, na pesticide.
Ol saientis i kisim save olsem ol samting long graun yet i save helpim wara long stap klin. Wara i save ron spit tru i save brukim ol pipia i go liklik na bihain ol liklik binatang i save kaikaim ol na pinisim olgeta.
Ol kina na mussel bilong wara i save klinim ol marasin nogut long wara insait long sampela de tasol—wok ol i mekim i winim tru wok bilong ol kampani long putim marasin long wara bilong klinim wara.
Graun bilong yumi i save holim wara long rot bilong raun bilong wara i save go antap na i kam daun long olgeta taim. Dispela raun bilong wara, na ol narapela samting i pasim wara long lusim atmosfia bilong yumi o i mekim na wara i no inap pinis.
Ol Samting Ol Man i Mekim
Long rot bilong stretim gut ol samting na bai oil i no ken lik, na putim ol marasin nogut long ples stret bilong en, yumi helpim long mekim wara bilong yumi i stap klin
Ol saientis i tokim yumi long oltaim yumi mas lukautim wara na no ken westim wara. Bilong lukautim wara na bai i no gat ol marasin nogut insait long en, ol i tok sapos oil long kar bilong yumi i lik, orait yumi mas stretim, na yumi no ken tromoi marasin i go insait long toilet o kapsaitim ol kemikal nogut insait long baret.
Ol ensinia i kamapim ol nupela rot bilong rausim sol long solwara. Tingting bilong ol em ol i laik mekim olsem bai i gat planti wara bilong dring.
Tasol ol man i mas mekim sampela samting moa. Pasin bilong rausim sol long solwara em i no gutpela rot bikos ol i mas tromoi bikpela mani na i gat bikpela hatwok tru. Long wanpela ripot long 2021 long hau long lukautim wara, wanpela wokman bilong Yunaitet Nesen i tok: “Long olgeta hap bilong graun, ol man i mas mekim bikpela wok moa yet bilong lukautim wara.”
Ol Risen Bilong Wetim Ol Gutpela Samting—Tok Baibel i Mekim
“God . . . i save mekim wara i go antap long skai. Na wara i kamapim ol klaut na i tanim i kamap ren. Orait ren i save lusim ol klaut na i pundaun. Em i pundaun antap long ol manmeri.”—Jop 36:26-28.
God i putim ol samting long graun we i wok gut wantaim bilong lukautim wara.—Eklisiastis 1:7.
Tingim: Sapos Man Bilong Wokim ol samting i kamapim ol rot bilong mekim wara i stap klin, ating em inap na em bai pinisim ol samting nogut ol man i mekim we i bagarapim wara, a? Lukim atikol “God i Tok Promis Olsem Graun Bilong Yumi Bai i no Inap Bagarap,” long pes 15.