God i Tok Promis Olsem Graun Bilong Yumi i No Inap Bagarap

Em tok bilong wanpela lain bilong mekim wok painimaut long senis i kamap long weda. Sapos yu save bilip long Krieta husat i save tingim ol man, dispela tok bilong ol saientis bai kirapim yu long tingim ol rot God i putim bilong graun i ken klinim em yet.

Tasol ol man i mekim planti samting we i bagarapim graun, olsem na graun i no inap stretim em yet. Bilong wanem yumi ken bilip tru olsem God bai mekim samting bilong stretim dispela?

Lukim ol skripsa i stap long blok we i mekim isi bel bilong yumi olsem graun bai i no inap bagarap na em bai i stap gut.

• God i wokim dispela graun. “Taim God i stat long wokim ol samting, em i wokim ples antap na graun.”—Stat 1:1.

• God em i papa bilong dispela graun. “Dispela graun wantaim olgeta samting i stap long en i bilong Jehova.a”—Buk Song 24:1

• God i wokim graun bilong yumi long stap oltaim. “Yu bin putim dispela graun long ples bilong en, na graun i stap strong olgeta; em i no inap surik liklik. Nogat tru. Em bai i stap inap oltaim oltaim.”—Buk Song 104:5

• God i tok promis long ol samting i gat laip bai stap oltaim long graun. “God tru, em Man husat i bin kamapim graun, . . i no wokim graun bilong i stap nating, nogat, em i wokim bilong ol samting i ken stap long en.”—Aisaia 45:18

• God i tok promis olsem ol man bai stap oltaim long graun. “Ol stretpela man bai kisim graun olgeta, na ol bai stap oltaim long en.”—Buk Song 37:29.

God i wokim dispela graun bilong ol man i ken stap amamas long en na ol i no ken bagarapim. Baibel i tok profet olsem long taim stret bilong em, Jehova God bai pinisim ol samting nogut ol man i mekim we i bagarapim graun. —Revelesen 11:18

Baibel i tok promis olsem God bai mekim graun bilong yumi i kamap naispela ples paradais, na em bai “inapim laik bilong olgeta samting i gat laip.”—Buk Song 145:16