Nem Bilong God—Wok Ol i Mekim Long En na Mining Bilong En

OL I tanim tok bilong Song 83:18 long Baibel bilong yu olsem wanem? Baibel New World Translation of the Holy Scriptures i tanim dispela ves olsem: “Bai ol manmeri i mas save olsem yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.” Planti narapela Baibel i kamapim wankain tok long dispela ves. Tasol long planti Baibel i no gat nem Jehova, long ples bilong en i gat ol kain biknem olsem “Bikpela” o “Man Bilong Stap Oltaim.” Wanem tok i mas i stap long dispela ves? Wanpela biknem o nem Jehova?

Dispela ves i toktok long wanpela nem. Long tok ples Hibru bilong bipo em ol i bin raitim bikpela hap bilong Baibel long en, wanpela narakain nem i stap long dispela ves. Ol i raitim dispela nem olsem יהוה (YHWH) long ol leta Hibru.a Long Tok Pisin yumi save kolim dispela nem olsem “Jehova.” Olsem wanem? Dispela nem i stap long wanpela ves tasol long Baibel? Nogat. Em i stap klostu 7,000 taim long Ol Skripsa Hibru bilong pastaim tru!

Nem bilong God i bikpela samting olsem wanem? Tingim beten Jisas Krais i lainim ol man long en. Dispela beten i kirap olsem: “Papa bilong mipela, yu stap long heven, nem bilong yu i mas i stap holi.” (Matyu 6:9) Bihain, Jisas i beten long God olsem: “Papa, yu ken mekim nem bilong yu i kamap bikpela.” God i stap long heven na bekim tok olsem: “Mi mekim nem bilong mi i kamap bikpela pinis, na bai mi mekim olsem gen.” (Jon 12:28) Tru tumas, nem bilong God i bikpela samting tru. Orait bilong wanem sampela man bilong tanim tok i no putim dispela nem long Baibel na ol i putim ol biknem long ples bilong en?

I luk olsem i gat tupela as bilong dispela. Namba wan, planti man i tok i no stret long yusim dispela nem, long wanem, yumi no save long olsem wanem ol i bin kolim dispela nem long bipo. Long tok ples Hibru bilong bipo ol i no bin raitim ol leta a, e, i, o, u. Olsem na i no gat wanpela man long nau inap tokaut stret long olsem wanem ol man long taim bilong ol man i bin raitim Baibel i bin kolim YHWH. Tasol yu ting dispela i mas pasim yumi long kolim nem bilong God? Long taim bilong ol man i bin raitim Baibel, ating ol i bin kolim nem Jisas olsem Yeshua o Yehoshua​—i no gat wanpela man i save tru long dispela. Tasol ol manmeri long olgeta hap long nau i save kolim nem bilong Jisas long kain kain pasin, ol i kolim long pasin i stret long tok ples bilong ol. Ol i no surik long yusim dispela nem long wanem ol i no save long olsem wanem ol i bin kolim dispela nem long taim bilong ol aposel. Sapos yu go raun long narapela kantri, ating bai yu harim olsem pasin bilong kolim nem bilong yu long narapela tok ples i narapela kain. Olsem na sapos yumi no save long olsem wanem ol i bin kolim nem bilong God long bipo, dispela i no as na yumi no ken yusim dispela nem.

Namba tu as na ol i no putim nem bilong God long Baibel, em wanpela bilip bilong ol Juda bilong bipo yet. Planti Juda i bilip olsem i no stret long kolim nem bilong God. Ating as bilong dispela bilip em tingting kranki ol i bin kisim long wanpela lo bilong Baibel, dispela lo i tok: “Yupela i no ken kolim nating nem bilong mi God, Bikpela bilong yupela. Long wanem, bai mi mekim save long ol manmeri i kolim nating nem bilong mi.”​—Kisim Bek 20:7.

Dispela lo i tambuim pasin bilong kolim nating nem bilong God. Tasol yu ting dispela lo i tambuim pasin bilong mekim gutpela wok long nem bilong em? Nogat tru. Ol man i bin raitim Ol Skripsa Hibru (“Olpela Testamen”) em ol gutpela man i bin bihainim Lo God i bin givim long lain Israel bilong bipo. Tasol ol i bin kolim nem bilong God planti taim. Olsem: Ol i putim nem bilong God long planti song em bikpela lain manmeri i lotuim Jehova i bin singim wantaim. God Jehova i tokim ol man i lotuim em long singaut long nem bilong em, na ol gutpela man i bihainim dispela tok. (Joel 2:​32, NW; Aposel 2:​21, NW) Olsem na ol Kristen long nau i no surik long mekim gutpela wok long nem bilong God, olsem Jisas i bin mekim.​—Jon 17:26.

Taim ol man bilong tanim tok bilong Baibel i rausim nem bilong God na putim ol biknem long ples bilong en, ol i mekim bikpela popaia. Ol i mekim na i olsem God i stap longwe tumas na i no save tingim ol man, tasol Baibel i kirapim ol man long kamap ‘pren tru bilong God.’ (Song 25:14) Tingim wanpela gutpela pren bilong yu. Sapos yu no save long nem bilong pren bilong yu, bai yu stap klostu tru long em? Na olsem tasol, taim ol man i no save long nem bilong God, Jehova, olsem wanem ol inap stap klostu long em? Na tu, taim ol man i no yusim nem bilong God, ol i no save long gutpela mining bilong dispela nem. Orait wanem mining bilong nem bilong God?

God yet i bin kamapim mining bilong nem bilong em long gutpela wokman bilong em, Moses. Taim Moses i askim long nem bilong God, Jehova i tok: “Mi bai kamap wanem wanem kain mi laikim.” (Kisim Bek 3:​14, NW) Olsem na Jehova inap kamap wanem wanem kain em i mas kamap bilong inapim ol samting em i tingting pinis long mekim.

Sapos yu inap kamap wanem wanem kain yu laikim, bai yu mekim wanem bilong helpim ol pren bilong yu? Sapos wanpela bilong ol i kisim bikpela sik, ating bai yu kamap wanpela gutpela dokta na oraitim sik bilong em. Sapos narapela pren i kisim bikpela hevi long mani, yu inap kamap maniman na helpim em. Tasol yu no inap kamap olgeta kain yu laikim. Yumi olgeta i no inap mekim olsem. Taim yu stadi long Baibel, bai yu kirap nogut long lukim olsem wanem Jehova i kamap wanem wanem kain em i mas kamap bilong inapim ol tok promis bilong em. Na em i amamas long yusim strong bilong em bilong helpim ol man i laikim em. (2 Stori 16:9) Ol man i no save long nem bilong Jehova, ol i no inap save long ol dispela gutpela pasin bilong em.

Tru tumas, nem Jehova i mas i stap long Baibel. Taim yumi save long mining bilong en na yusim dispela nem taim yumi mekim lotu, em bai helpim yumi long i go klostu moa long Papa bilong yumi long heven, Jehova.b