Tingting Bilong God Long Blut

Blut i bikpela samting. Sapos yumi no gat blut, yumi no inap stap laip. God em i Krieta, olsem na em i gat rait long tokim yumi long wok bilong blut. Em i tok wanem long blut? Yu ken kaikai blut, o kisim, o givim long narapela? Olsem wanem yu inap wokim gutpela disisen long dispela samting?

1. Wanem tingting bilong Jehova long blut?

Long taim ol man i raitim Baibel, Jehova i tokim ol man i lotuim em olsem: “Laip bilong olgeta man na animal i stap long blut.” (Wok Pris 17:14) Long ai bilong Jehova, blut i makim laip. Laip em samting i holi, em presen i kam long God, olsem na blut tu em samting i holi.

2. God i tok wanem long blut?

Jehova i tokim ol man i stap paslain long taim bilong ol Kristen olsem ol i no ken kaikai blut. (Ritim Stat 9:4 na Wok Pris 17:10.) Bihain em i kolim gen dispela lo na gavening bodi i tokim ol Kristen olsem ol i mas “sakim blut.”​—Ritim Aposel 15:28, 29.

Wanem mining bilong dispela tok sakim blut? Sapos dokta i tokim yu long no ken dring alkohol, yu bai i no inap kisim, a? Tasol bai yu kisim alkohol long rot bilong kaikai o kisim alkohol long rot bilong sut? Nogat. Olsem tasol, lo bilong God long no ken kaikai blut i makim olsem yumi no ken kaikai o dring blut, o kaikai abus em ol i no rausim blut long en. Na tu, yumi no ken kisim kaikai em ol i putim blut long en na kukim.

Olsem wanem long wok bilong blut long medikal sait? Sampela pasin ol i bihainim i brukim lo bilong God. Dispela i makim tu pasin bilong givim blut olgeta, o wanpela bikpela hap bilong en​—ol ret sel, ol wait sel, ol pletlet, na plasma. Long ol narapela samting ol i bihainim long medikal sait i no gat wanpela samting i kamapim olsem ol i brukim lo bilong God o nogat. Olsem, sampela pasin ol i bihainim em ol i yusim ol liklik hap bilong wanpela bilong 4-pela bikpela hap bilong blut. Ol narapela pasin ol i bihainim em ol i save yusim blut bilong man yet. Taim yumi skelim ol dispela samting, wan wan yet i mas wokim disisen bilong em.a​—Galesia 6:5.

KISIM SAMPELA SAVE MOA

3. Wokim ol disisen long medikal tritmen we i amamasim Jehova

Olsem wanem yu inap mekim disisen long medikal sait we i stret wantaim tingting bilong God long blut? Pilaim VIDIO, na stori long ol dispela bikpela samting yu mas mekim.

VIDIO: Rot Bilong Wokim Ol Disisen Long Sait Bilong Blut (5:47)

• Beten long kisim savetingting.​—Jems 1:5.

• Mekim wok painimaut long ol stiatok bilong Baibel na olsem wanem yu inap bihainim.​—Provep 13:16.

• Painimaut ol narapela medikal tritmen i stap long hap bilong yu em yu ken kisim.

• Luksave long wanem medikal tritmen em yu no ken kisim.

• Wokim disisen em maus bilong bel bilong yu bai no gat tok long en.b​—Aposel 24:16.

• Yu mas luksave olsem i no gat wanpela​—poroman marit, elda, o man i stadi wantaim yu long Baibel​—inap tokim yu long wokim disisen long ol samting em maus bilong bel bilong yu yet i mas makim.​—Rom 14:12.

• Raitim disisen bilong yu long wanpela pepa na ol narapela i mas save long en.

4. Ol Witnes Bilong Jehova i laik kisim gutpela medikal tritmen

Yumi inap bihainim lo bilong God long blut na kisim gutpela medikal tritmen we i no gat blut long en. Pilaim VIDIO.

VIDIO: Intaviu Wantaim Profesa Massimo P. Franchi, M.D. (1:36)

Ritim Taitus 3:2, na stori long dispela askim:

• Taim yumi toktok wantaim ol dokta, wai na yumi mas toktok long pasin isi na wok gut wantaim ol?

No ken kisim	Kristen yet bai makim
A. Blut plasma	Ol freksen i kam long plasma
B. Ol wait sel	Ol freksen i kam long ol wait sel
C. Ol pletlet	Ol freksen i kam long ol pletlet
D. Ol ret sel	Ol freksen i kam long ol ret sel

5. Ol medikal tritmen we ol i yusim ol blut freksen

Blut i gat 4-pela bikpela hap bilong en​—ol ret sel, ol wait sel, ol pletlet, na plasma. Dispela 4-pela bikpela hap i gat ol liklik hap bilong ol, em ol i kolim blut freksen.c Sampela blut freksen ol i putim long ol marasin bilong helpim long daunim sik o helpim long stopim blut long ron.

Long sait bilong ol blut freksen, wan wan Kristen yet i mas wokim disisen bilong em we i stret wantaim maus bilong bel em Baibel i skulim pinis. Ating sampela Kristen bai wokim disisen olsem ol i no inap kisim medikal tritmen we i gat ol blut freksen long en. Na ol narapela, ating maus bilong bel bilong ol i orait long ol i kisim medikal tritmen i gat blut freksen.

Taim yu wokim disisen bilong yu, skelim dispela askim:

• Hau bai mi eksplenim long dokta risen na mi sakim o kisim sampela blut freksen?

OL BIKPELA POIN

Jehova i laik yumi tingim blut olsem samting i holi.

Riviu

• Wai na Jehova i tingim blut olsem samting i holi?

• Olsem wanem yumi save olsem lo bilong God long sakim blut i stret tu long pasin bilong kisim blut?

• Olsem wanem yu inap wokim gutpela disisen long ol medikal tritmen we ol i yusim blut?

MEKIM WOK PAINIMAUT

Wanem ol samting i mas stiaim disisen yu wokim long sait bilong medikal tritmen we dokta i yusim blut bilong yu yet?

“Askim” (Wastaua, Oktoba 15, 2000)

Yu mas skelim wanem ol samting taim yu mekim disisen olsem yu bai kisim ol blut freksen o nogat?

“Askim” (Wastaua, Jun 15, 2004)

Wanem samting i kirapim wanpela dokta long bilip olsem tingting bilong Jehova long blut i stret?

“Mi Kisim Tingting Bilong God Long Blut” (Kirap!, Epril 8, 2004)

Kisim save long hau ol brata i insait long Hospital Lieson Komiti i sapotim ol brata na sista.

Jehova i Lukautim Ol Man i Sik (10:23)