Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:

• Olsem wanem yumi inap mekim gut dispela “gutpela tok ples,” em stretpela save long God na ol samting em i tingting pinis long mekim? (Sef. 3:​9, NW)

Bilong mekim gut dispela “gutpela tok ples” yumi mas mekim ol samting olsem yumi bai mekim long wanpela tok ples tru: Yumi mas putim gut yau, bihainim pasin bilong ol man i save mekim gut dispela tok ples, tingim gut nem bilong ol buk bilong Baibel na sampela skripsa, kolim gen ol tok yumi lainim, ritim na kolim long maus, skelim ol lo bilong dispela tok ples o pasin bilong bungim ol tok bilong en, wok yet long lainim, makim taim bilong stadi, na “toktok” long dispela gutpela tok ples.​—8/15, pes 21-​25.

• Wanem samting i insait long pasin bilong save long God?

“Jehova em i nem bilong em,” na em i laik yumi save long dispela nem. (Kis. 15:​3, NW) Em i “God bilong pasin laikim na bel isi.” (2 Ko. 13:​11, NW) Em i “God i save long olgeta samting,” na God bilong “kisim bek” yumi. (1 Sml. 2:3; Sng. 25:5) God bai i go klostu long ol man i save long em.​—9/1, pes 4-7.

• Olsem wanem dispela tok ‘baklain i gat tripela string’ i stret long marit?

‘Baklain i gat tripela string’ em wanpela tok piksa. (Sav. 4:12) Taim yumi yusim dispela tok piksa long makim marit, tupela string i makim man na meri, na ol i tanim wantaim namba tri string, em God. Taim tupela marit i pas gut wantaim God, dispela i strongim tupela long karim ol hevi, na kisim amamas.​—9/15, pes 16.

• Long Hibru 6:​1, 2, dispela tok “pasin bilong putim han antap long ol man” i makim wanem samting?

I luk olsem dispela tok i makim pasin bilong putim han antap long ol man bilong givim ol presen bilong holi spirit long ol, na i no makim pasin bilong makim ol elda Kristen. (Ap. 8:​14-​17; 19:6)​—9/15, pes 32.

• Gutpela papa i luksave long em i mas mekim wanem ol samting long pikinini bilong em?

Em i mas (1) laikim tru ol, (2) stap gutpela piksa, (3) mekim ol samting na ol pikinini i pilim amamas insait long famili, (4) lainim ol long kisim save long God, (5) stretim ol, (6) banisim ol long ol samting nogut.​—10/1, pes 18-​21.

• Long wanem ol rot ol wasman inap givim ona long ol arapela?

Wanpela rot em olsem, ol elda i no ken askim ol arapela long mekim samting em yet i no laik mekim. Na tu, em i givim ona taim em i tokim ol arapela long as na em i tokim ol long mekim wanpela samting.​—10/15, pes 22.

• Wanem sampela rot bilong strongim marit?

Tupela rot bilong strongim marit em olsem: (1) Tingim olsem marit bilong yu em i bikpela samting. (2) Sakim olgeta kain pasin pamuk. Maski marit bilong yu i stap gut o i gat hevi, poroman marit bilong yu i mas save olsem yu laik strongim marit bilong yutupela.​—11/1, pes 18-​21.

• Elda Kristen i ken lainim wanem samting long pasin bilong wasman bilong sipsip long Israel long mekim wok long wanpela kain stik?

Wasman i save yusim wanpela kain stik bilong stiaim ol sipsip bilong em, na taim ol sipsip i go insait long banis o lusim banis, wasman i save mekim wok long dispela stik bilong “kaunim” ol. (Wkp. 27:32) Olsem tasol, wasman Kristen i mas save gut long olgeta wan wan insait long lain sipsip bilong God i stap aninit long lukaut bilong em.​—11/15, pes 9.

• Mama inap mekim wanem ol samting bilong soim olsem em i tingim pasin bilong stap klin em i bikpela samting?

Ol binatang jem inap i go insait long kaikai long kain kain rot, olsem na mama i save wasim gut han bilong em paslain long em i holim kaikai na em i karamapim gut kaikai. Em i save klinim haus na bai i no gat ol rat na kokoros samting. Na narapela samting em pasin bilong waswas na wasim klos long olgeta taim. Ol dispela samting i stret wantaim ol tok bilong Baibel.​—12/1, pes 9-​11.