I Stret Yu Strong Long Mekim Ol Samting Yu Yet i Laikim?

TUPELA liklik pikinini i pilai wantaim. Wanpela i pulim feiveret toi bilong em i stap long han bilong narapela pikinini na i singaut, “Bilong mi!” Kirap long taim ol man i liklik yet, ol i save tingim ol yet tasol. (Stt. 8:21; Ro. 3:23) Na tu, ol lain bilong dispela graun ol i strong long kamapim pasin bilong tingim ol yet tasol. Bilong abrusim dispela kain tingting, yumi mas wok strong long daunim pasin bilong tingim yumi yet tasol. Sapos yumi no mekim olsem, yumi inap pundaunim sampela na lusim pasin bilong pas gut wantaim Jehova.​—Ro. 7:​21-23.

Aposel Pol i laik kirapim yumi long tingim samting em pasin bilong yumi inap mekim long ol narapela, em i tok: “ ‘Olgeta samting i orait long yumi mekim,’ tasol i no olgeta samting i save helpim yumi long i stap gut. ‘Olgeta samting i orait long yumi mekim,’ tasol i no olgeta samting i save mekim yumi i kamap strongpela Kristen.” Na Pol i tok moa: “Yupela i no ken mekim olkain pasin inap long mekim ol i pundaun long sin.” (1 Ko. 10:​23, 32) Olsem na taim yumi tingim ol samting yumi yet i laik mekim, i gutpela yumi askim yumi yet olsem: ‘Mi orait long lusim sampela laik bilong mi i stret long mi ken mekim, tasol em inap bagarapim pasin wanbel insait long kongrigesen? Mi redi long bihainim ol stiatok bilong Baibel maski dispela i givim hatwok long mi?’

Long Makim Wok Mani

Planti man i ting em i samting bilong ol yet long makim wanem wok mani ol i laik mekim, na dispela i no save nogutim ol narapela. Tasol tingim stori bilong wanpela bisnisman i stap long wanpela liklik taun long Saut Amerika. Em i gat nem olsem man bilong pilai laki na dring spak. Tasol em i stadi long Baibel wantaim ol Witnes Bilong Jehova, na em i kirap long bihainim ol tok em i lainim na em i senisim pasin bilong em. (2 Ko. 7:1) Taim em i tokaut olsem em i laik mekim wok autim tok wantaim kongrigesen, long pasin isi wanpela elda i kirapim em long skelim wok mani em i save mekim. Inap longpela taim liklik, em i bin wok bisnis long wanpela kain alkohol i gat kain kain wok bilong en, tasol long dispela hap ol man i save tanim dispela alkohol wantaim koldring bilong mekim ol i spak.

Dispela man i luksave olsem sapos em i autim tok long ol man, tasol em i wok yet salim dispela alkohol, dispela bai bagarapim gutnem bilong kongrigesen na inap mekim na em i no pas gut wantaim God. Maski em i gat meri na 5-pela pikinini bilong lukautim, em i lusim wok bilong salim alkohol. Long nau em i lukautim famili long rot bilong salim ol samting ol i wokim long pepa. Nau dispela man wantaim meri na tupela pikinini bilong ol i baptais pinis. Ol i save wok strong long autim tok na ol i no pret long tokaut long bilip bilong ol.

Long Makim Ol Poroman

Yu ting em i samting bilong yumi yet long bung wantaim ol lain i no bihainim bilip bilong yumi, o i gat sampela stiatok bilong Baibel long dispela samting? Wanpela sista i laik go long pati wantaim wanpela yangpela man i no Kristen tru. Ol narapela i tokim sista long ol hevi inap painim em, tasol em i ting dispela em i samting bilong em yet, olsem na em i go long dispela pati. Long pati ol i givim dring long em i gat wanpela strongpela marasin long en bilong mekim em i slip. Sampela aua bihain em i kirap na em i lukim olsem dispela yangpela man em i bin go wantaim long pati, em i bin reipim em.​—Skelim Stat 34:2.

Tru, ating i no olgeta taim pasin bilong bung wantaim ol man i no bilip i kamapim ol samting nogut olsem, tasol Baibel i tok lukaut olsem: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Snd. 13:20) Tru tumas, sapos yumi makim ol poroman nogut, dispela inap bagarapim yumi! Sindaun 22:3 i tok: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.” Ol poroman bilong yumi ol inap nogutim yumi na yumi no pas gut moa wantaim God.​—1 Ko. 15:33; Je. 4:4.

Long Klos na Bilas

Stail bilong ol klos na pasin bilong wokim gras i save senis senis long olgeta taim. Tasol ol stiatok bilong Baibel long klos na bilas i no save senis. Pol i tokim ol meri Kristen long “bilas gut na mekim long pasin i soim rispek na gutpela tingting”​—em wanpela stiatok ol man tu i mas bihainim. (1 Ti. 2:​9, NW) Pol i no tok olsem no ken bilas liklik, na em i no tok olgeta Kristen i mas pasim klos i gat wankain stail tasol, nogat. Tasol olsem wanem long pasin i soim rispek? Pol i tok yumi mas bilas long pasin i soim rispek na no ken hambak long klos yumi pasim.

Yumi mas askim yumi yet: ‘Mi inap tok tru olsem mi soim rispek sapos mi strong long pasim kain klos i save pulim ai bilong ol narapela? Klos na bilas bilong mi i mekim na ol man i kisim tingting kranki long mi na long pasin mi save bihainim?’ Yumi inap abrusim pasin bilong ‘mekim wanpela samting i save sutim lek bilong ol man’ sapos yumi “lukautim ol samting bilong ol arapela manmeri . . . na helpim ol long i stap gut,” na yumi no “lukautim ol samting bilong [yumi] tasol.”​—2 Ko. 6:3; Fl. 2:4.

Long Ol Samting Bilong Wok Bisnis

Taim pasin bilong paulim mani long wok bisnis i bin kamap long kongrigesen bilong Korin, Pol i tok: “Bilong wanem yupela i no larim ol i mekim nogut long yupela? Bilong wanem yupela i no larim ol i pulim ol samting bilong yupela?” Pol i tokim ol Kristen long ol i mas orait long lusim sampela samting bilong ol na ol i no ken kisim brata i go long kot. (1 Ko. 6:​1-7) Wanpela brata long Amerika i pilim tru dispela tok long bel bilong em. Kros i kamap namel long em na bos Kristen bilong em long hamas pe bos i mas bekim long em. Tupela brata i bihainim ol stiatok bilong Baibel na planti taim ol i bung wantaim bilong stretim dispela hevi, tasol tupela i no painim rot bilong stretim. Orait bihain ol i go long ol elda Kristen bilong stretim dispela hevi.​—Mt. 18:​15-17.

Tasol sori tru, ol i no inap stretim hevi. Wokman hia i beten planti taim, na bihain em i tingting olsem em bai no askim moa long bikpela hap bilong dispela mani em i ting bos i mas bekim long em. Bilong wanem em i mekim olsem? Bihain em i tok, “Dispela kros i wok long daunim amamas bilong mi na i pinisim nating bikpela hap taim mi inap mekim ol gutpela wok bilong spirit long en.” Taim brata i wokim dispela disisen, em i kisim bek amamas bilong em, na em i pilim olsem Jehova i blesim wok bilong em long autim tok.

Long Ol Liklik Samting Tu

Long ol liklik samting tu, sapos yumi no strong long mekim ol samting yumi yet i laikim, bai yumi kisim blesing. Long namba wan de bilong kibung distrik, tupela painia marit i kamap paslain na tupela i kisim ol sia ol i laikim. Taim program i kirap, wanpela famili i gat planti pikinini ol i hariap i kam insait. Tupela painia i lukim olsem famili i wok long painim ol sia inap long ol, olsem na tupela i givim tupela sia bilong ol long famili. Dispela i mekim na famili olgeta inap sindaun wantaim. Sampela de bihain long kibung, tupela painia i kisim pas long famili bilong tok tenkyu long tupela. Pas i tok famili i bel hevi stret taim ol i kamap leit long kibung. Tasol gutpela pasin bilong tupela marit i mekim na famili i no bel hevi moa; ol i amamas na tenkyu tru long tupela.

Taim yumi gat rot, gutpela sapos yumi amamas long lusim sampela laik bilong yumi yet bilong helpim ol narapela. Sapos yumi kamapim pasin laikim na yumi “i no save tingting tumas long [yumi] yet,” yumi helpim pasin wanbel long i stap strong insait long kongrigesen na yumi stap wanbel wantaim ol narapela man tu. (1 Ko. 13:5) Tasol bikpela samting moa, em yumi holimpas pasin bilong pas gut wantaim Jehova.

[Piksa long pes 20]

Yu redi long lusim sampela laik bilong yu long ol kain klos yu laik pasim?

[Piksa long pes 20, 21]

Yu redi long givim sia bilong yu long ol brata bilong yu?