Askim

Jisas i bin autim tok long olgeta hap bilong Israel. Orait olsem wanem na aposel Pita inap tok, ol Juda wantaim ol hetman bilong ol “i no save gut” na ol i kilim Jisas i dai?​—Ap. 3:17.

Aposel Pita i givim tok long sampela Juda long samting ol i bin mekim bilong kilim i dai Mesaia, na em i tok: “Mi save, yupela wantaim ol hetman bilong yupela, yupela i no save gut na yupela i bin mekim dispela pasin long Jisas.” (Ap. 3:​14-17) Ating sampela Juda i no kliagut long Jisas na ol tok em i autim. Na sampela Juda i no save Jisas em i Mesaia, long wanem, ol i no gat laik long mekim ol samting God i laikim, ol i tingting nogut long Jisas, bel nogut long em, na heitim em.

Planti i no gat laik long mekim ol samting Jehova i laikim, olsem na ol i no tingim ol tok Jisas i skulim ol man long en. Planti taim Jisas i bin skulim ol man long rot bilong ol tok piksa, na em i kamapim as bilong ol dispela tok piksa long olgeta man i gat laik long kisim sampela save moa. Tasol sampela i wokabaut i go, na ol i no gat laik liklik long kisim save long as bilong tok. Wanpela taim sampela disaipel tu ol i bel nogut long wanpela tok piksa Jisas i mekim. (Jo. 6:​52-66) Ol i no save olsem ol tok piksa bilong Jisas i traim pasin bilong ol long redi long senisim tingting na pasin bilong ol. (Ais. 6:​9, 10; 44:18; Mt. 13:​10-15) Na ol i sakim tok profet i stori long Mesaia bai mekim ol tok piksa taim em i skulim ol man.​—Sng. 78:2.

Sampela i gat tingting nogut long Jisas, olsem na ol i sakim ol tok bilong em. Taim em i skulim ol man insait long haus lotu long ples bilong em Nasaret, ol man i “kirap nogut.” Tasol ol i no bilip olsem Jisas em i Mesaia, nogat, ol i toktok planti long ol samting bilong famili bilong Jisas, ol i tok: “Dispela man em i kisim dispela tok we? . . . Yumi save, dispela man em i wanpela kamda. Em i pikinini bilong Maria, na em i brata bilong Jems na Josep na Judas na Saimon. Ol susa bilong en ol i stap hia wantaim yumi.” (Mk. 6:​1-3) Jisas i bilong wanpela famili nating, na long tingting bilong ol manmeri bilong Nasaret dispela i mekim na ol tok bilong Jisas i samting nating tasol.

Orait olsem wanem long ol bikman bilong lotu? Planti bilong ol tu i no bin putim yau long tok bilong Jisas. (Jo. 7:​47-52) Na ol i sakim ol tok bilong Jisas, long wanem, ol i bel nogut long ol manmeri i putim yau long tok bilong em. (Mk. 15:10) Na planti man i gat namba ol i belhat taim Jisas i tokaut olsem ol i man bilong tupela maus na man bilong giaman. (Mt. 23:​13-36) Ol i no laik save long Jisas, olsem na i stret em i kotim ol na i tok: “Yupela saveman bilong lo, yupela lukaut. Yupela i rausim pinis ki bilong . . . kisim save. Yupela yet i no laik i go insait long dispela ples [long Kingdom], tasol taim ol arapela manmeri i laik i go insait na kisim save, yupela i pasim rot bilong ol.”​—Lu. 11:​37-52.

Inap 3 yia na hap, Jisas i wok long autim gutnius long Israel. Na em i skulim sampela moa long mekim dispela wok. (Lu. 9:​1, 2; 10:​1, 16, 17) Wok bilong Jisas na ol disaipel i kamap gutpela tru, olsem na ol Farisi i toktok planti olsem: “Lukim. . . . Olgeta manmeri i go bihainim em.” (Jo. 12:19) Olsem na i no olsem ol Juda i no gat save liklik long ol tok bilong Jisas, nogat. Tasol ol i no gat save olsem Jisas em i Mesaia na ol i stap olsem tasol. Ol inap kisim sampela save moa long Mesaia na lain long laikim em, tasol ol i no mekim olsem. Bihain sampela i wok wantaim ol birua long kilim Jisas i dai. Olsem na aposel Pita i tokim planti bilong ol: “Yupela i mas senisim tingting nogut bilong yupela, na tanim bel, na bai God i rausim ol sin bilong yupela. Sapos yupela i mekim olsem, orait Bikpela bai i givim nupela strong long yupela. Na em bai i salim dispela man em i makim bilong . . . helpim yupela, em Jisas tasol.” (Ap. 3:​19, 20) Planti tausen Juda i kirap long putim yau long dispela tok, na “planti pris tu.” Ol i no mekim moa ol pasin olsem man i no gat save. Ol i tanim bel na Jehova i orait long ol.​—Ap. 2:41; 4:4; 5:14; 6:7.