Ol Man i Askim
Yu Ting God i Orait Long Pasin Bilong Maritim Planti Meri?
Nogat; lo God i bin putim taim em i kamapim namba wan marit long gaden Iden em olsem, man i mas i gat wanpela meri tasol. Bihain Jisas i strongim gen dispela lo em ol disaipel bilong em i mas bihainim.—Stat 2:18-24; Matyu 19:4-6.
Tasol ol man i bin i stap paslain long taim bilong ol Kristen, olsem Abraham, Jekop, Devit, na Solomon, ol i bin maritim planti meri, laka? Yes, tasol Baibel i stori olsem wanem long dispela pasin? Em i kamapim klia olsem dispela pasin i as bilong sampela hevi na kros pait i bin kamap insait long ol famili bilong Abraham na Jekop. (Stat 16:1-4; 29:18–30:24) Bihain, God i givim lo long olgeta wan wan king, olsem: “I tambu long king i maritim planti meri, long wanem, ol bai i mekim em i givim baksait long Bikpela.” (Lo 17:15, 17) Solomon i sakim dispela lo taim em i maritim 700 meri! Bikpela hevi i bin painim Solomon, pasin nogut bilong ol dispela meri i pulim em na em i givim baksait long Jehova. (1 King 11:1-4) Em nau, Baibel i kamapim klia olsem pasin bilong maritim planti meri em wanpela pasin i save kamapim planti hevi.
Tasol ating sampela i laik save, bilong wanem God i larim lain bilong em i maritim planti meri? Tingim: Olsem wanem? Yu gat wanpela olpela sia o tebol em yu mas tromoi, tasol yu larim i stap inap liklik hap taim, nogut yu tromoi na bai yu no gat samting bilong yusim? Tru, ol pasin bilong God na ol tingting bilong em i antap tru winim bilong yumi man. (Aisaia 55:8, 9) Tasol yumi inap lukim olsem i gat as na em i larim pasin bilong maritim planti meri i stap inap liklik hap taim.
Tingim, long gaden Iden, Jehova i bin tok promis olsem wanpela “pikinini” bai kamap na bagarapim Satan. Bihain, God i tokim Abraham olsem Abraham bai i kamap papa bilong wanpela bikpela lain na Pikinini em i bin tok promis long en em bai kamap long lain famili bilong Abraham. (Stat 3:15; 22:18) Satan i tingting strong long pasim rot bilong dispela Pikinini i kamap. Olsem na em i laik bagarapim na pinisim lain Israel bilong bipo. Planti taim em i pulim lain Israel long mekim sin na bai God i no ken orait moa long ol na lukautim ol.
Bilong helpim lain bilong em long sakim ol traim bilong Satan, planti taim Jehova i salim ol profet bilong em i go givim tok lukaut long ol taim ol i stat long lusim ol stretpela lo. Tasol em i save pinis olsem lain bilong em bai sakim tok bilong em planti taim, na ol bai sakim ol bikpela lo tu, olsem lo i tambuim pasin bilong lotuim ol giaman god. (Kisim Bek 32:9) Sapos ol bai hatwok long bihainim dispela bikpela lo, orait olsem wanem bai ol inap bihainim wanpela lo i tambuim pasin bilong maritim planti meri? Jehova i save gut long pasin bilong ol sinman, olsem na em i save olsem i no taim yet long em i tambuim dispela pasin, em wanpela pasin i bin i stap longpela taim pinis long dispela taim bipo. Sapos em i bin tambuim dispela pasin long dispela taim bipo, orait Satan bai no hatwok long pulim ol Israel long mekim sin.
Taim God i larim dispela pasin i stap inap liklik hap taim, dispela i mekim sampela narapela wok tu. Dispela i helpim lain Israel long kamap bikpela lain hariap. Taim lain Israel i kamap planti tru, dispela i lukautim ol i go inap long taim Mesaia i kamap. Na tu, ating pasin bilong maritim planti meri i bin helpim sampela meri na bai ol i gat haus na famili bilong lukautim ol long taim bilong hevi.
Tasol tingim: Jehova i no bin kamapim dispela pasin bilong maritim planti meri. Em i larim dispela pasin i stap inap liklik hap taim, na em i putim strongpela tambu long pasin bilong mekim nogut long ol meri. (Kisim Bek 21:10, 11; Lo 21:15-17) Long taim Jehova i bin makim bilong pinisim dispela pasin namel long lain i lotuim em, em i mekim wok long Pikinini bilong em bilong strongim dispela lo em i bin kamapim bipo long gaden Iden. Olsem na Jisas i tambuim ol disaipel bilong em long maritim planti meri. (Mak 10:8) Dispela tok i tru i kamap klia moa: Lo Bilong Moses i gutpela long dispela taim bipo, tasol “lo bilong Krais” i gutpela moa.—Galesia 6:2.