Rot Bilong Kliagut Long Ol Tok Bilong Baibel
2. No Ken Larim Ol Tingting Yu Kisim Pinis i Pasim Yu
Olsem wanem? I gat wanpela taim we wanpela pren i bin tokim yu long pasin kranki bilong wanpela man yu no bin bungim bipo? Orait taim yu bungim em pinis, olsem wanem? Tok bilong pren bilong yu i pasim yu long luksave long ol gutpela pasin bilong em? Wankain samting i ken kamap long Baibel.
APOSEL Pol i stori long samting inap kamap sapos yumi larim ol tingting yumi kisim pinis i pasim yumi taim yumi ritim Baibel. Pol i tok long sampela Juda long taim bilong em olsem: “Mi save gut long ol na mi tokaut olsem, ol i strong tumas long bihainim pasin God i laikim. Tasol ol i no kliagut long laik tru bilong God, na ol i mekim.”—Rom 10:2.
Sampela Juda long taim bilong ol aposel ol i no laik bilip olsem Jisas em i Mesaia, maski Ol Skripsa Hibru i kamapim klia dispela samting. Jisas bilong Nasaret i inapim olgeta mak bilong Mesaia em Baibel i kolim na em i truim olgeta tok profet i tokaut long ol samting Mesaia bai mekim. Tasol planti Juda i no kliagut long Tok Bilong God, long wanem, ol i larim sampela tingting ol i kisim pinis i pasim ol.
Pasin bilong ol dispela Juda inap skulim yumi long wanem samting? Olsem: Taim yumi ritim Baibel, yumi no ken larim ol tingting yumi kisim pinis i pasim yumi long kliagut long ol tok bilong en.
Olsem: Wanpela profesa bilong lotu long North Carolina, Amerika, i tok: “Baibel em wanpela buk ol man i bin raitim na i kamapim tingting bilong ol man tasol, em planti bilong ol dispela tingting i no wanbel wantaim na i no inap soim rot tru long yumi.” Sapos man i ritim Baibel i tingim Baibel i olsem “wanpela buk ol man i bin raitim” na em tasol, ating bai em i no bihainim ol tok em i no wanbel long en, a?
Baibel i kirapim yumi long stadi gut long ol tok bilong en. Pol i tok long ol Beria long taim bilong em olsem: “Ol i harim tok bilong Pol, na ol i laikim tru. Na long olgeta de ol i save ritim na skelim tok i stap long buk bilong God, bilong ol i ken save, tok bilong Pol em i tru, o nogat.” (Aposel 17:11) Wankain olsem ol dispela Beria, redi long kisim ol nupela tingting na lusim ol tingting kranki yu bin kisim. Taim yu ritim Tok Bilong God, amamas long kisim save long ol gutpela tok i stap long en, em ol tok i kam long dispela Man i bin givim Baibel long yumi.