Gutpela Lotu i Skulim Man Long Ol Stretpela Lo

GUTPELA lotu i save givim gutpela na stretpela tingting long yumi na soim yumi long rot bilong stretim pasin bilong yumi. Em i strongim yumi long mekim pasin i stret na helpim yumi long mekim gutpela pasin inap tru long skel bilong yumi. Olsem wanem yumi save olsem gutpela lotu i save mekim ol dispela samting?

Tingim tok em aposel Pol i bin givim long ol Kristen bilong pastaim em ol i sindaun long Korin, long kantri Grik. Dispela biktaun bilong bipo i gat nem long mekim olkain pasin i no stret. Pol i tok lukaut olsem: “Ol man i save mekim pasin pamuk, na ol man i save lotu long ol giaman god, na ol man i trabel long ol maritmeri, na ol man i save mekim ol kain kain pasin i gat sem wantaim ol arapela man, na ol stilman, na ol man i save mangal . . . na ol man i save spak, na ol man i save tok bilas long ol arapela man, na ol man i save pulim samting bilong ol arapela man, olgeta dispela kain man bai i no inap i go insait long kingdom bilong God.” Na Pol i tok moa: “Bipo sampela bilong yupela i stap kain man olsem. Tasol God i wasim yupela pinis na mekim yupela i kamap lain manmeri bilong em stret. Yupela i kisim nem stretpela man pinis. Na long nem bilong Bikpela Jisas Krais na long strong bilong Spirit bilong God yet, God i mekim yupela i kamap stretpela manmeri long ai bilong en.” (1 Korin 6:​9-11) Tingim dispela: Gutpela lotu i bin helpim sampela man em ol i no bin i gat ol stretpela lo bilong bihainim, na ol i kamap klinpela na stretpela wokman bilong God!

Tasol Baibel i tok lukaut olsem: “Bihain ol man bai i no laik harim moa ol stretpela tok. Nogat. Yau bilong ol bai i skrap long harim ol narakain narakain tok, na ol bai i kisim planti man bilong skulim ol long kain tok ol i save laik long harim.”​—2 Timoti 4:3.

Ol lotu yu save long en, ol i mekim wanem? Ol i save bihainim ol stretpela lo bilong Baibel? O ol i save haitim sampela tok bilong Baibel we i klia tru na ol i tokim ol man long ol “kain tok ol i save laik long harim”?

Bilong helpim yu long skelim olsem wanpela lotu i save kamapim gutpela kaikai o nogat, i gutpela yu lusim hap taim long bekim ol askim i stap daunbilo.

TOK BILONG SKELIM: Marit.

TOK BILONG BAIBEL: “Marit em i gutpela samting tru, na yupela ol marit i mas lukautim gut marit bilong yupela, bai em i stap klin tru long ai bilong God. Yupela i save, God bai i bekim pe nogut long ol manmeri i mekim ol kain kain pasin pamuk.”​—Hibru 13:4.

ASKIM: Sapos wanpela man na meri bilong dispela lotu ol i sindaun nating wantaim, orait dispela lotu i laik bai tupela i mas marit stret long lo bilong gavman o nogat?

TOK BILONG SKELIM: Katim marit.

TOK BILONG BAIBEL: Taim ol i askim Jisas olsem i gat as long man i ken katim marit o nogat, Jisas i tok: “Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.”​—Matyu 19:9.

ASKIM: Dispela lotu i rispektim tok bilong Jisas na i orait long pasin bilong katim marit na maritim nupela poroman​—ol i ken mekim tasol long taim poroman marit i mekim pasin pamuk?

TOK BILONG SKELIM: Pasin pamuk.

TOK BILONG BAIBEL : “Yupela i mas i stap longwe long pasin pamuk. Olgeta arapela sin ol man i save mekim, ol i kamap ausait long bodi. Tasol man i mekim pasin pamuk, em i mekim nogut long bodi bilong em yet.”​—1 Korin 6:18.

“Ol meri bilong ol ol i lusim stretpela pasin bilong marit, na ol i bihainim pasin i no stret. Na ol man tu ol i lusim stretpela pasin bilong marit, na bel bilong ol i kirap olsem paia, na ol i mekim pasin nogut wantaim ol arapela man. Ol man i mekim ol dispela pasin i gat sem, olsem na ol yet i kisim pe nogut inap long bekim dispela pasin nogut bilong ol.”​—Rom 1:​26, 27.

ASKIM: Dispela lotu i skulim ol man olsem pasin pamuk namel long man na meri o namel long tupela man o tupela meri em i wanpela sin?

TOK BILONG SKELIM: Ol lain bilong lotu i no pret long sambai long ol stiatok na lo bilong Baibel.

TOK BILONG BAIBEL : “Sapos wanpela man yupela i save kolim brata long Krais, em i mekim pasin pamuk o em i mangal . . . o em i lotu long ol giaman god o em i tok bilas o em i spak o em i stilim samting bilong narapela man, orait yupela i no ken i stap wantaim em. Nogat. Na tu, yupela i no ken kaikai wantaim kain man olsem.” (1 Korin 5:11) Ol man i tok ol i Kristen tasol ol i mekim sin na i no tanim bel, wanem samting i mas painim ol? Baibel i tok: “Yupela i mas rausim dispela man nogut i stap namel long yupela.”​—1 Korin 5:13.

ASKIM: Dispela lotu i save rausim long lista nem bilong ol man o meri i sakim ol lo bilong Baibel na ol i no tanim bel?

[Rait long pes 6]

Wanem lotu i gat nem long bihainim ol stretpela lo bilong Baibel?