Yu Save Long Dispela?

Ol saveman bilong lo i biruaim Jisas ol i husat?

Taim Jisas i mekim wok bilong em long graun, em i bungim ol saveman bilong lo, long Jerusalem na long ol liklik taun na ples tu. Long ol hap i stap ausait long Jerusalem​​—na long ol komiuniti bilong ol Juda ausait long Palestain tu​—​ol dispela man i holim namba; ol i bin skul gut long Lo na sampela i save raitim ol kopi bilong Lo o mekim wok olsem jas.​​—Mak 2:6; 9:​14; Luk 5:​17-​21.

Long Jerusalem, ol saveman bilong lo i save wok bung wantaim ol hetman bilong gavman Juda. (Matyu 16:21) Buk The Anchor Bible Dictionary i tok, long Jerusalem “ol i save wok bung wantaim ol pris​—long harim kot na mekim ol man i bihainim ol kastam na ol lo bilong ol Juda, na long mekim wok bilong Sanhedrin.” Ol i tisa bilong Lo na ol i gat bikpela namba, olsem na sampela ol i memba bilong Sanhedrin, em nambawan kot bilong ol Juda. Ol i wok wantaim ol bikpris na ol Farisi.

Ol saveman bilong lo i save birua long Jisas. Tasol i gat sampela em ol i no birua long em. Wanpela saveman bilong lo i tokim Jisas: “Tisa, olgeta ples yu go long en, bai mi bihainim yu i go wantaim.” Jisas i tokim narapela: “Yu no i stap longwe long kingdom bilong God.”​​—Matyu 8:​19; Mak 12:​28-​34.

Pasin bilong kapsaitim wel long het bilong man i makim wanem samting?

Long Midel Is long taim bilong ol man i raitim Baibel, pasin bilong kisim wel na welim het bilong man i makim olsem ol i rispektim em, na tu, dispela em gutpela pasin ol i mekim long man i kam long haus bilong ol. Wel ol i save yusim em wel bilong oliv ol i bin tanim wantaim sanda. Na tu, ol Hibru i save kapsaitim wel long het bilong man taim ol i makim em long kisim bikpela wok i gat namba. Olsem: Ol i welim het bilong Aron taim ol i makim em long kamap hetpris. (Wok Pris 8:​12) Long King Devit, “Samuel i kisim dispela wel bilong oliv em i bin bringim i kam, na em i kapsaitim liklik wel long het bilong Devit . . . Na long dispela de spirit bilong Bikpela i kam i stap strong long em na spirit i stap long em oltaim bihain.”​​—1 Samuel 16:13.

Long tok Hibru, hap tok ol i yusim bilong stori long dispela kain pasin bilong makim man, em ma·shachʹ, na long dispela tok ol i kisim tok ma·shiʹach, o Mesaia. Long tok Grik, dispela tok Hibru em khriʹo, na long dispela tok ol i kisim tok khristosʹ, o Krais. Olsem na i stret yumi kolim Aron na Devit olsem mesaia, o man God i makim. Baibel i kolim Moses tu olsem krais, o man God i makim, long wanem, God i bin makim em long stap mausman bilong Em.​​—Hibru 11:​24-​26.

God yet i bin makim Jisas long mekim wanpela wok i gat bikpela namba. Tasol God i no kapsaitim wel long het bilong Jisas bilong makim em, nogat, em i kapsaitim holi spirit long Jisas bilong makim em. (Matyu 3:​16) Jisas em Man God i Makim, olsem na i stret yumi ken kolim em Mesaia, o Krais.​​—Luk 4:​18.