Painim Ol Samting i Dia Tumas
OLSEM WANEM? Yu bin painim wanpela gutpela samting long hap we yu no bin ting em bai i stap long en? Dispela samting i bin kamap long Mas 27, 2005, long wanpela Witnes Bilong Jehova long Estonia, em Ivo Laud. Em i wok long helpim wanpela lapun Witnes, em Alma Vardja, long brukim olpela haus bilong putim ol tul. Taim ol i rausim wol bilong haus, ol i lukim wanpela hap plang i karamapim sait bilong wanpela pos. Taim ol i rausim plang, ol i lukim wanpela baret insait long en, braitpela bilong en em 10 sentimita, na longpela bilong en em 1.2 mita, na i go insait inap 10 sentimita, na ol i karamapim long plang i luk wankain. (1) Insait long en ol i bin haitim ol samting i dia tumas! Wanem ol dispela samting? Husat i haitim long dispela hap?
Insait long dispela pos i gat sampela samting em ol i bin karamapim gut tru long strongpela pepa. (2) Ol dispela karamap i gat ol nius bilong ol Witnes Bilong Jehova, na planti em ol stadi Wastaua, sampela em ol stadi bilong 1947. (3) Ol i raitim gut tru long han long tok ples Estonia. Sampela bilong ol dispela karamap i gat ol samting we inap helpim yumi long save long man i bin haitim ol dispela samting. I gat ol stori bilong samting i kamap taim ol i sutim ol strongpela askim long man bilong Alma, em Villem Vardja. Na ol i painim tu stori bilong ol yia em i bin i stap long kalabus. Bilong wanem ol i kalabusim em?
Villem Vardja i holim sampela wok long Tartu Kongrigesen, na bihain long Otepää Kongrigesen long Estonia; bipo Estonia i stap aninit long Ripablik Bilong Soviet Yunion. Ating em i bin lainim tok i tru bilong Baibel paslain liklik long Wol Woa 2. Sampela yia bihain, long Disemba 24, 1948, lain Komiunis i arestim Brata Vardja, long wanem, em i mekim wok bilong lotu. Ol polis i sutim kain kain askim na mekim nogut long em taim ol i wok long subim em long tokaut long nem bilong ol wanlotu bilong em. Ol i no larim em long kisim loya bilong helpim em long kot, na kot i makim em bilong kalabus inap 10-pela yia long ol banis kalabus long Rasia.
Villem Vardja i stap gut long Jehova i go inap long taim em i dai long Mas 6, 1990. Meri bilong em i no save olsem ol dispela nius i stap. Ating Brata Vardja i laik lukautim meri bilong em, nogut ol polis i sutim kain kain askim long em tu. Bilong wanem em i haitim ol dispela nius? Long wanem, lain KGB, em ol polis bilong Soviet Yunion bilong bipo, ol i save kamap long haus bilong ol Witnes Bilong Jehova long kain kain taim bilong painim ol buk bilong lotu. Ating Brata Vardja i haitim ol dispela samting bambai ol wanbilip i gat ol buk i stap yet bilong mekim lotu sapos ol KGB i kisim ol narapela buk samting. Long 1990, ol i painim sampela narapela bokis i gat ol nius long en em ol i bin haitim. Ol i painim wanpela bilong ol dispela bokis long Tartu, sauten Estonia. Na dispela tu em wanpela bilong ol bokis em Villem Vardja i bin haitim.
Bilong wanem yumi kolim ol dispela pepa i gat rait long en olsem ol samting i dia tumas? Long wanem, ol man yet i bin raitim gut long han na haitim gut, na dispela i kamapim klia olsem ol Witnes i bin pilim tru ol kaikai bilong spirit ol i gat long dispela taim. (Mt. 24:45) Olsem wanem? Yu pilim tru ol kaikai bilong spirit em yu inap kisim long nau long kongrigesen bilong yu? Wanpela bilong ol dispela kaikai bilong spirit em Wastaua long tok ples Estonia na long planti arapela, winim 170 tok ples.