Gutnius Long 500 Tokples

TAIM bikpela pait i bin stap insait long kantri Ruanda, wanpela liklik lain bilong tanim tok i lusim haus na ol samting bilong ol na ranawe. Tasol samting ol i kisim i go wantaim ol long ol refiuji kem em ol laptop kompiuta bilong ol. Bilong wanem? Ol i mekim olsem bambai ol i ken mekim yet wok bilong tanim tok bilong ol buk na nius bilong Baibel i go long tokples Kinyarwanda.

Wanpela yangpela meri long Saut-is Esia i save taipim ol tok long kompiuta bilong em i go inap long biknait tru, maski em i taiet, ples i hat, na planti taim pawa i save blakaut na dispela i putim hevi long wok bilong em long tanim tok. Bilong wanem em i mekim olsem? Em i mekim olsem bambai em i ken pinisim wok paslain long det ol i makim bilong prinim nius.

Ol dispela lain bilong tanim tok, ol i sampela tasol bilong ol 2,300 volantia bilong tanim tok em ol i stap long 190 ples long olgeta hap bilong graun. Ol i gat kain kain krismas​—kirap long 20 krismas i go inap 90 krismas samting​—na ol i wok strong tru na bai ol tok bilong Baibel i ken helpim ol manmeri long 500 tokples.​—KTH 7:9.

Wokim Ol Nius Long Planti Tokples

Insait long sampela yia i go pinis, wok bilong ol Witnes Bilong Jehova long tanim tok i go bikpela tru. Olsem, long 1985, ol i prinim nius Wastaua long wankain taim long 23 tokples​—em wanpela bikpela wok tru long dispela taim. Long nau Wastaua i stap long 176 tokples. Na ol i prinim olgeta long wankain taim na bai ol man husat i ritim dispela nius long olgeta hap bilong graun, ol i ken stadi long wankain tok long wankain taim.

Long 50 tokples samting, ol man inap kisim nius Wastaua tasol long olgeta mun long tokples bilong ol. Bilong wanem? Long wanem, ol bisnis i save prinim buk samting, ol i no gat laik long prinim ol buk long tokples bilong ol asples lain. Tasol ol Witnes Bilong Jehova long olgeta hap, ol i redi long givim mani samting bilong ol yet na bai Tok Bilong God na ol buk na nius bilong Baibel i ken stap long ol hap we ol man i mas kisim ol dispela tok.​—2 Korin 8:14.

Ol manmeri i save pilim tru ol tok bilong Baibel taim em i stap long tokples bilong ol. Olsem, i no longtaim i go pinis ol i bin wokim sampela buk na nius long tokples Miskito, em wanpela tokples em 200,000 manmeri long Nikaragua i save mekim. Wanpela meri i askim sapos em inap kisim buk Baibel Stori Buk Bilong Mia long tokples Miskito, na taim ol i bringim buk i kam long dispela meri, wanpela pasto tu i bin stap. Taim pasto i lukim dispela naispela buk, em i laik kisim dispela buk. Meri i no orait long givim buk long em, maski pasto i laik givim 20 kilogram kofi bin long em olsem senis bilong buk!

Insait long tenpela yia i go pinis, ol i bin tanim tok bilong sampela buk na nius bilong Baibel long winim 12-pela tokples bilong ol asples Meksiko, sampela bilong ol em tok Maya, Nahuatl, na Tzotzil. Pastaim i gat 72 kongrigesen i save mekim tokples bilong ol asples na tokples Sain bilong ol yaupas, tasol insait long 9-pela yia samting dispela namba bilong kongrigesen i go antap inap 1,200. Ol Witnes Bilong Jehova i save planim tok i tru bilong Baibel olsem pikinini kaikai long bel bilong ol man, tasol ol i larim God i mekim kaikai i kamap.​—1 Korin 3:​5-7.

Baibel New World Translation of the Holy Scriptures Long 80 Tokples

Insait long sampela yia i go pinis, ol Witnes Bilong Jehova i bin wok strong long wokim Baibel New World Translation of the Holy Scriptures​—Baibel olgeta o hap bilong en​—long 80 tokples. Wanem samting i kamap long dispela? Wanpela Witnes long Saut Afrika i tok long Baibel long tokples Tswana olsem: “Em i wanpela gutpela samting tru. Em bai strongim pasin bilong mi long laikim tru Tok Bilong God. Ol tok ol i yusim em i isi long ritim na mi laikim.” Wanpela man Mosambik husat i save mekim tokples Tsonga, em i tok: “I gat ol buk na nius bilong Baibel, tasol i no gat Baibel, dispela i olsem i gat laitning na tanda, tasol i no gat ren! Tasol gutpela samting olsem ren i pundaun taim ol i kamapim Baibel New World Translation long tokples Tsonga.”

Tru tumas, ol manmeri husat i tanim tok bilong gutnius bilong Baibel na tilim long ol man, ol i inapim wanpela tok profet bilong bipo. Em tok Jisas Krais yet i mekim, em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”​—Matyu 24:14.

[Futnot]

[Sat long pes 25]

(Bilong save ol dispela rait i stap we long pes, lukim buk o magasin)

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

HAMAS TOKPLES

[Ol Piksa long pes 24, 25]

Inap olsem 2,300 volantia i tanim tok bilong ol buk na nius bilong Baibel long 500 tokples

BENIN

SLOVENIA

ITIOPIA

BRITEN