Bisi na Amamas Long Mekim Wok Bilong Jehova

JEHOVA i laik bai yu stap amamas. (Sng. 100:2) Yu wanpela wokman bilong em, olsem na ating yu save bisi tu. Ating yu no bin bisi olsem long taim yu dediket long God, tasol nau wok mani na ol wok lotu i mekim na yu bisi tru. Na ating yu pilim nogut taim yu no inap pinisim olgeta wok yu laik mekim. Orait, olsem wanem yu inap skelim gut ol samting na holim yet pasin bilong “amamas long Bikpela”?​—Neh. 8:10.

Yumi stap long taim bilong hevi na planti samting bai putim hevi long yu, olsem na yu mas stretim gut ol wok bilong yu. Sampela tok em holi spirit i kirapim aposel Pol long raitim, em i stret long dispela samting, olsem: “Yupela i mas lukaut gut long wokabaut bilong yupela. Yupela i no ken wokabaut olsem man i no gat save. Nogat. Yupela i mas wokabaut olsem man i gat save. Nau yupela i gat taim bilong mekim pasin bilong God. Tasol dispela taim nau yumi stap long en, em i taim nogut, olsem na yupela i mas lukaut, nogut dispela taim i lus nating.”​—Ef. 5:​15, 16.

Taim yu tingim dispela gutpela tok, olsem wanem yu inap putim ol mak yu ken winim na skelim gut taim bilong yu long mekim stadi bilong yu yet, lukautim famili, mekim wok autim tok, wok mani, na ol narapela wok em yu mas mekim?

Yu tingim yet amamas yu bin kisim taim yu dediket long God na kisim baptais? Yu bin amamas taim yu kisim save long Jehova na long ol samting em i tingting pinis long mekim. Ating inap sampela mun yu bin stadi gut bilong kisim dispela save na amamas. Tasol hatwok bilong yu i kamapim gutpela samting. Dispela stadi i mekim na sindaun bilong yu i kamap gutpela moa.

Bilong holimpas amamas bilong yu, yu mas wok yet long kisim ol kaikai bilong spirit. Sapos yu hatwok long makim taim bilong ritim na stadi long Baibel, orait skelim sediul bilong yu. Maski yu lusim liklik haptaim tasol long wanpela de bilong stadi na tingim tingim long bel ol tok yu ritim, dispela bai helpim yu long i go klostu moa long Jehova, na dispela bai helpim yu long stap amamas.

Planti wokman bilong God inap lusim sampela samting i no bikpela samting na makim dispela hap taim bilong mekim ol samting i bikpela samting. Askim yu yet, ‘Mi save lusim hamas aua samting bilong ritim ol magasin o niuspepa, lukim TV, harim musik, o mekim wanpela samting em mi save laikim tru?’ Ol kain samting olsem inap givim amamas long yumi sapos yumi mekim inap long mak stret. (1 Ti. 4:8) Sapos yu lukim olsem taim bilong yu i no mekim gutpela wok long taim bilong yu, orait stretim gut sediul bilong yu.

Adam em i wanpela man marit i gat 3-pela pikinini na em i wanpela elda, em i stori long wanem samting i bin helpim em, em i tok: “Mi wok strong long holim liklik samting tasol. Mi abrusim ol amamas i save pulim bikpela hap taim na ol kago samting em mi mas lusim bikpela hap taim bilong lukautim. Tasol i no olsem mi daunim olgeta laik bilong mi long kisim amamas, nogat. Mi save amamas long mekim ol kain pilai samting we i no gat wok long mi tromoi bikpela mani, taim, na strong bilong mekim.”

Pasin bilong tingim tingim ol gutpela samting i kamap long ol disisen yu bin mekim, dispela inap strongim gen amamas bilong yu na i helpim yu long holim stretpela tingting long ol samting. Olsem: Mariusz, em wanpela elda i gat 3-pela pikinini, em i tok: “Taim mi stat stadi long Baibel, mi kirap kisim pasin bilong ting olsem ol gutpela samting bai kamap. Tasol sampela taim ol hevi i save painim mi, na planti bilong ol dispela hevi em Jehova tasol i save long en. Tasol mi tenkyu tru long em i helpim mi na mi amamas long wetim gutpela samting bai kamap bihain.”

Olsem Mariusz, maski man i holim stretpela tingting long ol samting, dispela i no inap pinisim olgeta pasin bilong tingting planti. Tasol em inap helpim yu long stap bel isi na karim ol kain kain hevi i save painim yu. Baibel i tok: “Man i sot long ol samting, em i stap nogut na i gat bikpela hevi oltaim. Tasol sapos em i man bilong belgut na amamas, orait olgeta de i olsem de bilong pati.” (Snd. 15:15) Tingim tu pasin laikim em God i bin kamapim pinis long yu. Kain pasin olsem inap strongim pasin bilong yu long laikim God na amamas bilong yu bai kamap bikpela moa.​—Mt. 22:37.

Taim famili i putim Jehova na wok bilong em i stap namba wan long laip bilong ol, amamas bilong ol bai go bikpela moa. Ol gutpela pasin Kristen ol i kamapim i daunim pasin bilong kros pait, na famili i pas gut moa na toktok gut wantaim. Taim famili i mekim olsem, haus bilong ol bai stap olsem ples bilong bel isi, na pasin wanbel bai stap namel long famili olgeta.​—Sng. 133:1.

Narapela samting bilong helpim famili long stap amamas tru em ol i mas insait long mekim ol wok lotu. Mariusz i tok: “Hap taim em mipela famili i save mekim ol samting wantaim em i bikpela samting long mi. Meri bilong mi i save sapotim tru mi. Taim em inap, em i save stap wantaim mi long wok bilong autim tok o klinim ples kibung paslain long kibung, na em i save go wantaim mi taim mi go mekim pablik tok long ol narapela kongrigesen. Dispela pasin i strongim tru mi.”

Baibel i tok ol Kristen i mas lukautim famili bilong ol long klos na kaikai samting. (1 Ti. 5:8) Tasol sapos wok mani i pulim bikpela hap taim na strong bilong yu, dispela inap pinisim amamas bilong yu long mekim wok bilong God. Beten long Jehova na kamapim dispela hevi long em. (Sng. 55:22) Sampela i kisim tingting olsem, bilong putim Kingdom Bilong God i stap namba wan ol i mas painim narapela wok. Ol Kristen i no ken larim ol gutpela samting ol i kisim long wok mani i mekim na ol i no tingim tumas ol wok bilong God em ol i bikpela samting.​—Snd. 22:3.

Em bai helpim yu sapos yu raitim long pepa ol gutpela samting na ol hevi bilong wok mani yu inap kisim o bilong wok nau yu holim. Tru, yu gat laik long kisim gutpela pe na kisim amamas long wok bilong yu. Tasol olsem wanem? Wok nau yu holim i helpim yu long mekim ol samting bilong helpim famili bilong yu long pas gut wantaim God? Skelim gut ol samting, na ol disisen yu mekim i mas kamapim olsem yu tingim pasin bilong yu long pas gut wantaim Jehova i bikpela samting.

Sapos wok nau yu mekim i no helpim yu long kamap strong long ol samting bilong spirit, orait yu mas senisim ol samting long sindaun bilong yu. Planti Kristen i bin mekim ol bikpela senis bambai ol i gat taim long mekim ol wok lotu. Wanpela brata long Polan i tok: “Wanpela taim mi no gat narapela rot, na mi lusim kampani mi bin wok long en, long wanem, planti taim mi save go raun long ol narapela narapela hap bilong mekim wok bilong kampani. Mi no bin i gat taim bilong mekim gut ol wok lotu o wok bilong lukautim famili bilong mi.” Nau em i kisim wanpela wok i no pulim bikpela hap taim na strong bilong em.

Kisim Amamas Long Helpim Ol Narapela

Jisas i tok olsem “amamas bilong man i givim samting long ol arapela man, dispela i winim amamas bilong man i kisim samting bilong em yet.” (Ap. 20:35) Ol Kristen i gat planti rot bilong givim ol samting. Sampela taim, pasin bilong smail, sekan, o tok tenkyu long brata i wok strong long mekim wanpela wok insait long kongrigesen, ating dispela inap mekim yutupela wantaim i amamas.

Aposel Pol i tokim ol wanlotu Kristen: “Mekim gut bel bilong ol man i bel hevi, na helpim ol man i no gat strong.” (1 Te. 5:​14, NW) Ol man i bel hevi ol inap pilim olsem ol i no inap karim hevi long strong bilong ol yet. Yu ting yu inap strongim kain man olsem? Sapos yu lukim olsem wanpela brata i no amamas moa long mekim wok bilong Jehova, orait strongim em. Taim yu mekim olsem, dispela bai strongim yu tu. I gat sampela hevi em ol man i no inap long stretim. Tasol yu ken mekim pasin sori long brata bilong yu na kirapim em long putim hevi bilong em long han bilong Jehova husat i save helpim yumi oltaim. Ol man i mekim olsem ol bai amamas.​—Sng. 27:10; Ais. 59:1.

Narapela rot, em yu ken singautim man husat i luk olsem em i no amamas, long kam wantaim yu long autim tok. Taim Jisas i salim 70 disaipel, em i salim ol i go “tupela tupela.” (Lu. 10:1) Ating yu wanbel olsem dispela pasin bilong autim tok i helpim narapela long strongim narapela. Olsem wanem? Yu inap bihainim dispela pasin na helpim sampela long kisim bek amamas bilong ol long nau?

I gat planti samting long sindaun bilong yumi i save mekim yumi tingting planti. Tasol Pol i tokim yumi: “Oltaim yupela i mas amamas long Bikpela. Mi tok gen, yupela i mas amamas.” (Fl. 4:4) Yu laikim tru God, bihainim tok bilong em, na yu givim bel tru long mekim wok em i bin givim yu long mekim, olsem na laip bilong yu i gat as tru bilong en. Dispela i givim amamas long yu. Na bikpela samting moa, Jehova i helpim yu long karim kain kain hevi i painim yu.​—Ro. 2:​6, 7.

Yumi bilip olsem nupela taim Jehova i tok promis long kamapim em i klostu pinis. Tingim bikpela amamas na planti blesing yumi bai kisim! (Sng. 37:34) Olsem na i gat as na yumi ken amamas na no ken lusim tingting long planti gutpela samting em Jehova i givim yumi long nau tu. Em nau, yumi inap “belgut long Bikpela na lotu long em.”​—Sng. 100:2.

[Sat long pes 8]

(Bilong save ol dispela rait i stap we long pes, lukim buk o magasin)

Bilong holim yet amamas bilong yu, ating yu mas makim gut taim bilong mekim ol wok bilong yu

OL AMAMAS

LUKAUTIM HAUS na FAMILI

WOK

OL MITING KRISTEN

STADI BILONG YU YET

WOK AUTIM TOK

[Ol Piksa long pes 10]

Yu ting yu inap helpim ol narapela long kisim bek amamas bilong ol?