Man i Kamapim Bikpela Senis
Planti bilion man i bin i stap laip na i dai long dispela graun. Planti bilong ol i no bin mekim wanpela bikpela wok we ol man inap tingim ol long en. Tasol i gat sampela em ol i bin kamapim ol bikpela senis—na ating ol i bin kamapim sampela senis long ol samting yu save mekim long olgeta wan wan de.
YU KIRAP long moningtaim na yu redi long i go long ples wok. Yu onim lait taim yu wok long redi i stap. Yu kisim wanpela buk o magasin bilong ritim taim yu sindaun long bas. Yu tingim long kisim marasin em dokta i makim bilong helpim yu long daunim wanpela kain sik. Nau tasol de bilong yu i kirap, na yu kisim pinis helpim bilong sampela man i gat nem.
Michael Faraday Em i bon long 1791, na em i wanpela saveman bilong Inglan, na em i namba wan man long wokim moto elektrik na masin bilong kamapim pawa. Dispela wok bilong em i opim rot long ol man inap yusim elektrik.
Ts’ai Lun Wanpela ofisa long haus king bilong Saina, na em i gat nem olsem man i kamapim pasin bilong wokim pepa long 105 C.E. samting, na dispela i opim rot long ol man inap wokim planti pepa.
Johannes Gutenberg Long yia 1450 samting, dispela saveman bilong Jemani i kamapim namba wan masin bilong prinim buk. Dispela i opim rot long ol inap prinim ol buk long liklik pe, na long dispela rot planti man inap ritim stori bilong kain kain samting.
Alexander Fleming Long 1928, dispela saveman bilong Skotlan em i painimaut wanpela kain marasin antibaiotik em i kolim penisilin. Long nau planti man i save yusim marasin antibaiotik long oraitim ol sik i kamap long rot bilong baktiria.
Tru tumas, save na wok painimaut bilong sampela man tasol i bin helpim planti bilion manmeri long kain kain samting na long kisim gutpela helt.
Tasol i gat wanpela man tasol husat i winim tru olgeta narapela man. Em i no gat nem long sampela kain wok painimaut bilong saiens o helt samting, nogat. Tasol dispela man i gat pasin daun na i dai inap 2,000 yia i go pinis, em i bin mekim ol tok i mekim gut bel bilong ol man na i helpim ol long bilip na wetim gutpela samting. Tok bilong em i bin mekim sampela samting long sindaun bilong ol man long olgeta hap bilong graun. Taim ol i skelim ol dispela samting, planti man bai wanbel long tok olsem dispela man i bin senisim tru i stap bilong ol man.
Dispela man em Jisas Krais. Em i bin autim wanem tok? Na dispela tok inap mekim wanem long laip bilong yu?