Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Yu ken traim bekim ol dispela askim i stap daunbilo:

• Bilong wanem Mesaia i mas dai?

Indai bilong Jisas i kamapim long ples klia olsem man i gutpela olgeta inap tru long holimpas pasin bilong givim bel tru long God, maski ol bikpela traim i painim em. Na tu, em i baim bek ol man na pinisim strafe bilong sin em olgeta tumbuna pikinini bilong Adam i bin kisim long em, na dispela i opim rot long ol man inap kisim laip oltaim.​—12/15, pes 22-23.

• Wanem samting inap helpim man long holim stretpela tingting long alkohol?

Pasin bilong beten na stadi long Baibel inap helpim man. Na tu, em i bikpela samting long man i mas kisim pasin bilong bosim gut em yet, tingting strong long bihainim pasin em i makim pinis, na makim ol gutpela poroman. Sapos wanpela i laik dring, orait em i mas putim mak i stret long skel.​—1/1, pes 7-9.

• Wanem ol samting i insait long pasin bilong papamama long toktok gut wantaim ol pikinini?

Pasin bilong toktok wantaim pikinini i no olsem yu toktok nating tasol wantaim pikinini, nogat. Yu mas givim sampela askim long ol na putim gut yau long ol bekim bilong ol. Planti papamama i bin lukim olsem taim bilong kaikai i save opim rot long famili long toktok gut wantaim.​—1/15, pes 18-19.

• Jehova em i gutpela olgeta, olsem na olsem wanem em inap pilim nogut long samting em i bin mekim?

Sampela taim God i save senisim tingting bilong em long ol manmeri bilong em. Olsem, planti taim lain Israel i givim baksait long Jehova na lotuim ol narapela god. Dispela i mekim na Jehova i no lukautim ol moa. Tasol taim ol i pilim sori long rong bilong ol na ol i krai long God i helpim ol, em i save senisim tingting bilong em na i “marimari long ol.” (Het. 2:18)​—2/1, pes 21.

• Wanem samting inap mekim na man i tingting long kisim baptais gen?

Long taim man i kisim baptais, ating sampela samting long i stap bilong em i bin stap hait, o em i mekim sampela samting em kongrigesen inap rausim em long en sapos em i bin baptais pinis.​—2/15, pes 22.

• Wanem tripela eskius sampela man i save givim bilong mekim pasin stil?

Sampela i pilim olsem i stret long ol i stilim samting, long wanem, ol i stap rabis. Ol narapela i save givim eskius na tok, “Olgeta man i save mekim.” Na sampela husat i painim samting i dia tumas i tingting olsem, “sapos yu painim wanpela samting, orait em bilong yu nau.” Tasol Baibel i no orait liklik long ol kain eskius olsem.​—3/1, pes 12-14.

• Long tok piksa bilong Jisas long pikinini wit na gras nogut, wok bilong tromoi gutpela pikinini wit i makim wanem samting?

Pikinini bilong man, em Jisas, i bin redim gaden taim em i mekim wok autim tok bilong em hia long graun. Kirap long Pentikos 33 C.E. na i kam, em i kirap tromoi gutpela pikinini wit taim em i makim ol Kristen i kamap olsem ol pikinini bilong God, em ol pikinini bilong Kingdom.​—3/15, pes 20.

• Olsem wanem ol i kisim ol manmeri i olsem wit i kam insait long haus kaikai bilong Jehova? (Mt. 13:30)

Truim bilong en i wok long kamap tru insait long taim bilong las de bilong pasin bilong dispela graun. Ol Kristen God i bin makim olsem ol pikinini bilong Kingdom, em wit i piksa bilong ol​—God i kisim ol i kam insait long kongrigesen Kristen i bin kamap bek pinis, o ol i kisim presen bilong ol em laip long heven.​—3/15, pes 22.

• Husat i makim ol buk i hap tru bilong Ol Skripsa Grik?

I no gat wanpela bung bilong lotu o wanpela lida bilong lotu i makim, nogat. Holi spirit bilong God i stiaim ol Kristen tru na ol i luksave tru olsem God em i as bilong ol dispela tok. Dispela i stret wantaim wanpela presen bilong holi spirit em kongrigesen Kristen bilong bipo i bin kisim, em ol i “kisim ol kain kain presen” bilong holi spirit. (1 Ko. 12:​4, 10)​—4/1, pes 28.