Wanpela Man Bilong Prinim Baibel Long Bipo

INAP planti tausen yia bipo, ol man i save raitim ol buk na ol skrol long han. Tasol i no longtaim i go pinis, inap olsem 1,000 yia samting tasol, ol man i kirap prinim ol buk. Namba wan buk ol i prinim, em long Saina long 868 C.E. Ol i katim ol leta long blok plang na yusim ol dispela blok bilong raitim tok long pepa. Long yia 1455 samting, long Jemani, Johannes Gutenberg i wokim wanpela masin bilong prinim buk we ol i mekim wok long ol leta ol i katim long hap ain. Em i yusim dispela masin bilong prinim namba wan Baibel long tok Latin.

Sampela yia bihain, taim wok bilong prinim ol buk i kamap bikpela, orait nau ol i kirap prinim planti Baibel. Long Jemani, Nuremberg i kamap nambawan ples bilong prinim ol buk, na Anton Koberger bilong dispela taun, ating em i namba wan man long prinim planti Baibel na salim i go long ol narapela kantri.

Ol man bilong kain kain lain ol i gat dinau long ol man bilong bipo bilong prinim Baibel, olsem Anton Koberger. Orait nau bai yumi stori moa long Koberger na wok bilong em.

“Wok Bilong Lukautim Wanpela Buk ​—Em Baibel”

Koberger i kamapim namba wan faktori long Nuremberg bilong prinim ol buk, long 1470. Bihain kampani bilong em i gat 24 masin bilong prinim ol buk long wankain taim, na 100 wokman, long Basel, Strasbourg, Lyon, na sampela narapela biktaun long Yurop. Koberger i prinim ol buk ol i bin raitim long tok Latin, na tu, ol buk i stori long ol samting bilong saiens. Em i bin prinim 236 ol narapela narapela buk na Baibel tu. Sampela bilong ol dispela buk i gat planti pes long en, inap olsem sampela handet. Ol i prinim wanpela pes long wanpela taim na mekim olsem long masin ol i operetim long han.

Ol rait long ol buk bilong Koberger i naispela na i isi long ritim. Wanpela saveman, Alfred Börckel, i tok, “Koberger i save yusim ol nupela blok i gat leta i klia. Taim ol leta long blok i bagarap liklik na i no klia moa, em i no yusim moa.” Na tu, planti buk na Baibel bilong Koberger i gat ol piksa long en.

Oscar Hase, man bilong raitim stori bilong Koberger, i tok: Long kirap bilong wok bilong em i go inap long pinis, “wok bilong lukautim wanpela buk​—em Baibel​—i stap ples klia.” Koberger na ol wanwok bilong em i bin wok strong tru long kisim ol manuskrip bilong Baibel we ol man i bin raitim stret ol tok. I bin hatwok long kisim ol dispela manuskrip, long wanem, planti manuskrip i stap long ol haus bruder. Ol i samting i dia tumas, olsem na taim ol i larim ol man i kisim bilong wokim kopi bilong en, ol i larim ol i holim inap sotpela taim tasol.

Ol Baibel Long Tok Latin na Jeman

I gat 15 narapela narapela taim we Koberger i prinim Biblia Latina (Baibel Latin). Namba wan edisen bilong en i kamap long 1475. Sampela edisen i gat piksa bilong sip bilong Noa, Tenpela Lo, na tempel bilong Solomon. Long 1483, Koberger i prinim Biblia Germanica (Baibel Jeman), inap olsem 1,500​—em planti Baibel tru long dispela taim. Dispela Baibel i gat planti piksa long en, winim 100, bilong kirapim laik bilong man long ritim, helpim man long kisim gut ol tok, na kirapim ol man i no save rit long tingim ol stori long Baibel ol i save pinis long en. Ol piksa long dispela Baibel i givim tingting long ol man i kam bihain, em ol man bilong droim ol piksa bilong putim long Baibel, na moa yet long ol Baibel Jeman.

Planti manmeri i laikim Baibel Jeman em Koberger i bin prinim long 1483, tasol samting i kamap bihain i mekim na em i no prinim sampela Baibel moa long tok Jeman. Maski ol edita i bin stretim sampela tok bilong dispela Baibel na bai i stret wantaim Baibel Latin Vulgate em misin i orait long en, ol tok bilong Baibel bilong Koberger i bin kam long wanpela Baibel i gat tambu long en, em ol Walden i bin wokim inap olsem 100 yia paslain.a Long 1484, Pop Innocent Namba 8 i kirap mekim wok bilong rausim ol Waldens. Bihain, pasin bilong misin long birua long ol Baibel i stap long tok ples bilong ol man nating, em i go bikpela. Long Mas 22, 1485, Asbisop Berthold bilong Mainz, Jemani, i putim wanpela lo i tambuim wok bilong tanim Baibel long tok Jeman. Long Janueri 4 bilong yia bihain, Berthold i strongim gen dispela lo. Ol dispela samting i mekim na Koberger i pret long prinim gen Baibel long tok Jeman.

Tasol hatwok bilong Anton Koberger i no lus nating. Long rot bilong yusim nupela masin bilong prinim buk, Koberger i bin go pas long prinim kain kain buk em pe bilong ol i no antap tumas, olsem na planti man long Yurop inap kisim. Olsem na wok bilong Koberger i bin helpim wok bilong putim Baibel long han bilong ol man nating.

[Futnot]

[Ol Piksa long pes 26]

Han kais i go han sut: piksa bilong Daniel long hul bilong ol laion; namba wan leta ol i bilasim long gol; ol wan wan leta i klia tru

[Piksa long pes 26]

Koberger

[Ol Piksa long pes 26]

Ol baibel bilong Koberger long tok Latin na tok Jeman, i gat piksa bilong bilasim pes na tok bilong Stat 1:1

[Ol Piksa Kredit Lain long pes 26]

All Bible photos: Courtesy American Bible Society Library; Koberger: Mit freundlicher Genehmigung der Linotype GmbH