Pasin Bilong Stap Redi i Kamapim Gutpela Samting
YU SAVE redi taim rot i op long autim tok long sampela narapela lain i stap long teritori bilong kongrigesen bilong yu? Ol bratasista Kristen bilong yumi long Turku, Finlan, em wanpela taun we ol sip i save sua long en, ol i bin redi na dispela i kamapim gutpela samting.
Sampela taim i go pinis, ol brata long Turku i luksave olsem sampela man bilong Esia i bin kam long taun bilong wok long wanpela traipela sip bilong raun em ol i wok long wokim. Bihain, wanpela brata i painimaut ol hotel ol dispela man i slip long en. Em i kisim save tu olsem long hotel ol i save kisim bas long bikmoning bilong i go long wof. Kwiktaim em i toksave long ol brata long Inglis kongrigesen long Turku.
Ol elda long dispela kongrigesen i luksave olsem taim ol man bilong narapela kantri i kam i stap, dispela i opim rot long ol inap toktok wantaim ol long tok bilong Kingdom, olsem na ol i kirap hariap long stretim rot bilong mekim olsem. Long Sande bilong dispela wik, tenpela pablisa i bung klostu long bas stop long 7 klok long moning. Pastaim, no gat wanpela wokman i kamap. Ol brata i tingting, ‘Ating yumi mas leit ya? Nogut ol i lusim Turku pinis.’ Tasol bihain, wanpela wokman i kam na em i werim ovarol bilong wok. Narapela wokman i bihainim em, na sampela arapela moa i kam. I no longtaim na bas stop i pulap long ol dispela wokman. Ol pablisa i kirap long autim tok long ol long rot bilong tilim ol buk na nius long tok Inglis. Gutpela tru na wanpela aua i lus paslain long olgeta wokman inap painim ples sindaun long ol bas, na dispela i givim taim long ol brata long toktok wantaim planti bilong ol. Taim ol bas i kisim ol wokman i go, ol i karim 126 buklet na 329 magasin i go wantaim ol!
Dispela gutpela samting i kamap i strongim ol brata long mekim wankain samting long narapela wik long taim wasman sekit i kam lukim ol. Long wanpela de taim ren i pundaun, long 6:30 long moning, wasman sekit i lukautim bung bilong autim tok, na bihain 24 pablisa i go long bas stop. Long dispela taim, ol i karim tu ol buk na nius long tokples Tagalog, long wanem, ol i bin painimaut olsem planti bilong ol dispela man i kam long Filipins. Long dispela moning, paslain long ol i go long wof, ol wokman i kisim 7-pela buk, 69 buklet, na 479 magasin. Tingim bikpela amamas bilong ol dispela bratasista taim ol i bin insait long dispela wok!
Paslain long ol dispela wokman i go bek long kantri bilong ol, ol brata i bin go lukim sampela bilong ol long hotel ol i slip long en na stori moa long Kingdom. Sampela wokman i tokaut olsem ol i bin bungim ol Witnes long ol narapela kantri. Ol wokman i kamapim tenkyu bilong ol long ol brata long ol i bin kam bungim ol taim ol i stap long Finlan.
Yu save redi taim rot i op long autim tok long sampela narapela lain i stap long teritori bilong kongrigesen bilong yu? Yu save go pas long autim tok long ol man bilong narapela ples? Sapos olsem, yu tu inap kisim wankain ekspiriens olsem ol dispela bratasista long Turku.
[Mep/Piksa long pes 32]
(Bilong save ol dispela rait i stap long pes, lukim buk o magasin)
FINLAN
HELSINKI
Turku