Was Gut, Nogut Ol i Giamanim Yu

DON QUIXOTE em nem bilong wanpela man i stap long wanpela stori nating, em Miguel de Cervantes bilong Spen i bin raitim long buk bilong em long yia 1500 samting. Long dispela buk, Don Quixote i pulimapim tingting bilong em long ol stori nating bilong ol strongpela man i pasim ol gutpela klos pait i lait tru na ol i kisim bek ol yangpela meri long han bilong ol man nogut. Orait i no longtaim na em i kirap bilip olsem em tu i wanpela strongpela soldia olsem. Long wanpela sapta bilong dispela stori, em i go pait wantaim sampela winmil i save tanim tanim, em i lukim ol olsem wanpela lain traipela man nogut bilong pait. Long tingting bilong em, em i bilip tru olsem em i mekim wok bilong God long kilim i dai ol dispela traipela man, tasol bihain em i kisim bikpela sem long dispela.

Tru, stori bilong Don Quixote em wanpela stori nating tasol, tasol sapos yumi larim tingting bilong yumi i giamanim yumi, dispela inap nogutim yumi stret. Olsem, tingim man i save dring oltaim​—em i ting em inap dring dring i go, tasol bihain skin bilong em i bagarap na i stap bilong famili tu i bagarap. O yumi ken tingim wanpela meri i gat sik anoreksia, em i gat strongpela tingting long lusim skin na em i no laik kaikai na i wok long kamap bun nating, na em i ting em i save kaikai gut na skin bilong em i strong, tasol isi isi em i wok long i dai, long wanem, em i no save kisim kaikai.

Olsem wanem long yumi? I gat sampela samting inap giamanim yumi tu? Sori tru, yumi mas tok yes long dispela. Tru tumas, dispela samting inap painim yumi olgeta. Na tu, ol inap giamanim yumi long ol bilip bilong lotu bilong yumi, na dispela inap nogutim yumi tru. Bilong wanem i olsem? Olsem wanem yu inap was gut na bai ol i no ken giamanim yu?

Ol Inap Giamanim Yumi

Wanpela dikseneri i tok, dispela tok “ol i giamanim yumi,” i olsem ol i kirapim yumi long bilip olsem wanpela tok giaman o tok i no gat as bilong en i tru na yumi ken bilip long en. Na em i makim tu olsem ‘ol i kirapim yumi long bilip long wanpela tingting o bilip giaman, na dispela i mekim na tingting bilong yumi i paul na yumi no save long rot yumi mas bihainim.’ Na i wankain tu long dispela tok “paulim”​—i olsem long pasin hait na trik ol i pulim man i go lusim rot na em i paul. Em nau, i klia tru olsem sapos ol i givim sampela tok giaman long man na tingting bilong em i paul na em i no save long rot em i mas bihainim, em inap kisim nogut long dispela.

Sori tru, planti man em ol narapela i bin giamanim ol long sampela tok, ol i save holim strong dispela bilip, maski i gat sampela samting i kamapim klia tru olsem dispela bilip i giaman. Ating dispela bilip i pas strong long bel bilong em, na maski i gat ol samting i kamapim long ples klia olsem bilip bilong em i kranki, em i save pasim ai na yau bilong em.

Ol Inap Giamanim Yumi Tu?

Ating bai yu askim olsem: ‘Tru ol inap giamanim yumi olgeta long ol bilip bilong lotu yumi holim?’ Yumi ken tok yes. Long wanem, Satan, em Jisas i bin kolim em olsem “papa tru bilong pasin bilong tok giaman,” em i wok strong long giamanim na paulim tingting bilong yumi olgeta. (Jon 8:44) Na Baibel i kolim Satan olsem “giaman god bilong dispela graun.” Em i bin “pasim tingting” bilong planti milion man kirap long bipo yet. (2 Korin 4:4) Na long nau tu em i wok long “giamanim olgeta manmeri bilong graun.”​—KTH 12:9.

Satan i bin kirap giamanim ol man long taim bilong namba wan man na meri. Olsem: Em i bin giamanim Iv na em i bilip olsem em i no gat wok long i stap aninit long ol lo bilong Man i bin wokim em, na em inap “kamap wankain olsem God” na “kisim save long wanem samting i gutpela, na wanem samting i nogut,” olsem Iv yet inap skelim dispela samting. (Stat 3:​1-5) Dispela em i namba wan bikpela tok giaman i bin kamap, long wanem, maski God i bin wokim ol man bilong i stap fri long makim wanem samting ol i laik mekim, God i no bin wokim ol bambai ol yet inap skelim wanem samting i stret na wanem samting i no stret. God wanpela tasol i gat rait na namba long mekim olsem, long wanem, em i Man Bilong Wokim olgeta samting na em i Nambawan King. (Jeremaia 10:23; KTH 4:11) Em wanpela tingting kranki tru long bilip olsem pasin bilong i stap fri long makim wanem samting i gutpela na wanem samting i nogut em i wankain olsem pasin bilong skelim wanem samting i gutpela na wanem samting i nogut! Sori tru, dispela i olsem wanpela umben yumi olgeta manmeri i gat sin i save pundaun long en.

Dispela Samting Inap Painim Yu?

Ating ol bilip yu holim na laikim tumas ol i bin stap inap planti handet yia, kirap long ol tumbuna na i kam inap long nau. Tasol dispela i no makim olsem ol dispela bilip i tru. Bilong wanem i olsem? Long wanem, ol tok bilong Baibel i soim olsem bihain liklik long taim ol aposel bilong Krais i dai pinis, ol man bilong giaman i kamap insait long kongrigesen Kristen na ol i skulim ol man long ol “tok giaman nabaut, bilong pulim ol manmeri bilong God i go bihainim ol.” (Aposel 20:​29, 30) Ol i paulim ol manmeri long “tok gris” na long “olkain giaman save na toktok nating . . . bilong ol tumbuna.”​—Kolosi 2:​4, 8.

Yu ting ol samting long nau i narapela kain? Nogat, long wanem, aposel Pol i tok lukaut olsem dispela pasin bai i go nogut tru long “taim bilong las de,” em dispela taim nau yumi stap long en. Em i tok: “Ol man nogut na ol giaman profet ol bai i wok long giamanim ol manmeri.”​—2 Timoti 3:​1, 13.

Olsem na em i savepasin long tingim gut tok lukaut bilong aposel Pol, em i tok: “Sapos wanpela man i ting em i sanap strong, orait em i mas lukaut gut. Nogut em i pundaun.” (1 Korin 10:12) Long dispela tok Pol i toktok long man i sanap olsem wanem long ai bilong God. Sapos yu ting Satan i no inap giamanim yu, em nau, Satan i giamanim yu pinis. I no gat wanpela man em ol “trik na giaman” bilong Satan i no inap pundaunim em. (Efesus 6:11) Long dispela as Pol i tokaut long ol wanlain Kristen bilong em: “Mi ting long dispela snek i save tumas long pasin bilong giaman, na bipo tru em i bin giamanim Iv, na mi pret, nogut wankain samting i kamap long yupela. Nogut tingting bilong yupela i paul, na yupela i lusim pasin bilong i stap klin na tingting long Krais tasol.”​—2 Korin 11:3.

Olsem Wanem Yu Ken Was Gut?

Orait, olsem wanem yu ken was gut na bai Satan i no ken giamanim yu? Olsem wanem yu ken save gut olsem yu “lotu [long God] long strong bilong Holi Spirit na long pasin i tru”? (Jon 4:24) Mekim wok long samting God Jehova i bin givim long yu. Namba wan, em i bin “givim tingting” long yu bambai yu inap skelim wanem tok i tru na wanem tok i giaman. (1 Jon 5:20) Na tu, em i bin wokim rot bambai yu inap luksave long ol pasin trik bilong Satan. (2 Korin 2:11) Em i givim yu olgeta samting yu mas kisim bilong sakim pasin bilong Satan long traim giamanim yu.​—Sindaun 3:​1-6; Efesus 6:​10-18.

Na bikpela samting tru, God i bin givim yu wanpela samting em inap tru long lukautim yu. Em wanem samting? Em dispela samting aposel Pol i tokim poroman bilong em Timoti long mekim wok long en long ol samting bilong bilip. Pastaim aposel Pol i givim tok lukaut long Timoti long “ol man nogut na ol giaman profet,” na bihain em i tokim Timoti long sakim ol, na bilong mekim olsem em i mas putim ol “tok bilong God,” em Baibel Holi, i stap olsem as bilong olgeta samting em i bilip long en.​—2 Timoti 3:15.

Tru, ating sampela bai tok, sapos man i bilip long God na i bilip olsem Baibel em i Tok Bilong God, em i bihainim tok giaman. Tasol tru tru, ol man i bihainim tok giaman em ol man husat i bikhet na i sakim ol samting i kamapim klia olsem Man Bilong Wokim olgeta samting em i stap tru na i sakim ol tok olsem Baibel em i Tok Bilong God.a​—Rom 1:​18-25; 2 Timoti 3:​16, 17; 2 Pita 1:​19-21.

Yu no ken larim “kain kain toktok i pait long tingting bilong God” i giamanim yu, nogat, mekim wok long Tok Bilong God bilong kamapim tok i tru. (1 Timoti 6:​20, 21) Stap olsem ol man na meri bilong Beria em aposel Pol i bin autim tok long ol. Ol i “harim tok bilong Pol, na ol i laikim tru.” Ol i bilip long tok aposel Pol i bin skulim ol long en, na tu, ol i “ritim na skelim tok i stap long buk bilong God, bilong ol i ken save, tok bilong Pol em i tru, o nogat.”​—Aposel 17:11.

Yu no ken pret long skelim ol bilip bilong yu long kain pasin olsem. Baibel i kirapim yumi long “skelim gut olgeta tok” bilong save ol dispela tok i tru o nogat. (1 Tesalonaika 5:21) Klostu long yia 100 C.E., aposel Jon i kirapim ol wanbilip Kristen olsem: “Ol pren, . . . yupela i no ken bilip long olgeta man i kam long yupela na i tok, ‘Spirit bilong God i givim tok long mi.’ Nogat. Yupela i mas traim olgeta spirit, bai yupela i ken save, ol i kam long God, o nogat.” (1 Jon 4:1) Maski i luk olsem wanpela bilip bilong lotu “i kam long God,” em i savepasin long yu skelim dispela bilip wantaim ol tok bilong Baibel paslain long yu orait long en.​—Jon 8:​31, 32.

Bihainim Tok Yu Lainim

Tasol i gat wanpela samting moa God i laik bai yu mekim. Disaipel Jems i tok: “Dispela tok yupela i kisim, em yupela i mas bihainim. Yupela i no ken harim nating tasol. Nogat. Sapos yupela i harim nating, orait yupela i giamanim yupela yet.” (Jems 1:22) Em i no inap long yu save tasol long tok bilong Baibel, nogat. Yu mas bihainim ol dispela tok. Bai yu bihainim olsem wanem? Yu mas mekim ol samting God i tokim yu long mekim na yu no ken mekim ol samting em i tambuim.

Olsem, tingim ol pasin nogut olsem pasin pamuk na pasin sem samting i go bikpela moa yet long nau. Dispela i soim yu olsem Satan i bin giamanim planti manmeri na ol i ting ol inap sakim ol stretpela lo bilong God long maritpasin, na i no gat strafe bai painim ol. Dispela i as na aposel Pol i givim strongpela tok lukaut long ol Kristen, olsem: “Nogut yupela i giamanim yupela yet na yupela i ting yupela inap long trikim God. Yupela bai i no inap tru. Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.”​—Galesia 6:7.

Yu no ken bihainim pasin bilong “longlong man,” em Jisas i tok long em olsem em “i harim dispela tok” tasol em “i no bihainim.” Tingim Don Quixote long stori bilong Cervantes, ol tingting kranki bilong em yet i bin giamanim em, na olsem tasol dispela man long tok piksa bilong Jisas, em i giamanim em yet, long wanem, em i ting em inap wokim strongpela haus antap long wesan nating. Mobeta yu bihainim pasin bilong man “i wokim haus bilong en antap long ples ston.” Jisas i kolim dispela man olsem “man i gat gutpela tingting,” long wanem, em i harim ol tok bilong Jisas “na i bihainim.”​—Matyu 7:​24-27.

[Futnot]

[Blok/Piksa long pes 12,13]

Yu Save Lukim Stret Ol Samting?

Bihain long 1930, Oscar Reutersvärd bilong Swiden, em man bilong droim ol piksa, em i bin wokim sampela narakain piksa na soim long ol man. Long han kais i gat wanpela kain piksa olsem. Sapos ol man i lukluk kwiktaim long ol dispela piksa, i olsem ol inap lukim wanpela samting i narapela kain tru. Tasol sapos ol man i glasim gut, ol inap lukim ol samting man bilong wokim piksa i bin droim bilong giamanim ai na tingting bilong ol man i lukim piksa.

I no lukluk bilong ol dispela piksa tasol i giamanim ai na tingting, nogat, i gat sampela narapela samting tu i mekim olsem. Inap olsem 2,000 yia i go pinis, Baibel i tok lukaut olsem: “Yupela i mas lukaut gut, nogut wanpela man i autim olkain giaman save na toktok nating long yupela na em i mekim yupela i bihainim tingting bilong en. Ol dispela kain man i save kisim tingting bilong ol tumbuna na bilong ol spirit i save bosim ol samting bilong skai na graun. Ol i no save bihainim tingting bilong Krais.”​—Kolosi 2:8.

Samting i strongim tru dispela tok lukaut i olsem: Man bilong raitim ol dispela tok, em yet i bin bihainim tok giaman na dispela tok i bin paulim em. Em i bin kisim skul long wanpela tisa bilong lotu i gat bikpela nem tru, na em i save bung wantaim ol bikman na man i gat bikpela namba. Olsem na yumi ken ting i no gat wanpela inap giamanim em.​—Aposel 22:3.

Dispela man​—Sol bilong Tarsus​—ol i bin giamanim em na em i bilip olsem ol man i no bihainim ol bilip na pasin bilong ol tumbuna bilong em, God i mas bagarapim ol. Ol bikman bilong lotu Juda ol i givim strong na namba long em, na em i ting em i mekim wok bilong God taim em i kalabusim ol man i no laik tanim bel na lusim bilip Kristen. Na em i bin sambai long ol man i bin kilim i dai wanpela wantok bilong em, ol i bin sutim tok giaman long em olsem em i bin tok bilas long God.​—Aposel 22:​4, 5, 20.

Bihain sampela i helpim Sol long luksave long wanem samting i stret na wanem samting i no stret, em samting God i orait long en na samting Em i no orait long en. Taim Sol i save pinis olsem em i bin mekim pasin i no stret, em i senisim pasin bilong em na ol i kolim em Pol, em wanpela aposel bilong Jisas Krais. Nau Pol i no bihainim moa tok giaman bilong ol man​—em i painim pinis rot tru bilong lotuim God.​—Aposel 22:​6-16; Rom 1:1.

Olsem Pol, i gat planti manmeri em sampela i bin giamanim ol long ol bilip bilong lotu i luk olsem i stret ol i bilip long en, tasol Baibel i no as bilong ol dispela bilip. (Sindaun 14:12; Rom 10:​2, 3) Orait bihain sampela i helpim ol long glasim gut ol bilip bilong ol na ol samting em lotu bilong ol i bin kamapim. (Matyu 7:​15-20) Taim ol i wok long kisim stretpela save long Baibel, ol i senisim sampela bilip na pasin bilong ol bambai God i ken orait long ol.

Olsem wanem? Yu laik bihainim pasin bilong aposel Pol na skelim gut ol bilip bilong yu wantaim tok bilong God long Baibel? Ol Witnes Bilong Jehova bai amamas long helpim yu.

[Piksa Kredit Lain long pes 10]

Engravings by Doré