Yu Ting i Gat Rot Bilong Stap Belgut?

“Pasin bilong stap belgut i mekim rabisman i olsem em i maniman; pasin bilong stap bel nogut i mekim maniman i olsem em i rabisman.” ​—Benjamin Franklin.

OLSEM dispela savetok i kamapim, planti man i bin kisim save olsem ol i no inap baim pasin bilong stap belgut. I luk olsem ol man i no inap stap belgut long dispela taim we planti man i strong long kisim planti mani kago, mekim ol wok i gat namba, o ol i laikim gutpela sindaun olsem sampela narapela man! Olsem wanem? Ol samting nau bai yumi stori long en i bin painim yu?

• Ol man bilong edvetaisim ol samting i strong olsem yu bai stap belgut tasol sapos yu baim planti samting.

• Long ples wok na skul, pasin bilong resis i kirapim yu long tingting olsem yu gutpela tasol sapos yu inap mekim olgeta wok ol narapela i save mekim.

• Ol man i no save tenkyu long ol samting yu mekim bilong helpim ol.

• Ol pren bilong yu i gat ol samting em yu tu i gat laik long kisim.

• Ol bikpela askim long i stap bilong yu i no gat bekim bilong en.

Taim ol dispela samting i painim man, yu ting em inap stap belgut? Aposel Pol i toktok long rot bilong stap belgut. Sampela taim em i gat planti samting na sampela taim em i sot long ol samting. Ol pren bilong em i amamas long em, tasol ol narapela i tok bilas long em. Maski i olsem, em i tok, “mi lain long pasin bilong stap belgut, maski wanem kain samting i kamap long mi.”​—Filipai 4:​11, 12, Baibel New International Version.

Pasin bilong stap belgut i stap hait long ol man i no bin mekim ol samting bilong kisim dispela pasin, tasol olsem Pol i tok yumi inap lain long kisim dispela pasin. Orait, nau mipela i laik kirapim yu long skelim faivpela rot bilong kisim pasin bilong stap belgut olsem Baibel i stori long en.